Read სბს–სტოკჰოლმი 2001 იესო ნავეს ძე 4 Bible Online

იესო ნავეს ძე 4 - სბს–სტოკჰოლმი 2001 bible

იესო ნავეს ძე 4

¹და როცა დაასრულა მთელმა ერმა იორდანეს გადალახვა, უბრძანა უფალმა იესოს:

²“ამოირჩიე ხალხიდან თორმეტი კაცი, თითო კაცი თითო ტომიდან,

³და უბრძანე მათ ასე: ‘აიღეთ აქედან, შუაგულ იორდანედან, სადაც მყარად იდგა მღვდლების ფეხები, თორმეტი ქვა, და თან წაიღეთ ისინი, და დადეთ ისინი სათევში, სადაც გაათევთ ამ ღამეს.’”

⁴და მოუხმო იესომ თორმეტ კაცს, რომელნიც განაწესა ისრაელის ძეთაგან, თითო კაცს თითო ტომიდან;

⁵და უთხრა მათ იესომ: “გაიარეთ უფლის, თქვენი ღმერთის, კიდობნის წინაშე, შუაგულ იორდანეში, და ზურგზე აიკიდოს თითოეულმა თქვენგანმა თითო ქვა, ისრაელის ძეთა ტომების რიცხვისამებრ,

⁶რათა ეს იყოს ნიშანი თქვენს შორის. როცა გკითხავენ თქვენი ძეები: ‘ეს რა ქვები გაქვთ?’

⁷უთხარით მათ: ‘იორდანეს წყლები რომ გაიპო უფლის აღთქმის კიდობნის წინაშე; იორდანეზე მისი გადასვლისას გაიპო იორდანეს წყლები! და იქნება ეს ქვები სახსოვრად ისრაელის ძეთათვის უკუნისამდე.’”

⁸და ასე მოიქცნენ ისრაელის ძენი, როგორც იესომ უბრძანა, და აიღეს თორმეტი ქვა შუაგულ იორდანედან, როგორც უთხრა უფალმა იესოს, ისრაელის ძეთა ტომთა რიცხვისამებრ, და გადაიტანეს ისინი თავიანთ სათევარში და დააწყვეს ისინი იქ.

⁹და თორმეტი [სხვა] ქვა აღმართა იესომ შუა იორდანეში, იმ ადგილას, სადაც ფეხები ედგათ მღვდლებს, აღთქმის კიდობნის მტარებლებს, და იქ აწყვია დღემდე.

¹⁰კიდობნის მტარებელი მღვდლები იდგნენ შუაგულ იორდანეში, ვიდრე არ შესრულდა ყველა სიტყვა, რომელიც უბრძანა უფალმა იესოს ხალხისათვის სათქმელად, რაც უბრძანა მოსემ იესოს; და ამასობაში გამალებული გადადიოდა.

¹¹და როცა დაასრულა მთელმა ხალხმა იორდანეს გადალახვა, აღთქმის კიდობანმა და მღვდლებმაც გადალახეს ხალხის წინაშე.

¹²და გადალახეს რეუბენის ძეთ და გადის ძეთ, და მენაშეს ნახევარმა ტომმა - იარაღასხმულებმა, ისრაელის ძეთა წინ, როგორც უთხრა მათ მოსემ.

¹³ორმოცი ათასამდე მოწინავე ჯარმა გადალახა უფლის წინ იერიხოს ველებზე საბრძოლველად.

¹⁴იმ დღეს განადიდა უფალმა იესო მთელი ისრაელის თვალწინ და ეშინოდათ მისი, როგორც ეშინოდათ მოსესი, მთელი მისი სიცოცხლის მანძილზე.

¹⁵და უთხრა უფალმა იესოს ასე:

¹⁶“უბრძანე მღვდლებს, აღთქმის კიდობნის მტარებლებს, ამოვიდნენ იორდანედან.”

¹⁷და უბრძანა იესომ მღვდლებს: “ამოდით იორდანედან.”

¹⁸და როგორც კი ამოვიდნენ მღვდლები, უფლის აღთქმის კიდობნის მტარებელნი, შუაგულ იორდანედან, და როგორც კი მღვდლების ფერხთა ტერფებმა გადაინაცვლეს ხმელეთზე, დაბრუნდა იორდანეს წყალი თავის ადგილზე და იწყო დინება, როგორც უწინ, თავის მთელ სანაპიროზე.

¹⁹და ამოვიდა ხალხი იორდანედან პირველი თვის მეათე დღეს, და დაბანაკდა გილგალში, იერიხოს აღმოსავლეთ მხარეს.

²⁰და თორმეტი ქვა, რომელიც აიღეს იორდანედან, აღმართა იესომ გილგალში.

²¹და უთხრა ისრაელის ძეთ: “როცა შეეკითხებიან შენი ძეები მომავალში თავიანთ მამებს: ‘ეს რა ქვებიაო?’

²²მაშინ ასწავლეთ თქვენს ძეებს ასე: ‘მშრალზე გადალახა ისრაელმა იორდანე’;

²³რადგან დააშრო უფალმა, თქვენმა ღმერთმა, იორდანეს წყლები თქვენს წინაშე, ვიდრე გადალახავდით მას, როგორც უყო უფალმა, თქვენმა ღმერთმა, მეწამულ ზღვას, რომელიც დააშრო ჩვენს წინაშე, ვიდრე არ გადავლახეთ,

²⁴რათა შეეცნო ქვეყნის ყოველ ხალხს ხელი უფლისა, რადგან ის ძლიერია, რათა გეშინოდეთ თქვენ დღენიადაგ უფლისა, თქვენი ღმერთისა.”