Read სბს–სტოკჰოლმი 2001 იოანეს სახარება 7 Bible Online

იოანეს სახარება 7 - სბს–სტოკჰოლმი 2001 bible

იოანეს სახარება 7

¹ამის შემდეგ იესო გალილეაში მიმოდიოდა, რადგან იუდეაში არ სურდა სიარული, რაკი იუდეველნი მოსაკლავად დაეძებდნენ.

²ახლოვდებოდა იუდეველთა დღესასწაული, კარვობა.

³უთხრეს მას მისმა ძმებმა: “წადი აქედან და მიდი იუდეაში, რათა შენმა მოწაფეებმაც იხილონ შენი საქმეები, რომელთაც აკეთებ,

⁴რადგან ფარულად არავინ არაფერს აკეთებს, არამედ თავის გამოჩენას ეძებს. რაკი ასეთ საქმეებს აკეთებ, გამოეცხადე სოფელს.”

⁵რადგან მის ძმებსაც კი არ სწამდათ მისი.

⁶ეუბნება მათ იესო: “ჩემი ჟამი ჯერ არ დამდგარა, თქვენი დრო კი მუდამ მოწეულია.

⁷სოფელს არ შეუძლია თქვენი შეძულება, მე კი ვძულვარ იმის გამო, რომ მე ვამოწმებ მასზე, რომ მისი საქმეები ბოროტია.

⁸თქვენ ადით დღესასწაულზე. მე კი არ ავალ ამ დღესასწაულზე, რადგან ჩემი ჟამი ჯერ არ აღსრულებულა.”

⁹ეს რომ უთხრა, დარჩა გალილეაში.

¹⁰მაგრამ როცა მისი ძმები დღესასწაულზე ავიდნენ, მაშინ თვითონაც ავიდა, მხოლოდ არა გაცხადებულად, არამედ ფარულად.

¹¹იუდეველნი კი ეძებდნენ მას დღესასწაულზე და ამბობდნენ, სად არისო?

¹²ხალხში ბევრი მითქმა-მოთქმა იყო მასზე: ერთნი ამბობდნენ, კეთილიაო. მეორენი ამბობდნენ, არა, ხალხს აცდუნებსო.

¹³ოღონდ ცხადად არავინ არ ლაპარაკობდა მასზე, რადგან იუდეველებისა ეშინოდათ.

¹⁴უკვე შუა დღესასწაულზე ავიდა იესო ტაძარში და ასწავლიდა.

¹⁵გაუკვირდათ იუდეველებს და თქვეს: როგორ იცის წერილები უსწავლელადო?

¹⁶მიუგო მათ იესომ და თქვა: “ჩემი მოძღვრება ჩემი არაა, არამედ მისია, ვინც მე მომავლინა.

¹⁷ვისაც სურს აღასრულოს მისი ნება, იგი გაიგებს ამ მოძღვრების შესახებ - ღვთისგანაა თუ ჩემით ვლაპარაკობ.

¹⁸ვინც თავისით ლაპარაკობს, საკუთარ დიდებას ეძებს. ხოლო ვინც ეძებს იმის დიდებას, ვინც იგი მოავლინა, ჭეშმარიტია და უსამართლობა არ არის მასში.

¹⁹განა მოსემ არ მოგცათ რჯული? მაგრამ არც ერთი თქვენგანი არ ასრულებს რჯულს. რატომ მეძებთ მოსაკლავად?”

²⁰მიუგო ხალხმა: “ეშმაკია შენში. ვინ გეძებს მოსაკლავად?”

²¹მიუგო იესომ და უთხრა მათ: “ერთი საქმე გავაკეთე და ყველას გიკვირთ.

²²მოსემ მოგცათ წინადაცვეთა, თუმცა იგი მოსესგან კი არა, მამებისგანაა - და შაბათობით წინადაცვეთთ ადამიანს.

²³თუ ადამიანი წინადაცვეთას მიიღებს შაბათს, რათა მოსეს რჯული არ დაირღვეს, მე რაღად მრისხავთ იმის გამო, რომ მთელი ხალხი განვკურნე შაბათს?

²⁴ნუ განიკითხავთ გარეგნობით, არამედ სამართლიანი განკითხვით განიკითხეთ.”

²⁵თქვეს ზოგიერთებმა იერუსალიმელთაგან: “ეს ის არაა, მოსაკლავად რომ ეძებენ?

²⁶აჰა, აშკარად ლაპარაკობს და ვერაფერს ეუბნებიან. ხომ არ დარწმუნდნენ მთავრები, რომ იგი ნამდვილად ქრისტეა?

²⁷მაგრამ ჩვენ ხომ ვიცით, საიდანაცაა იგი. ხოლო ქრისტე რომ მოვა, არავის ეცოდინება, საიდან არის.”

²⁸შესძახა იესომ ტაძარში სწავლებისას და თქვა: “მე მიცნობთ და იცით, საიდან ვარ. ჩემით არ მოვსულვარ. მაგრამ ჭეშმარიტია ჩემი მომავლინებელი, რომელსაც თქვენ არ იცნობთ.

²⁹მე ვიცნობ მას, რადგან მისგან ვარ და მან მომავლინა.”

³⁰ცდილობდნენ მის შეპყრობას, მაგრამ ხელი ვერავინ დაადო მას, რადგან მისი ჟამი არ დამდგარიყო.

³¹ხალხიდან ბევრი ერწმუნა მას და თქვეს: “როცა ქრისტე მოვა, განა იგი იმაზე მეტ სასწაულებს მოახდენს, რაც ამან მოახდინა?”

³²მოისმინეს ფარისევლებმა ხალხის ასეთი მითქმა-მოთქმა მასზე და მსახურები გაგზავნეს მის შესაპყრობად მღვდელმთავრებმა და ფარისევლებმა.

³³თქვა იესომ: “მე კიდევ მცირე ხანს ვარ თქვენთან და წავალ ჩემს მომავლინებელთან.

³⁴ძებნას დამიწყებთ და ვერ მიპოვით. სადაც მე ვიქნები, იქ ვერ მოხვალთ.”

³⁵უთხრეს ერთმანეთს იუდეველებმა: “სად უნდა წავიდეს, რომ ვერ ვიპოვოთ? ბერძნეთა შორის განთესილებთან ხომ არ წავა და ბერძნებს ხომ არ დაუწყებს სწავლას?

³⁶ეს რა სიტყვაა, რომელიც თქვა: ძებნას დამიწყებთ და ვერ მიპოვით, სადაც მე ვიქნები, იქ ვერ მოხვალთო?”

³⁷დღესასწაულის უკანასკნელ დიდ დღეს ადგა იესო, შესძახა და თქვა: “თუ ვინმეს სწყურია, ჩემთან მოვიდეს და შესვას.

³⁸ვისაც ჩემი სწამს, როგორც წერილი ამბობს, მისი წიაღიდან იდინებენ ცოცხალი წყლის მდინარეები.”

³⁹ეს მან იმ სულზე თქვა, მის მორწმუნეებს რომ უნდა მიეღოთ, რადგან ჯერ კიდევ არ იყო მოცემული სული, რაკი იესო ჯერ განდიდებული არ იყო.

⁴⁰ხალხიდან ბევრმა ამ სიტყვების გაგონებაზე თქვა: “ეს ჭეშმარიტად წინასწარმეტყველია.”

⁴¹სხვებმა თქვეს: “ეს ქრისტეა.” სხვები ამბობდნენ: “განა გალილეიდან მოვა ქრისტე?

⁴²განა წერილი არ ამბობს, რომ ქრისტე დავითის მოდგმიდან მოვა, ბეთლემიდან, იმ დაბიდან, საიდანაც დავითი იყო?”

⁴³და ჩამოვარდა ხალხში განხეთქილება მის გამო.

⁴⁴ზოგიერთ მათგანს მისი შეპყრობა უნდოდა, მაგრამ ხელი ვერავინ დააკარა.

⁴⁵მივიდნენ მსახურნი მღვდელმთავრებთან და ფარისევლებთან და მათ უთხრეს: “რატომ არ მოიყვანეთ იგი?”

⁴⁶მიუგეს მსახურებმა: “არასოდეს კაცს ისე არ ულაპარაკია, როგორც ეს კაცი ლაპარაკობს.”

⁴⁷მიუგეს მათ ფარისევლებმა: “ნუთუ თქვენც გაცდუნათ?

⁴⁸ნუთუ მთავართაგან ან ფარისეველთაგან ვინმემ იწამა იგი?

⁴⁹მაგრამ ეს ხალხი, რჯულის უმეცარი, დაწყევლილია.”

⁵⁰ეუბნება მათ ნიკოდემოსი, რომელიც ღამით მივიდა მასთან და ერთი იმათთაგანი იყო:

⁵¹“განა განიკითხავს ჩვენი რჯული ადამიანს, თუ წინასწარ არ მოუსმინა და არ გაიგო, რაც მან ჩაიდინა?”

⁵²მიუგეს და უთხრეს მას: “შენც გალილეიდან არა ხარ? გამოიკვლიე და ნახე, რომ გალილეიდან წინასწარმეტყველი არ აღდგება.”

⁵³ყველანი თავ-თავიანთ სახლებში წავიდნენ.