Read სბს–სტოკჰოლმი 2001 იესო ნავეს ძე 8 Bible Online

იესო ნავეს ძე 8 - სბს–სტოკჰოლმი 2001 bible

იესო ნავეს ძე 8

¹და უთხრა უფალმა იესოს: “ნუ გეშინია და ნურც შეძრწუნდები. თან წაიყვანე მთელი ბრძოლისუნარიანი ხალხი, ადექი და დაეცი ჰაღაის. ხელში ჩაგიგდებ ჰაღაის მეფეს და მის ხალხს, მის ქალაქსა და მის ქვეყანას.

²და მოექეცი ჰაღაის და მის მეფეს, როგორც მოექეცი იერიხოს და მის მეფეს, მხოლოდ ნადავლი მისი და პირუტყვი მისი დაიტაცეთ თქვენთვის. და ჩასაფრდი ქალაქთან, მის უკან.”

³და ადგა იესო და მთელი ბრძოლისუნარიანი ხალხი ჰაღაიზე გასასვლელად. და ამოირჩია იესომ ოცდაათი ათასი მამაცი მოლაშქრე და გაგზავნა ისინი ღამით.

⁴და უბრძანა მათ: “აბა, მოაწყვეთ საფარი ქალაქთან, ქალაქის უკან. ძალიან შორს არ გასცდეთ ქალაქს და ყველანი მზად იყავით.

⁵და მე და მთელი ხალხი, რომელიც ჩემთანაა, მივადგებით ქალაქს. და როდესაც გამოვლენ ჩვენს დასახვედრად, როგორც პირველად, მაშინ გავექცევით მათ.

⁶ისინი გამოგვყვებიან უკან, ვიდრე ქალაქს არ მოვწყვეტთ მათ, რადგან იტყვიან: ‘გარბიან ჩვენგან, როგორც პირველად.’ და გავექცევით მათ.

⁷ადექით თქვენი საფარიდან და დაეუფლეთ ქალაქს. და ხელში ჩაგიგდებთ მას უფალი, თქვენი ღმერთი.

⁸და როცა აიღებთ ქალაქს, წაუკიდეთ ცეცხლი ქალაქს, მოიქეცით უფლის სიტყვისამებრ. აბა, მე გიბრძანებთ თქვენ.”

⁹და გაგზავნა ისინი იესომ, და წავიდნენ საფარში, და ჩასხდნენ ბეთელსა და ჰაღაის შორის, ჰაღაის დასავლეთით. და გაათია იესომ ის ღამე ხალხს შორის.

¹⁰და ადგა იესო დილაადრიანად, და დაათვალიერა ხალხი, და ისრაელის უხუცესებთან ერთად ხალხს ჰაღაისკენ წაუძღვა.

¹¹და მთელი ბრძოლისუნარიანი ხალხი, რომელიც მასთან იყო, წავიდა, მიუახლოვდნენ და გაუსწორდნენ ქალაქს, და დაიბანაკეს ჰაღაის ჩრდილოეთით. და იყო ველი ჰაღაისა და მას შორის.

¹²და შემდეგ გამოიყვანა ხუთი ათასამდე კაცი, და ჩაასაფრა ისინი საფარში ბეთელსა და ჰაღაის შორის, ქალაქის დასავლეთით.

¹³და მოაწყო ხალხმა მთელი ბანაკი, ქალაქის ჩრდილოეთით რომ იყო, და ჩასაფრებული რაზმი ქალაქის დასავლეთით იყო. და გავიდა იესო იმ ღამეს შუაგულ ველზე.

¹⁴და იყო, როგორც კი დაინახა ეს ჰაღაის მეფემ, ქალაქის მამაკაცებმა ისწრაფეს და ადგნენ ადრიანად და გავიდნენ ისრაელის წინააღმდეგ საბრძოლველად, ის და მთელი მისი ხალხი, დათქმულ დროს ყარაბას წინ. და მან არ იცოდა, რომ ჩასაფრებულნი იყვნენ მისთვის ქალაქის უკან.

¹⁵და იესო და მთელი ისრაელი, თითქოს დამარცხდნენო მათ წინაშე, გაიქცნენ უდაბნოს გზით.

¹⁶და დასცა ყიჟინა მთელმა ხალხმა, რომელიც ჰაღაიში იყო, რათა დადევნებოდა მათ, და გამოედევნენ იესოს და მოსწყდნენ ქალაქს.

¹⁷და კაცი არ დარჩენილა ჰაღაიში და ბეთელში, ისრაელს რომ არ დადევნებოდა უკან. და ღია დატოვეს ქალაქი და დაედევნენ ისრაელს უკან.

¹⁸და უთხრა უფალმა იესოს: “ჰაღაიზე გაიწოდე შუბი, ხელში რომ გიჭირავს, რადგან მას ხელში ჩაგიგდებ.” და გაიწოდა იესომ შუბი, ხელში რომ ეჭირა, ქალაქისაკენ.

¹⁹და ჩასაფრებულები უმალ წამოდგნენ თავიანთი ადგილიდან და გაიქცნენ, როდესაც იესომ ხელი გაიწოდა, შეიჭრნენ ქალაქში და აიღეს იგი, და ისწრაფეს, და წაუკიდეს ქალაქს ცეცხლი.

²⁰და უკან მოიხედეს ჰაღაის მამაკაცებმა და დაინახეს ქალაქის კვამლი ზეცას სწვდებოდა. და აღარ დარჩათ მათ გასაქცევი ადგილი არც იქით, არც აქეთ. და უდაბნოსაკენ გაქცეული ხალხი შემოუბრუნდა მდევრებს.

²¹და დაინახა იესომ და მთელმა ისრაელმა, რომ ჩასაფრებულებმა აიღეს ქალაქი, და ქალაქს კვამლი აუვიდა, მობრუნდნენ და მოსრეს ჰაღაის ხალხი.

²²და ისინი გამოვიდნენ ქალაქიდან მათ დასახვედრად, და აღმოჩნდნენ ისრაელს შორის, ზოგი აქეთ, ზოგი იქით. და მუსრეს ისინი, და არ გაუშვეს მათ გადარჩენილი და ლტოლვილი.

²³და ჰაღაის მეფე შეიპყრეს ცოცხლად და მოუყვანეს იგი იესოს.

²⁴და როცა მორჩა ისრაელი ჰაღაის ყველა მკვიდრის დახოცვას ველზე, უდაბნოში, სადამდეც მირეკეს ისინი, და ყველანი დაეცნენ მახვილის პირით, მაშინ მობრუნდა მთელი ისრაელი ჰაღაისაკენ და შემუსრეს ისიც მახვილით.

²⁵და ყველა, ვინც დაეცა იმ დღეს, კაცი თუ დედაკაცი, იყო თორმეტი ათასი, ჰაღაის ყველა მკვიდრი.

²⁶და იესოს არ ჩამოუშვია ხელი, რომლითაც შუბი გაიწოდა, ვიდრე არ მოსპო ჰაღაის ყველა მცხოვრები.

²⁷და მხოლოდ პირუტყვი და ნადავლი იმ ქალაქისა დაიტაცა თავისთვის ისრაელმა, უფლის სიტყვისამებრ, რომელიც მან უბრძანა იესოს.

²⁸და გადაწვა იესომ ქალაქი ჰაღაი, საუკუნო ნანგრევებად და უკაცრიელ ადგილად აქცია, დღევანდლამდე.

²⁹და ჰაღაის მეფე ჩამოჰკიდა ხეზე, საღამომდე. და მზის ჩასვლისას ბრძანა იესომ, და ხიდან ჩამოხსნეს მისი გვამი და ქალაქის კარიბჭესთან დააგდეს, და აღმართეს მასზე დიდი გროვა ქვებისა, რომელიც შემორჩენილია დღემდე.

³⁰მაშინ აუგო იესომ სამსხვერპლო უფალს, ისრაელის ღმერთს, ღებალის მთაზე,

³¹როგორც უბრძანა მოსემ, უფლის მსახურმა, ისრაელიანებს. და ააგო ისე, როგორც ეს სწერია მოსეს რჯულის წიგნში, სამსხვერპლო მთლიანი ქვებისგან, რომელსაც არ მოღერებია კვერი. და აღუვლინეს მასზე სრულადდასაწველები უფალს, და შესწირეს სამშვიდობო მსხვერპლი.

³²და გადააწერა იმ ქვებს მოსეს რჯული, რომელიც დაწერილი ჰქონდა მას ისრაელის ძეთა წინაშე.

³³და მთელი ისრაელი, და მისი უხუცესნი, და ზედამდგომნი, და მისი მსაჯულნი იდგნენ კიდობნის აქეთ-იქით, უფლის აღთქმის კიდობნის მტარებელი ლევიანი მღვდლების პირდაპირ, როგორც ხიზანი, ისე მკვიდრი. მათი ნახევარი იდგა გერიზიმის მთის პირდაპირ და მეორე მისი ნახევარი - ღებალის მთის პირდაპირ, როგორც პირველად უბრძანა მოსემ, უფლის მსახურმა, ისრაელის ერის საკურთხებ-ლად.

³⁴და შემდეგ წაიკითხა იესომ რჯულის ყველა სიტყვა, კურთხევა და წყევლა, ყოველივე, რჯულის წიგნში ჩაწერილის მიხედვით.

³⁵არ ყოფილა სიტყვა მოსეს ნაბრძანებიდან, იესოს რომ არ წაეკითხა მთელი კრებულის წინაშე, დედაკაცების და პატარებისა და ხიზნების წინაშე, რომელნიც მათ შორის იყვნენ მოსულნი.