Read სბს–სტოკჰოლმი 2001 იოანეს სახარება 4 Bible Online

იოანეს სახარება 4 - სბს–სტოკჰოლმი 2001 bible

იოანეს სახარება 4

¹როცა შეიტყო იესომ, რომ ფარისევლებს გაგებული ჰქონდათ, იესო უფრო მეტ მოწაფეებს იძენს და ნათლავს, ვიდრე იოანეო,

²(თუმცა ნათლავდა არა თვით იესო, არამედ მისი მოწაფეები),

³დატოვა იუდეა და კვლავ გალილეას წავიდა.

⁴მას სამარიაზე უნდა გაევლო.

⁵მივიდა სამარიელთა ქალაქში, სიქარი რომ ეწოდება, იმ მინდვრის მახლობლად, რომელიც იაკობმა მისცა თავის ძეს იოსებს.

⁶იქ იყო იაკობის ჭა. გზით დაქანცული იესო წყაროსთან ჩამოჯდა. ასე ექვსი საათი იქნებოდა.

⁷მოვიდა ქალი სამარიიდან წყლის ამოსაღებად. ეუბნება მას იესო: “წყალი დამალევინე,”

⁸რადგან მისი მოწაფეები ქალაქში იყვნენ წასული საჭმელის საყიდლად.

⁹ეუბნება მას სამარიელი ქალი: “როგორ მთხოვ შენ, იუდეველი, სამარიელ დედაკაცს, დამალევინეო?” (რადგან იუდეველებს არა აქვთ ურთიერთობა სამარიელებთან.)

¹⁰მიუგო იესომ და უთხრა მას: “შენ რომ იცოდე რას იძლევა ღმერთი და ვინ არის ის, ვინც გეუბნება, წყალი დამალევინეო, მაშინ შენ თვითონ სთხოვდი მას და ისიც მოგცემდა ცოცხალ წყალს.”

¹¹ეუბნება მას ქალი: “ბატონო, არც ასავსები ჭურჭელი გაქვს და ეს ჭაც ღრმაა. საიდან გაქვს ცოცხალი წყალი?

¹²ნუთუ შენ მეტი ხარ ჩვენს მამა იაკობზე, რომელმაც ეს ჭა მოგვცა, და თვითონაც აქედან სვამდა, მისი შვილებიც და მისი საქონელიც?”

¹³მიუგო იესომ და უთხრა მას: “ყველას, ამ წყლის შემსმელს, კვლავ მოსწყურდება.

¹⁴ხოლო ვინც შესვამს წყლიდან, რომელსაც მე მივცემ მას, საუკუნოდ არ მოსწყურდება. რადგან წყალი, მე რომ მივცემ, მასში გადაიქცევა წყლის წყაროდ, რომელიც საუკუნო სიცოცხლედ იდინებს.”

¹⁵ეუბნება მას ქალი: “ბატონო, მომეცი ის წყალი, რომ აღარ მომწყურდეს და აღარც წყლის ამოსაღებად მოვიდე აქ.”

¹⁶ეუბნება მას: “წადი, დაუძახე შენს ქმარს და მოდი აქ.”

¹⁷მიუგო ქალმა და უთხრა: “მე არ მყავს ქმარი.” ეუბნება მას იესო: “მართალი თქვი, ქმარი არა მყავსო,

¹⁸რადგან ხუთი ქმარი გყავდა და, ვინც ახლა გყავს, არც ისაა შენი ქმარი. მართალი თქვი.”

¹⁹ეუბნება მას ქალი: “ბატონო, ვხედავ, რომ წინასწარმეტყველი ხარ.

²⁰ჩვენი მამები ამ მთაზე სცემდნენ თაყვანს, თქვენ კი ამბობთ, იერუსალიმშია ადგილი, სადაც უნდა სცემდნენო თაყვანს.”

²¹ეუბნება მას იესო: “ქალო, მერწმუნე, დგება ჟამი, როცა არც ამ მთაზე და არც იერუსალიმში თაყვანს აღარ სცემთ მამას.

²²თქვენ არ იცით, რას სცემთ თაყვანს. ჩვენ კი ვიცით, რას ვცემთ თაყვანს, რადგან ხსნა იუდეველთაგანაა.

²³მაგრამ დგება ჟამი და უკვე აქ არის, როცა ჭეშმარიტი თაყვანისმცემელნი თაყვანს სცემენ მამას სულითა და ჭეშმარიტებით, რადგან მამაც სწორედ ასეთ თაყვანისმცემლებს ეძებს თავისთვის.

²⁴ღმერთი არის სული და მისი თაყვანისმცემელნი თაყვანს უნდა სცემდნენ სულითა და ჭეშმარიტებით.”

²⁵ეუბნება მას ქალი: “ვიცი, რომ მოდის მესია, რომელსაც ჰქვია ქრისტე. ის რომ მოვა, ყველაფერს გაგვიცხადებს.”

²⁶ეუბნება მას იესო: “მე ვარ, ვინც შენ გელაპარაკება.”

²⁷ამ დროს მოვიდნენ მისი მოწაფეები და გაუკვირდათ, რომ იგი ქალთან საუბრობდა, მაგრამ არც ერთს არ უთქვამს: რას ეძიებ ან რას ელაპარაკებიო მას.

²⁸დატოვა თავისი ჭურჭელი ქალმა და წავიდა ქალაქში და ეუბნება ადამიანებს:

²⁹“წადით, ნახეთ ადამიანი, რომელმაც ყველაფერი მითხრა, რაც კი ჩამიდენია. ის ხომ არ არის ქრისტე?”

³⁰გამოვიდნენ ქალაქიდან და გაემართნენ მისკენ.

³¹ამასობაში მოწაფეებმა სთხოვეს მას და უთხრეს: “რაბი, ჭამე!”

³²მან უთხრა მათ: “მე მაქვს საჭმელი, რომელიც თქვენ არ იცით.”

³³ამიტომ მოწაფეებმა ერთმანეთს გადაულაპარაკეს: “ნუთუ ვინმემ მოუტანა მას საჭმელი?”

³⁴ეუბნება მათ იესო: “ჩემი საჭმელია - ვქმნა ჩემი მომავლინებლის ნება და აღვასრულო მისი საქმე.

³⁵განა თქვენ არ ამბობთ, რომ კიდევ ოთხი თვე და დადგება მკა? აჰა, მე გეუბნებით თქვენ: აახილეთ თვალები და შეხედეთ ყანებს, როგორ გადათეთრებულან სამკალად.

³⁶მომკელი ღებულობს თავის საზღაურს და მოაგროვებს ნაყოფს საუკუნო სიცოცხლისათვის, ისე რომ, მთესველი და მომკელი ერთად გაიხარებენ.

³⁷ამგვარად, ჭეშმარიტია ანდაზა: ერთი თესავს და სხვა იმკისო.

³⁸მე თქვენ მიგავლენთ იმის მოსამკელად, რაზეც არ გიშრომიათ. სხვებმა იშრომეს, თქვენ კი მათ ნამუშაკევში შეხვედით.”

³⁹ბევრმა იმ ქალაქში მცხოვრებმა სამარიელმა ირწმუნა იგი იმ ქალის სიტყვით, რომელიც ამოწმებდა: ყველაფერი მითხრა, რაც ჩამიდენიაო.

⁴⁰ამიტომ, როცა მოვიდნენ მასთან სამარიელები, სთხოვეს, მათთან დარჩენილიყო, და იგი ორ დღეს დარჩა იქ.

⁴¹კიდევ მრავალმა ირწმუნა მისი სიტყვით.

⁴²ქალს უთხრეს: “უკვე გვწამს არა შენი ნათქვამის გამო, არამედ თვითონ მოვუსმინეთ და ვიცით, რომ ჭეშარიტად ის არის სოფლის მხსნელი.”

⁴³ორი დღე რომ გავიდა, წამოვიდა იქიდან გალილეაში.

⁴⁴რადგან თავად იესო მოწმობდა, რომ წინასწარმეტყველს თავის სამშობლოში არა აქვს პატივი.

⁴⁵როცა გალილეაში მივიდა, გალილეველებმა მიიღეს იგი, რაკი ყველაფერი ნახეს, რაც მოიმოქმედა იერუსალიმში დღესასწაულზე, რადგან ისინიც ესწრებოდნენ დღესასწაულს.

⁴⁶ასე რომ, იესო კვლავ მივიდა გალილეის კანაში, სადაც წყალი ღვინოდ აქცია. და იყო იქ ერთი მეფის მოხელე, რომელსაც შვილი ჰყავდა ავად კაპერნაუმში.

⁴⁷როგორც კი გაიგო, იესო მოსულა იუდეიდან გალილეაშიო, მივიდა მასთან და შეევედრა, წაჰყოლოდა და განეკურნა მისი შვილი, რადგან სიკვდილის პირას იყო.

⁴⁸უთხრა იესომ მას: “არ ირწმუნებთ, თუკი ნიშნებსა და სასწაულებს არ იხილავთ.”

⁴⁹ეუბნება მას მეფის მოხელე: “უფალო, წამოდი, სანამ ჩემი ბავშვი არ მომკვდარა.”

⁵⁰ეუბნება მას იესო: “წადი, ცოცხალია შენი შვილი.” ირწმუნა კაცმა, რაც იესომ უთხრა მას, და წავიდა.

⁵¹შინ რომ ბრუნდებოდა, მისი მსახურები მიეგებნენ მას და უთხრეს, რომ ცოცხალია მისი ვაჟი.

⁵²ჰკითხა, თუ რომელ საათზე გამომჯობინდა. უთხრეს, რომ გუშინ მეშვიდე საათზე გაუარაო სიცხემ.

⁵³ამით მიხვდა მამა, რომ ეს ის საათი იყო, როცა იესომ უთხრა: “ცოცხალია შენი შვილი.” და ირწმუნა მან და მთელმა მისმა სახლმა.

⁵⁴ეს მეორე სასწაული მოახდინა იესომ მას შემდეგ, რაც იუდეიდან გალილეაში დაბრუნდა.