Read სბს–სტოკჰოლმი 2001 იესო ნავეს ძე 24 Bible Online

იესო ნავეს ძე 24 - სბს–სტოკჰოლმი 2001 bible

იესო ნავეს ძე 24

¹და შეჰყარა იესომ ისრაელის ყველა ტომი შექემში, და მოუხმო ისრაელის უხუცესებს, და მის ერისთავებს, და მის მსაჯულებსა და მის ზედამდგომებს, და ისინი წარდგნენ ღვთის წინაშე.

²და უთხრა იესომ მთელ ხალხს: “ასე თქვა უფალმა, ისრაელის ღმერთმა: ‘დასაბამიდან მდინარის გაღმა ცხოვრობდნენ თქვენი მამანი: თერახი, მამა აბრაამისა და მამა ნახორისა, და ემსახურებოდა სხვა ღმერთებს.

³და წამოვიყვანე მამათქვენი აბრაამი მდინარის გაღმიდან და მოვატარე მთელი ქანაანის ქვეყანა, და გავამრავლე მისი თესლი, და მივეცი მას ისაკი.

⁴და ისაკს მივეცი იაკობი და ესავი. და მივეცი ესავს მთა სეყირისა დასამკვიდრებლად, ხოლო იაკობი და მისი ძეები ეგვიპტეში ჩავიდნენ.

⁵და გავგზავნე მოსე და აარონი, და ვგვემე ეგვიპტე იმით, რაც მოვიმოქმედე მის შუაგულში, და მერე გამოგიყვანეთ თქვენ.

⁶და გამოვიყვანე თქვენი მამები ეგვიპტიდან, და მოადექით ზღვას, და გამოედევნენ ეგვიპტელნი უკან თქვენს მამებს ეტლებითა და მხედრებით მეწამულ ზღვამდე.

⁷და შეჰღაღადეს უფალს, და მანაც მოავლინა წყვდიადი თქვენსა და ეგვიპტელებს შორის, და მოაქცია მათზე ზღვა, რომელმაც დაფარა ისინი. და იხილეს თქვენმა თვალებმა, რაც მოვიმოქმედე მე ეგვიპტეში. და უდაბნოში ცხოვრობდით მრავალი დღე.

⁸და მოგიყვანეთ თქვენ ამორეველთა ქვეყანაში, იორდანეს გაღმა რომ ცხოვრობდნენ. ბრძოლა გაგიმართეს, მაგრამ ხელში ჩაგაგდებინეთ ისინი. და დაიმკვიდრეთ თქვენ მათი ქვეყანა, და მე მოვსპე ისინი თქვენი პირისაგან.

⁹და ადგა ბალაკ ციფორის ძე, მოაბის მეფე, და შეებრძოლა ისრაელს, და მიავლინა და მოუხმო ბალაამ ბეყორის ძეს თქვენს დასაწყევლად.

¹⁰და არ ვინებე ბალაამის მოსმენა. და მან კურთხევით გაკურთხათ, და გიხსენით თქვენ მისი ხელისაგან.

¹¹და გადალახეთ იორდანე და მიხვედით იერიხოს. და ბრძოლა გაგიმართეს თქვენ იერიხოს პატრონებმა: ამორევლებმა, ფერიზელებმა, ქანაანელებმა, ხეთელებმა, გირგაშელებმა, ხიველებმა და იებუსელებმა, და ხელში ჩაგიგდე ისინი.

¹²და კრაზანები გამოვუშვი თქვენს წინ, და მათ განდევნეს თქვენი პირისაგან ორი ამორეველი მეფე - არა შენი მახვილით და არა შენი მშვილდით.

¹³და მოგეცით თქვენ ქვეყანა, რომელზეც არ გიშრომიათ, და ქალაქები, რომლებიც თქვენ არ გიშენებიათ, და თქვენ ცხოვრობთ მათში. და საზრდოობთ ვენახებიდან და ზეთისხილის ბაღებიდან, რომლებიც თქვენ არ გაგიშენებიათ.’

¹⁴ახლა გეშინოდეთ უფლისა და ემსახურეთ მას წრფელად და ერთგულად; და განიშორეთ ღმერთები, რომელთაც ემსახურებოდნენ თქვენი მამები მდინარის გაღმა და ეგვიპტეში, და ემსახურეთ უფალს.

¹⁵და თუ ავად მიგაჩნიათ თქვენს თვალში უფლის მსახურება, აირჩიეთ დღეს, ვის ემსახუროთ: ღმერთებს, ვისაც თქვენი მამები ემსახურებოდნენ მდინარის გაღმა, თუ ამორეველთა ღმერთებს, რომელთა ქვეყანაშიც თქვენ ცხოვრობთ. მე და ჩემი სახლი კი უფალს ვემსახურებით.”

¹⁶და მიუგო ხალხმა, და თქვა: “ღმერთმა დაგვიფაროს, რომ უფალი მივატოვოთ და სხვა ღმერთებს ვემსახუროთ!

¹⁷რადგან უფალი, ჩვენი ღმერთია, მან გამოგვიყვანა ჩვენ და ჩვენი მამები ეგვიპტის ქვეყნიდან, მონობის სახლიდან, და ჩვენს თვალწინ მოიმოქმედა დიდი სასწაულები, და გვიცავდა მთელ გზაზე, რომელზეც დავდიოდით, და ყველა ხალხში, რომელთა შორისაც ჩვენ გავიარეთ.

¹⁸და განდევნა უფალმა ჩვენგან ყველა ხალხი და ამორეველებიც, ამ ქვეყნის მკვიდრნი. ჩვენც ვემსახურებით უფალს, რადგან ის არის ჩვენი ღმერთი.”

¹⁹და უთხრა იესომ ხალხს: “ვერ შეძლებთ უფლის მსახურებას, რადგან წმიდა ღმერთია იგი, შურისმგებელი ღმერთია იგი, არ გაპატიებთ თქვენს დანაშაულსა და ცოდვებს.

²⁰თუ მიატოვებთ უფალს და ემსახურებით უცხო ღმერთებს, კვლავ ბოროტებას დაგათევთ და მოგსპობთ თქვენ მას შემდეგ, რაც სიკეთე გიყოთ.”

²¹და უთხრა ხალხმა იესოს: “არა, რადგან უფალს უნდა ვემსახუროთ!”

²²და უთხრა იესომ ხალხს: “მოწმენი ხართ თქვენი თავისა, რომ თქვენ თვითონ ირჩევთ უფალს, რათა ემსახუროთ მას?” და თქვეს: “მოწმენი ვართ!”

²³“ახლა განიშორეთ უცხო ღმერთები, თქვენს შორის რომ არიან, და მიაბრუნეთ თქვენი გული უფლის, ისრაელის ღმერთის, მიმართ.”

²⁴და უთხრა ხალხმა იესოს: “უფალს, ჩვენს ღმერთს ვემსახურებით და ყურს დავუგდებთ მის ხმას.”

²⁵და იმ დღეს დადო იესომ აღთქმა, და წესი და სამართალი მისცა მათ შექემში.

²⁶და ჩაწერა იესომ ეს სიტყვები ღვთის რჯულის წიგნში, და აიღო დიდი ქვა და აღმართა იქ, მუხის ქვეშ, უფლის საწმიდართან რომ იდგა.

²⁷და უთხრა იესომ მთელ ხალხს: “აჰა, ეს ქვა იყოს ჩვენს მოწმედ, რადგან მან მოისმინა უფლის ყველა სიტყვა, რომელიც მან გვითხრა ჩვენ; და იყოს ის თქვენს მოწმედ, რომ არ იცრუოთ თქვენი ღმერთის წინაშე.”

²⁸და გაისტუმრა იესომ ხალხი, თითოეული თავის სამკვიდროში.

²⁹და ამ ამის შემდეგ მოკვდა იესო, ნავეს ძე, უფლის მსახური, ას ათი წლისა.

³⁰და დამარხეს იგი მის სამკვიდრო მიწაზე, თიმნათ-სერახში, ეფრემის მთაზე რომ არის, გაყაშის მთის ჩრდილოეთით.

³¹და ემსახურებოდა ისრაელი უფალს იესოს მთელს დღეებში და უხუცესთა მთელს დღეებში, რომელნიც ცხოვრობდნენ იესოს მერეც და რომელთაც იხილეს უფლის ყოველი საქმე, რაც ისრაელისთვის მოიმოქმედა.

³²და იოსების ძვლები, ისრაელის ძეებმა რომ ამოიტანეს ეგვიპტიდან, დაკრძალეს შექემში, იმ მინდვრის ნაკვეთზე, რომელიც ნაყიდი ჰქონდა იაკობს შექემის მამის, ხამორის ძეთაგან, ას კესიტად, და ერგო იოსების ძეთ სამკვიდროდ.

³³და მოკვდა ელეაზარი, აარონის ძე, და დამარხეს იგი მისი ძის, ფინხასის ბორცვზე, რომელიც მიეცა მას ეფრემის მთაში