Read სბს–სტოკჰოლმი 2001 1 თესალონიკელთა მიმართ 5 Bible Online

1 თესალონიკელთა მიმართ 5 - სბს–სტოკჰოლმი 2001 bible

1 თესალონიკელთა მიმართ 5

¹ჟამზე და ვადებზე საჭირო არ არის რამე მოგწეროთ, ძმებო,

²რადგან თქვენ თვითონაც ზუსტად იცით, რომ უფლის დღე ღამის ქურდივით მოვა.

³ვინაიდან, როცა იტყვიან: მშვიდობა და უსაფრთხოებაო, მაშინ მოულოდნელად დაატყდებათ თავს განადგურება, როგორც ფეხმძიმეს მშობიარობის ტკივილები, და ვერ დააღწევენ თავს.

⁴მაგრამ, თქვენ, ძმებო, ბნელში არ იმყოფებით, რომ დღე მპარავივით წამოგეწიოთ.

⁵ვინაიდან თქვენ ყველანი ნათლის შვილები ხართ და დღის შვილები. არც ღამისანი ვართ ჩვენ და არც ბნელისანი.

⁶ამიტომ ნუ დავიძინებთ, როგორც სხვები, არამედ გვეღვიძოს და ვიფხიზლოთ.

⁷ვინაიდან მძინარეებს ღამღამობით სძინავთ და ლოთები ღამით თვრებიან.

⁸მაგრამ ჩვენ, რაკი დღის შვილები ვართ, ვიფხიზლოთ და შევიმოსოთ რწმენისა და სიყვარულის აბჯარი და ხსნის სასოების მუზარადი.

⁹რადგან ღმერთმა დაგვადგინა არა შესარისხად, არამედ ხსნის მისაღებად ჩვენი უფლის იესო ქრისტეს მეშვეობით,

¹⁰რომელიც ჩვენთვის მოკვდა, რათა ჩვენ, ვფხიზლობთ თუ გვძინავს, მასთან ერთად ვიცოცხლოთ.

¹¹ამიტომ შეაგონეთ ერთმანეთს და აღაშენეთ ერთმანეთი, როგორც იქცევით კიდეც.

¹²გთხოვთ, ძმებო, სცანით თქვენს შორის მშრომელნი და თქვენი წინამძღოლნი უფალში და თქვენი დამრიგებელნი.

¹³უაღრესი სიყვარული გამოიჩინეთ მათდამი მათი საქმის გამო. იყავით მშვიდობიანად ერთმანეთში.

¹⁴და აჰა, შეგაგონებთ თქვენ, ძმანო, დაარიგეთ უწესონი, ანუგეშეთ სულმოკლენი, მხარი დაუჭირეთ უძლურთ და სულგრძელნი იყავით ყველას მიმართ.

¹⁵თვალი გეჭიროთ, არ მიაგო ერთმანეთს ბოროტის წილ ბოროტი, არამედ მუდამ ცდილობდეთ სიკეთე უყოთ ერთმანეთს და ყველას.

¹⁶მუდამ ხარობდეთ;

¹⁷ილოცეთ განუწყვეტლივ;

¹⁸მადლიერნი იყავით ყველაფრისათვის, ვინაიდან ეს არის თქვენს მიმართ ღვთის ნება ქრისტე იესოში;

¹⁹სულს ნუ ჩააქრობთ;

²⁰წინასწარმეტყველებას ნუ გააბიაბურებთ;

²¹ყველაფერი გამოსცადეთ, კეთილს ჩაეჭიდეთ;

²²ერიდეთ ყოველგვარ ბოროტებას.

²³თავად მშვიდობის ღმერთმა წმიდა გყოთ სრულად და მთლიანად: სული, სამშვინველი და სხეული დაცულ იქნეს უმწიკვლოდ ჩვენი უფლის იესო ქრისტეს მოსვლისათვის.

²⁴სარწმუნოა თქვენი მხმობელი, რომელიც აღასრულებს კიდეც.

²⁵ძმებო, ილოცეთ ჩვენთვის.

²⁶მოიკითხეთ ყველა ძმა წმიდა ამბორით.

²⁷გაფიცებთ უფალს, წაუკითხეთ ეს წერილი ყველა ძმას.

²⁸ჩვენი უფლის იესო ქრისტეს მადლი იყოს თქვენთან. ამინ.