Read სბს–სტოკჰოლმი 2001 იესო ნავეს ძე 9 Bible Online

იესო ნავეს ძე 9 - სბს–სტოკჰოლმი 2001 bible

იესო ნავეს ძე 9

¹ეს რომ გაიგეს მეფეებმა, რომლებიც იორდანეს გაღმა იყვნენ, მთაში და ბარში, დიდი ზღვის სანაპიროზე ლიბანის ახლოს, ხეთელებმა, ამორეველებმა, ქანაანელებმა, ფერიზელებმა, ხიველებმა და იებუსელებმა,

²თავი ერთად მოიყარეს, რომ შებრძოლებოდნენ იესოსა და ისრაელს ერთსულოვნად.

³როდესაც გაიგეს გაბაონის მკვიდრებმა, რა უყო იესომ იერიხოსა და ჰაღაის,

⁴ცბიერად მოიქცნენ: წავიდნენ და დაიმზადეს საგზალი, და აჰკიდეს ძველი ტომრები და ღვინის ძველი, დახეთქილი და გადაკერებული ტიკები, თავიანთ სახედრებს.

⁵და ფეხზეც გაცვეთილი ფეხსამოსი ეცვათ და ტანზეც გაცვეთილი სამოსელი ემოსათ. და მთელი მათი საგზალი პური გამხმარი იყო და დაობებული.

⁶და მივიდნენ იესოსთან ბანაკში, გილგალში, და უთხრეს მას და მთელ ისრაელს: “შორი ქვეყნიდან მოვედით ჩვენ. და ახლა აღთქმა დაგვიდეთ.”

⁷და უთხრეს ისრაელიანებმა ხიველებს: “ეგებ, ჩვენს შორის მკვიდრობ შენ, და შენ დაგიდო აღთქმა?”

⁸და უთხრეს იესოს: “შენი მსახურები ვართ.” და ჰკითხა მათ იესომ: “ვინა ხართ და საიდან მოსულხართ?”

⁹უთხრეს მათ: “ძალიან შორი ქვეყნიდან მოვედით შენი მსახურნი. უფლის, შენი ღმერთის, სახელით, რადგან გვსმენია მისი ამბავი და ყველაფერი, რაც ეგვიპტეში მოიმოქმედა,

¹⁰და ყველაფერი, რაც უყო ორ ამორეველ მეფეს, რომელნიც იყვნენ იორდანეს გაღმა: სიხონს - ხეშბონის მეფეს, და ყოგს - ბაშანის მეფეს, რომელიც ყაშთაროთში იყო.

¹¹და გვითხრეს ჩვენმა უხუცესებმა და ჩვენი ქვეყნის ყველა მკვიდრმა ასე: ‘აიღეთ ხელში საგზალი გზისთვის, და წადით მათ შესახვედრად და უთხარით მათ: “ჩვენ თქვენი მსახურები ვართ და ახლა დაგვიდეთ აღთქმა.”’

¹²ეს ჩვენი პური, ჯერ კიდევ თბილი იყო, როცა საგზლად წამოვიღეთ ჩვენი სახლებიდან იმ დღეს, თქვენთან წამოსასვლელად რომ გამოვედით, და ახლა ის გამხმარია და დაობებული.

¹³და ეს ღვინის ტიკები, რომ ავავსეთ, ახლები იყო, და აჰა დასკდა. და ჩვენი სამოსელი და ფეხსაცმელი გაცვდა ძალიან შორი გზის გამო.”

¹⁴და აიღეს ისრაელიანმა მათი საგზალი და უფლის ბაგეს არ დაეკითხნენ.

¹⁵და სამშვიდობო ზავი შეკრა მათთან იესომ და დაუდო მათ პირობა, რომ ცოცხლებს დატოვებდა. და შეჰფიცეს მათ თემის მთავრებმა.

¹⁶სამი დღე რომ გავიდა კავშირის შეკვრიდან, გაიგეს, რომ ისინი მათი მეზობლები ყოფილან და მათ ახლოს უცხოვრიათ.

¹⁷და აიყარნენ ისრაელის ძენი, და მესამე დღეს მივიდნენ მათ ქალაქებში. მათი ქალაქები იყო: გაბაონი, ქეფირა, ბეეროთი და კირიათ-იეყარიმი.

¹⁸და არ მოსრეს ისინი ისრაელის ძეთ, რადგან თემის მთავრებმა უფალი, ისრაელის ღმერთი, დაუფიცეს. და დრტვინავდა მთელი თემი მთავრებზე.

¹⁹და უთხრეს მთავრებმა მთელ თემს: “ჩვენ მათ უფალი, ისრაელის ღმერთი, დავუფიცეთ, და ამიტომ მათი ხელის ხლება არ შეგვიძლია.

²⁰ასე მოვექცევით მათ: ცოცხლები დავტოვეთ, რომ არ დაგვატყდეს რისხვა იმ ფიცის გამო, რითაც შევფიცეთ მათ.”

²¹და უთხრეს მათ მთავრებმა: “იცოცხლონ! შეშის მჭრელებად და წყლის მხაპავებად დაუდგნენ მთელ თემს”, ასე გადაუწყვიტეს მათ მთავრებმა.

²²და მოუხმო მათ იესომ, და უთხრა: “რად მოგვატყუეთ, რომ გვითხარით: ძალიან შორს ვართო თქვენგან, და ჩვენი მეზობლები კი ყოფილხართ?

²³და ახლა წყეულიმც იყავი, ნუ გამოილევა თქვენგან მსახური, და შეშის მჭრელები, და წყლის მხაპავები ჩემი ღმერთის სახლისთვის.”

²⁴და მიუგეს იესოს, და უთხრეს: “რადგან გაგებით გაგებული ჰქონდათ შენს მსახურთ, რაც უბრძანა უფალმა, შენმა ღმერთმა, მოსეს, თავის მსახურს, რათა მოეცა თქვენთვის მთელი ეს ქვეყანა და გაენადგურებინა ყოველი მკვიდრი ქვეყნისა თქვენს წინაშე, შეგვეშინდა ჩვენი სიცოცხლის გამო თქვენს წინაშე და ეს საქმე მოვიმოქმედეთ.

²⁵და აჰა, ახლა შენს ხელთა ვართ. როგორც გიჯობდეს და სამართლიანი იყოს შენს თვალში, ჩვენს მიმართ მოქცევა, ისე მოგვექეცი.”

²⁶და ასე მოექცა იგი მათ: იხსნა ისინი ისრაელის ძეთა ხელიდან, და არ დახოცეს ისინი.

²⁷და დააყენა ისინი იესომ იმ დღეს შეშის მჭრელებად და წყლის მხაპავებად თემისათვის და უფლის სამსხვერპლოსათვის დღევანდლამდე, იმ ადგილზე, რომელსაც უფალი ამოირჩევდა.