Read სბს–სტოკჰოლმი 2001 იესო ნავეს ძე 16 Bible Online

იესო ნავეს ძე 16 - სბს–სტოკჰოლმი 2001 bible

იესო ნავეს ძე 16

¹წილად ხვდათ იოსების ძეთ: იორდანედან იერიხოს მახლობლად, იერიხოს წყლებთან, აღმოსავლეთით, უდაბნო, რომელიც გადადის იერიხოდან ბეთელის მთისკენ.

²და ბეთელიდან გადიოდა ლუზისკენ და გადადიოდა არქის საზღვრისაკენ ყატაროთამდე.

³და ეშვებოდა ზღვისაკენ, იაფლეტის მიჯნამდე, ქვემო ბეთ-ხორონის მიჯნამდე და გეზერამდე, და წყდებოდა ზღვასთან.

⁴და ეს დაიმკვიდრეს იოსების ძეთ: მენაშემ და ეფრემმა.

⁵და ჰქონდათ მიწა-წყალი ეფრემის ძეთ თავიანთი საგვარეულოების მიხედვით: აღმოსავლეთით - ყატაროთ-ადარიდან ვიდრე ზემო ბეთ-ხორონამდე,

⁶და გადიოდა საზღვარი ზღვისკენ მიქმეთათის ჩრდილოეთიდან და უხვევდა საზღვარი თაანათ-შილოს აღმოსავლეთით, და გადიოდა მის აღმოსავლეთით იანოახამდე,

⁷და ეშვებოდა იანოახადან ყატაროთისა და ნაყარათისაკენ, სწვდებოდა იერიხოს და გადიოდა იორდანესაკენ.

⁸თაფუახიდან მიიწევდა საზღვარი ზღვისკენ, ნახალ-კანასაკენ, და გადიოდა ზღვისაკენ. ეს იყო სამკვიდრო ეფრემის ძეთა ტომისა მათი საგვარეულოების მიხედვით.

⁹ეფრემის ძეთათვის გამოყოფილი იყო ქალაქები მენაშეანთა შუა სამკვიდროში, ყველა ქალაქი თავისი სოფლებით,

¹⁰და არ განუდევნიათ მათ გეზერში მცხოვრები ქანაანელნი. და ცხოვრობენ ქანაანელნი ეფრემის შორის დღევანდლამდე და ხარკს იხდიან, და არიან მოხარკედ.