Read სბს–სტოკჰოლმი 2001 იოანეს სახარება 1 Bible Online

იოანეს სახარება 1 - სბს–სტოკჰოლმი 2001 bible

იოანეს სახარება 1

¹დასაწყისში იყო სიტყვა და სიტყვა იყო ღმერთთან, და სიტყვა იყო ღმერთი.

²ის იყო დასაწყისში ღმერთთან.

³ყოველივე მის მიერ შეიქმნა და უიმისოდ არაფერი შექმნილა, რაც კი შექმნილა.

⁴მასში იყო სიცოცხლე და სიცოცხლე იყო ადამიანთა ნათელი.

⁵ნათელი ბნელში ანათებს და ბნელმა ვერ მოიცვა იგი.

⁶იყო კაცი, მოვლინებული ღვთისგან; სახელი მისი იყო იოანე.

⁷იგი მოვიდა დასამოწმებლად, რათა დაემოწმებინა ნათლის შესახებ, რათა ყველას ერწმუნა მისი მეშვეობით.

⁸იგი არ იყო ნათელი, არამედ რათა დაემოწმებინა ნათლის შესახებ.

⁹იყო ნათელი ჭეშმარიტი, რომელიც უნათებს სოფლად მომსვლელ ყოველ ადამიანს.

¹⁰იყო სოფელში და სოფელი მის მიერ შეიქმნა, და სოფელმა ვერ იცნო იგი.

¹¹თავისიანებთან მოვიდა და თავისიანებმა არ მიიღეს იგი.

¹²ხოლო ვინც მიიღო იგი და ირწმუნა მისი სახელი, მისცა მათ ხელმწიფება ღვთის შვილებად გახდომისა.

¹³ისინი იშვნენ არა სისხლისაგან, არა ხორცის ნდომისაგან, არა მამაკაცის ნდომისაგან, არამედ ღვთისაგან.

¹⁴სიტყვა ხორცი იქმნა და დაემკვიდრა ჩვენს შორის, მადლითა და ჭეშმარიტებით აღსავსე. და ჩვენ ვიხილეთ მისი დიდება, როგორც დიდება მამისაგან მხოლოდშობილისა.

¹⁵იოანე მოწმობს მასზე და ღაღადებს: “ეს იყო, ვისზეც ვთქვი: ჩემს შემდეგ მომავალი ჩემზე უპირატესია, ვინაიდან ჩემზე უწინ იყო.

¹⁶მისი სისავსიდან მივიღეთ ყველამ მადლი მადლისა წილ.

¹⁷ვინაიდან რჯული მოცემულია მოსეს მიერ, ხოლო მადლი და ჭეშმარიტება იესო ქრისტეს მიერ იქმნა.”

¹⁸ღმერთი არასოდეს არავის უნახავს. მხოლოდშობილმა ძემ, მამის წიაღში მყოფმა, გააცხადა.

¹⁹აჰა, მოწმობა იოანესი, როცა იუდეველებმა მიუგზავნეს იერუსალიმიდან მღვდელნი და ლევიანები, რათა ეკითხათ მისთვის: “ვინ ხარ შენ?”

²⁰მან აღიარა და არ უარყო, აღიარა: “მე არა ვარ ქრისტე.”

²¹და ჰკითხეს მას კვლავ: “მაშ ვინა ხარ? ელია ხარ?” ამბობს: “არა ვარ.” “წინასწარმეტყველი ხარ?” მიუგებს: “არა.”

²²მაშინ უთხრეს მას: “ვინა ხარ, რომ პასუხი გავცეთ ჩვენს წარმომგზავნელთ: რას იტყვი შენზე?”

²³თქვა: “მე ვარ ხმა მღაღადებლისა უდაბნოში: მოუსწორეთ გზა უფალს, როგორც თქვა ესაია წინასწარმეტყველმა.”

²⁴წარმოგზავნილები კი ფარისეველთაგან იყვნენ.

²⁵და ჰკითხეს მას და უთხრეს: “აბა, რაღატომ ნათლავ, თუ არც ქრისტე ხარ, არც ელია, არც წინასწარმეტყველი?”

²⁶მიუგო მათ იოანემ და უთხრა: “მე ვნათლავ წყლით, მაგრამ თქვენს შორის დგას, ვისაც ვერ იცნობთ.

²⁷ის ჩემს შემდეგ მოდის, მაგრამ მე მის სანდლებზე თასმის შეხსნის ღირსიც არა ვარ.”

²⁸ეს ბეთანიაში მოხდა, იორდანეს გაღმა, სადაც იოანე ნათლავდა.

²⁹მეორე დღეს იხილა მან მისკენ მომავალი იესო და თქვა: “აჰა, ღვთის კრავი, რომელმაც აიღო სოფლის ცოდვა.

³⁰ეს არის, ვისზეც ვთქვი: ჩემს შემდეგ მოდის კაცი, რომელიც ჩემზე უპირატესია, ვინაიდან ჩემზე უწინ იყო-მეთქი.

³¹მე არ ვიცნობდი მას, მაგრამ იმიტომ მოვედი წყლით სანათლავად, რომ ის გამოეცხადოს ისრაელს.”

³²მოწმობდა იოანე და ამბობდა: “მე ვიხილე ციდან მტრედივით გადმომავალი სული, რომელმაც დაივანა მასზე.

³³მე არ ვიცნობდი მას, მაგრამ ვინც მომავლინა წყლით სანათლავად, მან მითხრა: ‘ვისზეც დაინახო სული, გადმომავალი და დავანებული, ის არის სულიწმიდით ნათლისმცემელი.’

³⁴მე დავინახე და დავამოწმე, რომ ეს არის ძე ღვთისა.”

³⁵მეორე დღეს კვლავ იდგა იოანე და ორი მისი მოწაფეთაგანი.

³⁶დაინახა მომავალი იესო და თქვა: “აჰა, ღვთის კრავი.”

³⁷ორმა მოწაფემ გაიგონა მისი სიტყვა და გაჰყვა იესოს.

³⁸იესო მობრუნდა და დაინახა, რომ მიჰყვებიან, და ეუბნება მათ: “რას ეძებთ?” მათ უთხრეს: “რაბი (რაც თარგმანით ნიშნავს: მოძღვარო), სად დგახარ?”

³⁹ეუბნება მათ: “წამოდით და ნახავთ.” წავიდნენ და ნახეს, სადაც იდგა. ის დღე მასთან დაჰყვეს. იქნებოდა ასე მეათე საათი.

⁴⁰ერთი ამ ორთაგანი, რომელთაც იოანესგან მოისმინეს და გაჰყვნენ იესოს, იყო ანდრია, ძმა სიმონ-პეტრესი.

⁴¹მან პირველად თავისი ძმა სიმონი ნახა და უთხრა: “ჩვენ ვიპოვეთ მესია” (რაც თარგმანით ნიშნავს ქრისტეს).

⁴²მიიყვანა იგი იესოსთან. შეხედა მას იესომ და უთხრა: “შენ ხარ სიმონი, იოანეს ძე. ამიერიდან შენ გერქმევა კეფა (რაც თარგმანით ნიშნავს კლდეს, პეტრეს).

⁴³მეორე დღეს მოისურვა გალილეას წასვლა, და იპოვა ფილიპე. უთხრა მას იესომ: “გამომყევი”.

⁴⁴ხოლო ფილიპე ბეთსაიდიდან იყო, ანდრიას და პეტრეს ქალაქიდან.

⁴⁵ფილიპე შეხვდა ნათანაელს და უთხრა: “ჩვენ ვნახეთ ის, ვისზეც დაწერეს რჯულში მოსემ და წინასწარმეტყველებმა: იესო, იოსების ძე, ნაზარეთიდან.”

⁴⁶უთხრა მას ნათანაელმა: “ნაზარეთიდან რა სიკეთე შეიძლება იყოს?” უთხრა მას ფილიპემ: “წამოდი და ნახე”.

⁴⁷იესომ რომ დაინახა მისკენ მომავალი ნათანაელი, თქვა მასზე: “აჰა, ნამდვილი ისრაელიანი, რომელშიც არ არის მზაკვრობა.”

⁴⁸ეუბნება მას ნათანაელი: “საიდან მიცნობ?” მიუგო იესომ და უთხრა მას: “ვიდრე ფილიპე დაგიძახებდა, ლეღვის ქვეშ დაგინახე.”

⁴⁹მიუგო მას ნათანაელმა: “რაბი, შენ ხარ ძე ღვთისა, შენ ხარ მეფე ისრაელისა.”

⁵⁰მიუგო იესომ და უთხრა მას: “შენ იმის გამო გწამს, რომ გითხარი, ლეღვის ქვეშ დაგინახე-მეთქი? ამაზე მეტსაც იხილავ.”

⁵¹ეუბნება მას: “ჭეშმარიტად, ჭეშმარიტად გეუბნებით თქვენ: ამიერიდან იხილავთ გახსნილ ცას და ღვთის ანგელოზებს, კაცის ძეზე აღმავალთ და ჩამომავალთ.”