Read სბს–სტოკჰოლმი 2001 იოანეს სახარება 20 Bible Online

იოანეს სახარება 20 - სბს–სტოკჰოლმი 2001 bible

იოანეს სახარება 20

¹ერთშაბათს, დილაადრიან, როცა ჯერ ისევ ბნელოდა, მივიდა მარიამ მაგდალელი სამარხთან და ხედავს, რომ ლოდი გადაგორებულია სამარხიდან.

²გაიქცა და მივიდა სიმონ-პეტრესთან და სხვა მოწაფესთან, რომელიც უყვარდა იესოს, და უთხრა მათ: “უფალი წაუღიათ სამარხიდან და არ ვიცით, სად დადეს.”

³მაშინვე გამოვიდნენ პეტრე და სხვა მოწაფე და მივიდნენ სამარხთან.

⁴ორივენი ერთად მირბოდნენ, მაგრამ მეორე მოწაფე პეტრეზე სწრაფად გაიქცა და პირველი მივიდა სამარხთან.

⁵დაიხარა და დაინახა დაწყობილი ტილოები, მაგრამ არ შესულა.

⁶მივიდა სიმონ-პეტრეც მის შემდეგ, და შევიდა სამარხში და დაინახა დაწყობილი ტილოები.

⁷სუდარა, თავზე რომ ეხვია, იმ ტილოებთან კი არ იდო, არამედ ცალკე იყო დახვეული ერთ ადგილას.

⁸მაშინ შევიდა სხვა მოწაფეც, სამარხთან პირველი რომ მივიდა, და იხილა და იწამა,

⁹რადგან აქამდე არ იცოდნენ წერილიდან, რომ იგი მკვდრეთით უნდა აღმდგარიყო.

¹⁰წავიდნენ კვლავ თავ-თავისთვის მოწაფეები.

¹¹მარიამი კი იდგა სამარხთან, გარეთ და ტიროდა. და მტირიალი სამარხისაკენ დაიხარა,

¹²და დაინახა თეთრებში შემოსილი ორი ანგელოზი, მსხდომარენი ერთი თავთით და მეორე ფერხთით, სადაც იესოს გვამი ესვენა.

¹³უთხრეს მას: “ქალო, რატომ სტირი?” ეუბნება მათ: “ჩემი უფალი წაიღეს და არ ვიცი, სად დადეს.”

¹⁴ამის თქმისას მოტრიალდა და დაინახა მდგომარე იესო. მაგრამ ვერ იცნო, რომ იესო იყო.

¹⁵ეუბნება მას იესო: “ქალო, რატომ სტირი, ვის ეძებ?” მას მებაღე ეგონა იგი და ეუბნება მას: “ბატონო, თუ შენ წაიღე, მითხარი, სად დადე, და მე წამოვიღებ.”

¹⁶ეუბნება მას იესო: “მარიამ!” მოტრიალდა მარიამი და ებრაულად უთხრა: “რაბუნი!” (რაც ნიშნავს: მოძღვარო)

¹⁷ეუბნება მას იესო: “არ შემეხო, რადგან ჯერ არ ავსულვარ მამასთან. წადი ჩემს ძმებთან და უთხარი: ავდივარ ჩემს მამასთან და თქვენს მამასთან, ჩემს ღმერთთან და თქვენს ღმერთთან.”

¹⁸მარიამ მაგდალელი მივიდა და აუწყა მოწაფეებს, რომ უფალი იხილა და ეს უთხრა მას.

¹⁹იმავე დღის საღამოჟამს, ერთშაბათს, როცა იუდეველთა შიშის გამო დაკეტილი იყო კარი, სადაც მოწაფეები იყვნენ, მივიდა იესო და დადგა შუაში, და უთხრა მათ: “მშვიდობა თქვენდა!”

²⁰ეს რომ თქვა, უჩვენა ხელებიცა და ფერდიც. მოწაფეებმა გაიხარეს უფლის ხილვით.

²¹კვლავ უთხრა მათ იესომ: “მშვიდობა თქვენდა! როგორც მე მომავლინა მამამ, მეც მიგავლენთ თქვენ.”

²²ეს რომ თქვა, სული შეუბერა და ეუბნება: “მიიღეთ სულიწმიდა.

²³ვისაც მიუტევებთ ცოდვებს, მიეტევებათ, ვისაც დაუკავებთ, დაეკავებათ.”

²⁴თომა, ერთი თორმეტთაგანი, ტყუპისცალად წოდებული, არ იყო მათთან, როცა იესო მოვიდა.

²⁵უთხრეს მას სხვა მოწაფეებმა: “ჩვენ ვიხილეთ უფალი.” მან უთხრა მათ: “თუ მის ხელებზე ნალურსმევს არ ვიხილავ და ნალურსმევში საკუთარ თითს არ ჩავყოფ და მის ფერდში - საკუთარ ხელს, არ ვიწამებ!

²⁶რვა დღის შემდეგ მისი მოწაფეები კვლავ შინ იყვნენ და თომაც მათთან იყო. შევიდა იესო ჩაკეტილ კარებში, დადგა შუაში და თქვა: “მშვიდობა თქვენდა.”

²⁷მერე თომას ეუბნება: “მოიტა აქ შენი თითი და გასინჯე ჩემი ხელები. მოიტა შენი ხელი და ჩადე ჩემს ფერდში. ურწმუნო კი ნუ იქნები, მორწმუნე იყავ.”

²⁸მიუგო თომამ და უთხრა მას: “უფალი ჩემი და ღმერთი ჩემი!”

²⁹ეუბნება მას იესო: “შენ მირწმუნე იმიტომ, რომ მიხილე. ნეტარ არიან ისინი, ვისაც არ ვუნახივარ და მირწმუნეს.”

³⁰ბევრი სხვა ნიშანიც მოიმოქმედა იესომ მოწაფეების წინაშე, რაც ამ წიგნში არ დაწერილა.

³¹ეს კი დაიწერა, რათა ირწმუნოთ, რომ იესო არის ქრისტე, ძე ღვთისა, და, რათა მორწმუნეებს გქონდეთ სიცოცხლე მისი სახელით.