Read სბს–სტოკჰოლმი 2001 იესო ნავეს ძე 3 Bible Online

იესო ნავეს ძე 3 - სბს–სტოკჰოლმი 2001 bible

იესო ნავეს ძე 3

¹და ადგა იესო დილაადრიან, და აიყარნენ შიტიმიდან და მივიდნენ იორდანესთან ის და ყველა ისრაელის ძე, და გაათიეს იქ, ვიდრე გაღმა გავიდოდნენ.

²და სამი დღის შემდეგ გაიარეს ზედამდგომებმა შუა ბანაკში,

³და უბრძანეს ხალხს ასე: “როდესაც იხილავთ უფლის, თქვენი ღმერთის, აღთქმის კიდობანს და ლევიან მღვდლებს, მის მტარებლებს, მაშინ თქვენც აიყარენით თქვენი ადგილიდან და მიჰყევით უკან.

⁴ოღონდ მანძილი იყოს თქვენსა და მას შორის ორი ათას წყრთამდე საზომით, ნუ მიუახლოვდებით მას, რათა იცოდეთ გზა, რომლითაც უნდა იაროთ, რადგან არ გივლიათ ამ გზით არც გუშინ, არც გუშინწინ.”

⁵და უთხრა იესომ ხალხს: “განიწმიდენით, რადგან ხვალ უფალი მოიმოქმედებს თქვენს შორის სასწაულებს.”

⁶და უთხრა იესომ მღვდლებს ასე: “აიღეთ აღთქმის კიდობანი და ამ ხალხის წინ იარეთ.” და აიღეს აღთქმის კიდობანი და წავიდნენ ხალხის წინ.

⁷და უთხრა უფალმა იესოს: “ამ დღეს დავიწყებ შენს განდიდებას მთელი ისრაელის თვალწინ, რათა იცოდნენ, რომ, როგორც მოსესთან ვიყავი, შენთანაც ეგრე ვიქნები.

⁸და შენ უბრძანე მღვდლებს, აღთქმის კიდობნის მტარებელთ, ასე: ‘როგორც კი იორდანეს წყლის ნაპირს მიადგებით, შეჩერდით.’”

⁹და უთხრა იესომ ისრაელის ძეთ: “მოდით აქ და მოისმინეთ უფლის, თქვენი ღმერთის, სიტყვები.”

¹⁰და თქვა იესომ: “ამით გაიგებთ, რომ ცოცხალი ღმერთია თქვენს შორის და ის განდევნის თქვენი პირისაგან ქანაანელებს, ხეთელებს, ხიველებს, ფერიზელებს და გირგაშელებს, ამორეველებსა და იებუსელებს.

¹¹და აჰა, მთელი ქვეყნის უფლის აღთქმის კიდობანი გადალახავს თქვენს წინაშე იორდანეს.

¹²და ახლა ამოირჩიეთ თორმეტი კაცი ისრაელის ტომთაგან, თითო-თითო კაცი ტომიდან.

¹³როდესაც მთელი ქვეყნის უფლის აღთქმის კიდობნის მტარებლების, მღვდლების, ფეხის ტერფები ჩაიდგმება იორდანეს წყლებში, მაშინ გაიპობა იორდანეს წყლები, ზემოდან მომდინარე და ერთ კედლად შედგება.”

¹⁴და აიყარა ხალხი თავისი კარვებიდან იორდანეს გადასალახავად, და აღთქმის კიდობნის მტარებელი მღვდლები გაუძღვნენ ხალხს წინ.

¹⁵და როგორც კი კიდობნის მტარებლები იორდანეს მიადგნენ და კიდობნის მტარებელი მღვდლების ფეხები ჩაიდგა წყლის ნაპირზე - ხოლო იორდანე მკათათვეში თავის ნაპირებზე გადმოდის,-

¹⁶შეჩერდა ზემოდან მომდინარე წყლები და ერთ კედლად აღიმართა, კარგა შორს ქალაქ ადამადან, რომელიც ცართანის გვერდითაა; და ყარაბას ზღვისაკენ, მარილოვანი ზღვისაკენ, მიმდინარე წყლები სრულიად გაიპო, და ხალხი იერიხოს პირდაპირ გადავიდა.

¹⁷და იდგნენ მღვდლები, მტარებელნი უფლის აღთქმის კიდობნისა, მშრალზე, შუაგულ იორდანეში მყარად. და მთელი ისრაელი გადადიოდა მშრალზე, ვიდრე არ დაასრულა მთელმა ერმა იორდანეს გადალახვა.