Read სბს–სტოკჰოლმი 2001 2 კორინთელთა მიმართ 6 Bible Online

2 კორინთელთა მიმართ 6 - სბს–სტოკჰოლმი 2001 bible

2 კორინთელთა მიმართ 6

¹და ჩვენ, როგორც თანამშრომელნი, შეგაგონებთ, რომ ფუჭად არ მიიღოთ ღვთის მადლი.

²ვინაიდან ის ამბობს: `მოწყალების ჟამს შეგიწყნარე და ხსნის დღეს შეგეწიე.~ აჰა, ახლაა მოწყალების ჟამი, აჰა, ახლაა ხსნის დღე.

³ჩვენ არაფერში არ ვიძლევით დაბრკოლების საბაბს, რათა მსახურება არ შეიბღალოს,

⁴არამედ ყველაფერში წარმოვდგებით, როგორც ღვთის მსახურნი: დიდ მოთმინებაში, მწუხარებაში, გაჭირვებაში, შევიწროებაში,

⁵ცემაში, საპყრობილეებში, შფოთში, უძილობაში, მარხვაში,

⁶სიწმიდეში, ცოდნაში, სახიერებაში, სულიწმიდაში და უანგარო სიყვარულში,

⁷ჭეშმარიტების სიტყვაში, ღმერთის ძალაში, მარჯვენისა და მარცხენის სიმართლის იარაღით,

⁸დიდებასა და სირცხვილში, გმობით და ქებით, ვითომც მაცდურნი, მაინც ჭეშმარიტნი;

⁹როგორც უცნობნი, მაგრამ ცნობილნი, როგორც მომაკვდავნი, და აჰა, ვცოცხლობთ! როგორც დასჯილნი, მაგრამ არ ვკვდებით;

¹⁰როგორც მწუხარენი, მაგრამ მუდამ მოხარულნი; როგორც ღატაკნი, მაგრამ მრავალთა გამამდიდრებელნი, როგორც უქონელნი, მაგრამ ყველაფრის მქონებელნი.

¹¹ჩვენი ბაგე გახსნილია თქვენს მიმართ, კორინთელნო, და გაშლილია ჩვენი გული.

¹²თქვენ ვიწროთ არა ხართ ჩვენში, არამედ თქვენშივეა სივიწროვე.

¹³ხოლო ამაზე სამაგიეროდ გეუბნებით, როგორც შვილებს: იყავით თქვენც გაშლილნი.

¹⁴ნუ შეებმებით უცხო უღელში ურწმუნოებთან ერთად. რადგან რა მონაწილეობა აქვს სიმართლეს ურჯულოებასთან? რა აქვს საზიარო ნათელს ბნელთან?

¹⁵რა თანხმობა აქვს ქრისტეს ბელიართან? ან რა წილი აქვს მორწმუნეს ურწმუნოსთან?

¹⁶რა კავშირი აქვს ღვთის ტაძარს კერპებთან? რადგან თქვენ ხართ ცოცხალი ღვთის ტაძარი, როგორც ღმერთმა თქვა: `დავმკვიდრდები და ვივლი მათ შორის, ვიქნები მათი ღმერთი და ისინი იქნებიან ჩემი ხალხი.

¹⁷ამიტომ გამოდით მათგან და გამოეყავით!~ - ამბობს უფალი. `უწმიდურს ნუ მიეკარებით და მე მიგიღებთ თქვენ.

¹⁸ვიქნები თქვენთვის მამა და თქვენ იქნებით ჩემთვის ძენი და ასულნი~, ამბობს უფალი ყოვლისმპყრობელი.