Read სბს–სტოკჰოლმი 2001 იაკობის წერილი 2 Bible Online

იაკობის წერილი 2 - სბს–სტოკჰოლმი 2001 bible

იაკობის წერილი 2

¹ჩემო ძმებო, მიკერძოებით ნუ გექნებათ ჩვენი უფლის, იესო ქრისტეს, დიდების რწმენა.

²რადგან, თუ შემოვა კაცი თქვენს სინაგოგაში, ოქროსბეჭდიანი და ბრწყინვალე სამოსელში გამოწყობილი, და შემოვა აგრეთვე ღარიბი ჭუჭყიანი სამოსით,

³როცა შეხედავთ ბრწყინვალე სამოსში გამოწყობილს და ეტყვით მას: “აქ დაბრძანდი კარგად.” ღარიბს კი ეტყვით: შენ იქ დადექი, ანდა: აქ დაჯექი, ჩემს ფერხთითო,

⁴განა არ არჩევთ თქვენს შორის და ცუ-დი ფიქრებით განმკითხველნი არ გამოდიხართ?

⁵ისმინეთ, ჩემო საყვარელო ძმებო, განა ღმერთმა სოფლის ღარიბები არ აირჩია რწმენით მდიდრებად და იმ სასუფევლის მემკვიდრეებად, რომელიც თავის მოყვარულებს აღუთქვა?

⁶თქვენ კი დაამცირეთ ღარიბი. განა მდიდრები არ გჩაგრავენ თქვენ და არ მიგათრევენ სამსჯავროებში?

⁷განა ისინი არ გმობენ თქვენს კეთილ სახელს, რომლითაც თქვენ იწოდებით?

⁸თუ ასრულებთ სამეუფო რჯულს, წერილის მიხედვით: “შეიყვარე მოყვასი შენი, ვითარცა თავი შენი,” კარგს შვრებით.

⁹მაგრამ, თუ მიკერძოებით იქცევით, ცოდვას სჩადიხართ, რჯული გამხილებთ, როგორც რჯულის დამრღვევთ.

¹⁰რადგან, ვინც მთელ რჯულს იცავს და ერთში შესცოდავს, იგი ყველაფერში დამნაშავე ხდება.

¹¹რადგან მთქმელმა: “არ იმრუშო!” ესეც თქვა: “არ მოკლა!” და თუ არ მრუშობ, მაგრამ კლავ, დამნაშავეებს.

¹²ისე ილაპარაკეთ და ისე მოიქეცით, როგორც თავისუფლების რჯულით განსაკითხველებმა.

¹³რადგან, უწყალო მსჯავრი - უმოწყალოს. წყალობა აღემატება მსჯავრს.

¹⁴ჩემო ძმებო, რა სარგებელია, თუ ვინმე იტყვის, რომ რწმენა აქვს, საქმენი კი არ გააჩნია? განა ამ რწმენას შეუძლია მისი ხსნა?

¹⁵თუ ძმა ან და შიშველია და დღიური საზრდო აკლია,

¹⁶რომელიმე თქვენგანი კი ეტყვის მას: “მშვიდობით იარე, გათბი და ისაზრდოე”, სხეულისათვის საჭიროს კი არას მისცემთ, რა სარგებელია?

¹⁷ასევეა რწმენაც: თუ საქმენი არ გააჩნია, თავისთავად მკვდარია.

¹⁸მაგრამ იტყვის ვინმე: “შენ გაქვს რწმენა, მე კი მაქვს საქმენი. მიჩვენე შენი რწმენა საქმეთა გარეშე და გიჩვენებ ჩემს რწმენას ჩემს საქმეთაგან.”

¹⁹შენ გწამს, რომ ღმერთი ერთია, კარგს შვრები. მაგრამ ეშმაკებსაც სწამთ იგი და თრთიან.

²⁰გსურს, ამაო ადამიანო, გაიგო, რომ რწმენა საქმეთა გარეშე მკვდარია?

²¹განა ჩვენი მამა, აბრაამი, საქმეებით არ გამართლდა, როცა თავის ძეს, ისაკს, სამსხვერპლოზე სწირავდა?

²²ხედავ, რწმენა მოქმედებდა მის საქმეებთან ერთად. საქმეებით კი სრულყოფილი შეიქმნა რწმენა.

²³აღსრულდა წერილი, რომელიც ამბობს: “და ერწმუნა აბრაამი ღმერთს.” ეს მას სიმართლეში ჩაეთვალა და ღვთის მეგობარი ეწოდა.

²⁴თქვენ ხედავთ, რომ საქმით მართლდება კაცი და არა მხოლოდ რწმენით.

²⁵ასევე რახაბ მეძავი. განა საქმეებით არ გამართლდა, როცა მზვერავები მიიღო შინ და სხვა გზით გაისტუმრა?

²⁶რადგან, როგორც სხეულია მკვდარი სულის გარეშე, ასევე რწმენაც მკვდარია საქმეთა გარეშე.