Read სბს–სტოკჰოლმი 2001 მსაჯული 13 Bible Online

მსაჯული 13 - სბს–სტოკჰოლმი 2001 bible

მსაჯული 13

¹ისრაელიანები ისევ აკეთებდნენ ბოროტებას უფლის თვალში; და უფალმა ფილისტიმელთა ხელში ჩაჰყარა ისინი ორმოც წელიწადს.

²და იყო მაშინ ერთი კაცი ცორყადან, დანის ტომიდან, და სახელად მანოახი ერქვა; და ცოლი ბერწი ჰყავდა, შვილს ვერ აჩენდა.

³და გამოეცხადა უფლის ანგელოზი ამ ქალს და უთხრა მას: “აჰა, შენ, ბერწი ხარ და შვილი არ გაგიჩენია, მაგრამ დაორსულდები და ვაჟს გააჩენ.

⁴და ახლა გაფრთხილდი, არ დალიო ღვინო და თაფლუჭი, და უწმიდური არაფერი ჭამო.

⁵რადგან აჰა, დაორსულდები და ვაჟი შეგეძინება, და სამართებელი არ უნდა მიეკაროს მის თავს, რადგან ღვთის მოწმიდარი იქნება ეს ყრმა საშოდანვე, და შეუდგება ისრაელის დახსნას ფილისტიმელთა ხელიდან.”

⁶და მოვიდა ცოლი და უთხრა თავის ქმარს: “ღვთისკაცი მოვიდა ჩემთან, ღვთის ანგელოზივით იერი ჰქონდა, ძალზე საპატიო; არ მიკითხავს მისთვის სადაურობა, და არც თვითონ მითხრა თავისი სახელი.

⁷და მითხრა: ‘დაორსულდები და ვაჟს გააჩენ; და არ დალიო ღვინო და თაფლუჭი და უწმიდური არაფერი ჭამო, რადგან ღვთის მოწმიდარი იქნება ეს ყრმა საშოდან მის სიკვდილამდე.’”

⁸და ლოცვა აღუვლინა მანოახმა უფალს, და თქვა: “გევედრები, უფალო! ღვთისკაცი, რომელიც შენ მოავლინე, კიდევ ერთხელ გვეწვიოს და გვასწავლოს, თუ რა ვუყოთ იმ ყრმას, რომელიც გაჩნდება.”

⁹და უსმინა ღმერთმა მანოახს, და ხელახლა მოვიდა ღვთის ანგელოზი ამ ქალთან, როცა იგი მინდორში იჯდა, და მანოახი, მისი ქმარი, არ იყო მასთან.

¹⁰და სწრაფად გაიქცა ქალი შეატყობინა თავის ქმარს: “აჰა, გამომეცხადა კაცი, ამასწინათ რომ მოვიდა ჩემთან.”

¹¹და ადგა მანოახი, წაჰყვა თავის ცოლს და მივიდა იმ კაცთან და უთხრა მას: “შენ ხარ ის კაცი, ამ ქალს რომ ელაპარაკე?” და უთხრა: “მე ვარ.”

¹²და უთხრა მანოახმა: “ახლა, შენი სიტყვა რომ ახდება, რა უნდა იყოს ამ ყრმის ცხოვრების წესი და საქმე?”

¹³და უფლის ანგელოზმა უთხრა მანოახს: “ერიდოს ყველაფერს, რაც ქალს ვუთხარი.

¹⁴და ვაზისაგან მოწეულს არაფერს გაეკაროს, ღვინო და თაფლუჭი არ დალიოს, უწმიდური არაფერი ჭამოს. ყველაფერი, რაც მას ვამცნე, შეასრულოს.”

¹⁵და უთხრა მანოახმა უფლის ანგელოზს: “ნება გვიბოძე დაგაყოვნოთ და თიკანი მოგიმზადოთ.”

¹⁶და უთხრა უფლის ანგელოზმა მანოახს: “რომც დამაყოვნო, შენს პურს მაინც არ გავტეხ. თუ სრულადდასაწველის გამზადება გინდა, აღავლინე.” რადგან არ იცოდა მანოახმა, რომ უფლის ანგელოზი იყო იგი.

¹⁷და ჰკითხა მანოახმა უფლის ანგელოზს: “რა არის შენი სახელი? რათა, შენი სიტყვა რომ ახდება, განგადიდოთ.”

¹⁸და უთხრა მას უფლის ანგელოზმა: “რისთვის მეკითხები სახელს? საკვირველია იგი.”

¹⁹და აიღო მანოახმა თიკანი და პურეულის ძღვენი, და აღუვლინა ქვაზე უფალს, და მან მოახდინა სასწაული. და მანოახი და მისი ცოლი უყურებდნენ.

²⁰როცა სამსხვერპლოდან ალი ცისკენ ავარდა, უფლის ანგელოზი ზეაჰყვა სამსხვერპლოს ალს. და მანოახი და მისი ცოლი, ეს რომ დაინახეს, პირქვე დაემხნენ მიწაზე.

²¹გაუჩინარდა უფლის ანგელოზი მანოახსა და მის ცოლს. და მაშინ მიხვდა მანოახი, რომ უფლის ანგელოზი იყო იგი.

²²და უთხრა მანოახმა თავის ცოლს: “სიკვდილით მოვკვდებით, რადგან ღმერთი ვიხილეთ.”

²³და უპასუხა ცოლმა: “უფალს ჩვენი სიკვდილი რომ ნდომებოდა, არ მიიღებდა ჩვენი ხელიდან სრულადდასაწველსა და პურეულის ძღვენს და არ დაგვანახვებდა და არ მოგვასმენინებდა ყველაფერ ამას.”

²⁴და შობა იმ ქალმა ძე, და უწოდა მას სახელად სამსონი, და წამოიზარდა ყრმა და აკურთხა იგი უფალმა.

²⁵და იწყო უფლის სულმა მისი აღძვრა დანის ბანაკში, ცორყასა და ეშთაოლს შორის.