Read სბს–სტოკჰოლმი 2001 მსაჯული 12 Bible Online

მსაჯული 12 - სბს–სტოკჰოლმი 2001 bible

მსაჯული 12

¹და ამის შემდეგ შეიყარნენ ეფრემის კაცები და გადავიდნენ ცაფონში, და უთხრეს იფთახს: “რატომ წახვედი საბრძოლველად ყამონის ძეებთან და ჩვენ არ დაგვიძახე, რომ შენთან წამოვსულიყავით? შენ სახლს თავზე დაგაწვავთ ცეცხლით.”

²და უთხრა იფთახმა მათ: “მე და ჩემს ხალხს დიდი პაექრობა გვქონდა ყამონის ძეებთან და მე დაგიძახეთ, მაგრამ თქვენ არ მიხსენით მათი ხელიდან.

³და როცა დავინახე, რომ თქვენ ჩემი მხსნელები არ იყავით, საფრთხეში ჩავიგდე ჩემი სიცოცხლე და წავედი ყამონის ძეთა წინააღმდეგ და ხელში ჩამაგდებინა ისინი უფალმა. და რად გამოხვედით დღეს ჩემთან საბრძოლველად?”

⁴და შეკრიბა იფთახმა ყველა მკვიდრი გილყადისა და შეება ეფრემს და მოსრეს გილყადის მკვიდრებმა ეფრემი, რადგან თქვეს: “თქვენ ეფრემის ლტოლვილები ხართ, გილყადი კი ეფრემის შორისაა და მენაშეს შორისაა.”

⁵და გადაუჭრეს გილყადელებმა ეფრემს იორდანეს ფონები და, როდესაც იტყოდა ეფრემის ლტოლვილთაგანი: “გადმოვლახავ,” ეუბნებოდნენ გილყადელი კაცები: “შენ ხომ ეფრემიანი ხარ?” და ის ამბობოდა: “არა!”

⁶და ეუბნებოდნენ მას: “აბა თქვი - შიბოლეთ” და თუ იტყოდა “სიბოლეთ” და ვერ გამოთქვამდა სწორად, მაშინ შეიპყრობდნენ მას და კლავდნენ იორდანეს ფონებთან. და დაეცა იმ დროს ეფრემიდან ორმოცდაორი ათასი კაცი.

⁷და განსჯიდა იფთახი ისრაელს ექვსი წელი. და მოკვდა გილყადელი იფთახი და დაიმარხა გილყადის ერთ-ერთ ქალაქში.

⁸და განსჯიდა მის შემდეგ ისრაელს იბცან ბეთლემელი.

⁹და ჰყავდა მას ოცდაათი ძე და ოცდაათი ასული. მან გაათხოვა თავისი ასულები და ოცდაათი ქალიშვილი მოუყვანა თავის ძეებს; და შვიდ წელიწადს განსჯიდა ისრაელს.

¹⁰და მოკვდა იბცანი და დაიმარხა ბეთლემს.

¹¹და მის შემდეგ ისრაელს განსჯიდა ელონ ზებულუნელი. ათ წელიწადს განსჯიდა იგი ისრაელს.

¹²და მოკვდა ელონ ზებულუნელი, და დაიმარხა აიალონში, ზებულუნის ქვეყანაში.

¹³და მის შემდეგ ისრაელს განსჯიდა ყაბდონი, ძე ჰილელისა, ფირყათონელი.

¹⁴და ჰყავდა მას ორმოცი ძე და ოცდაათი შვილიშვილი სამოცდაათ ჩოჩორზე ამხედრებულნი. და რვა წელიწადი განსჯიდა ისრაელს.

¹⁵და მოკვდა ყაბდონი, ძე ფირყათონელი ჰილელისა, და დაიმარხა ფირყათონს, ეფრემის ქვეყანაში, ყამალეკელის მთაზე.