Read სბს–სტოკჰოლმი 2001 იესო ნავეს ძე 20 Bible Online

იესო ნავეს ძე 20 - სბს–სტოკჰოლმი 2001 bible

იესო ნავეს ძე 20

¹და უთხრა უფალმა იესოს:

²“ელაპარაკე ისრაელის ძეთ და უთხარი: ‘დაიდგინეთ თქვენთვის თავშესაფარი ქალაქები, რაზეც გელაპარაკეთ მოსეს ხელით,

³რათა გაიქცეს იქ მკვლელი, რომელსაც უნებლიეთ შემოაკვდება კაცი. და გქონდეთ თქვენ მესისხლესგან თავშესაფრად.

⁴და ვინც გაიქცევა ერთ-ერთ ამ ქალაქში, დადგეს ქალაქის კარიბჭის შესავალთან, და იმ ქალაქის უხუცესთა გასაგონად განაცხადოს თავისი საქმენი. და შეიფარებენ მას ქალაქში, და მისცემენ მას ადგილს, და იცხოვრებს მათთან.

⁵და თუ დაედევნება მას მესისხლე, ხელში არ ჩაუგდონ მას მკვლელი, რადგან უნებლიეთ შემოაკვდა თავისი მოყვასი და არ სძულებია იგი მას არც გუშინ, არც გუშინწინ.

⁶იცხოვროს მან ამ ქალაქში, ვიდრე არ წარდგება თემის წინაშე განსაკითხავად, ვიდრე არ მოკვდება მღვდელმთავარი, რომელიც იმ დღეებში იქნება. და მხოლოდ მაშინ დაბრუნდება მკვლელი და მივა თავის ქალაქში და თავის სახლში, იმ ქალაქში, საიდანაც ის გაიქცა.”

⁷და გამოყვეს კედეში გალილეაში, ნაფთალის მთაში, შექემი ეფრემის მთაზე და კირიათ-არბაყი, იგივე ხებრონი, იუდას მთაში.

⁸და იორდანეს გაღმა იერიხოსკენ, აღმოსავლეთით გამოყვეს: ბეცერი უდაბნოში, ტაფობზე, რეუბენის ტომიდან, და რამოთი გილყადში გადის ტომიდან და გოლანი ბაშანში მენაშეს ტომიდან.

⁹ეს ქალაქები იყო განკუთვნილი ყველა ისრაელიანისთვის, ხიზნისათვის, ვინც მათთან არის შეხიზნული, რათა თავი შეაფაროს იქ ყველა უნებლიე მკვლელმა და არ მოკვდეს მესისხლის ხელით, ვიდრე თემს წარუდგებოდეს.