Read სბს–სტოკჰოლმი 2001 რომაელთა მიმართ 12 Bible Online

რომაელთა მიმართ 12 - სბს–სტოკჰოლმი 2001 bible

რომაელთა მიმართ 12

¹ამრიგად, შეგაგონებთ, ძმებო, ღვთის წყალობებით, რომ შესწიროთ თქვენი სხეული ცოცხალ, წმიდა, ღვთის სასურველ მსხვერპლად, რაც თქვენი სულიერი მსახურება იქნება.

²და ნუ მიესადაგებით ამ წუთისოფელს, არამედ შეიცვალენით თქვენი გონების განახლებით, რათა შეიცნოთ, რა არის ღვთის ნება - კეთილი, სასურველი და სრულყოფილი.

³ჩემთვის მოცემული მადლით ვეუბნები ყოველ თქვენგანს: თქვენს თავზე იმაზე მეტად ნუ იფიქრებთ, ვიდრე უნდა ფიქრობდეთ, არამედ იფიქრეთ საღად, იმ რწმენის კვალობაზე, რაც ღმერთმა გიწილადათ თითოეულს.

⁴ვინაიდან ჩვენ ერთ სხეულში მრავალი ასო გვაქვს, მაგრამ ყველა ასოს როდი აქვს ერთი და იგივე საქმე.

⁵ასევე ჩვენ, მრავალნი ერთ სხეულად ვართ ქრისტეში, ხოლო ერთიმეორისათვის - ასონი.

⁶და გვაქვს მადლით სხვადასხვა ნიჭი, ჩვენთვის მოცემული, თუ ქადაგებაა - რწმენის მიხედვით,

⁷თუ მსახურებაა - მსახურებაში, თუ მოძღვარია - დამოძღვრაში,

⁸თუ გამამხნევებელია - გამხნევებაში, გამნაწილებელია - უბრალოებაში, წინამდგომია - სიბეჯითეში და მწყალობელია - მხიარულებაში.

⁹სიყვარული წრფელი იყოს. გძაგდეთ ბოროტი და მიეკვროდეთ კეთილს.

¹⁰ძმათმოყვარეობაში - ერთმანეთისადმი გულთბილი სიყვარულით, პატივისცემაში ერთმანეთს დაასწარით.

¹¹იბეჯითეთ და ნუ დაიღლებით. სულით აღეგზნეთ. ემსახურეთ უფალს.

¹²იხარეთ იმედში, მომთმენნი იყავით გასაჭირში, ლოცვაში - ურყევნი.

¹³მონაწილეობა მიიღეთ წმიდათა საჭიროებაში, ესწრაფეთ სტუმართმოყვარეობას.

¹⁴ლოცეთ თქვენი მდევნელები, ლოცეთ და ნუ წყევლით.

¹⁵მოხარულებთან იხარეთ და მოტირალებთან იტირეთ.

¹⁶ერთსულოვანნი იყავით ერთმანეთში. ქედმაღლური ფიქრები ნუ გექნებათ, არამედ მორჩილებს მისდიეთ, ბრძენი ნუ გეგონებათ საკუთარი თავი.

¹⁷ნურავის მიაგებთ ბოროტის წილ ბოროტს. ცდილობდეთ კეთილს ყველა ადამიანის წინაშე.

¹⁸თუ თქვენის მხრივ შესაძლებელია, ყველა ადამიანთან მშვიდობიანად იყავით.

¹⁹შურს ნუ იძიებთ თქვენთვის, საყვარელნო, არამედ ადგილი მიეცით უფლის რისხვას, ვინაიდან სწერია: “ჩემია შურისგება და მე მივაგებ, - ამბობს უფალი.”

²⁰ამიტომ, თუ შენი მტერი მშიერია, დააპურე იგი; თუ სწყურია, დაალევინე. ვინაიდან ამის გაკეთებით ნაკვერცხლებს აგროვებ მის თავზე.

²¹არ დაგძლიოს ბოროტმა, არამედ სძლიე ბოროტს კეთილით.