Read სბს–სტოკჰოლმი 2001 მსაჯული 3 Bible Online

მსაჯული 3 - სბს–სტოკჰოლმი 2001 bible

მსაჯული 3

¹აი, ის ხალხები, უფალმა რომ დატოვა, რათა გამოეცადა მათით ისრაელი, ყველანი, ვინც ქანაანის არც ერთი ომი არ იცოდა, -

²მხოლოდ იმისათვის, რათა სცოდნოდათ და ესწავლათ ომი ისრაელის ძეთა შემდგომ თაობებს, რომელთაც უწინ არ იცოდნენ ის:

³ხუთი ფილისტიმელი მთავარი, ყოველი ქანაანელნი, ციდონელნი და ხიველნი, ლიბანის მთაში რომ მკვიდრობდნენ, ბაყალ-ხერმონის მთიდან ვიდრე ხამათის მისადგომამდე.

⁴და იყვნენ ისინი [დატოვებულნი], რომ მათით გამოეცადა ისრაელი, და სცოდნოდა, თუ დაემორჩილებოდნენ უფლის მცნებებს, რომელნიც მათ მამებს უბრძანა მოსეს ხელით.

⁵და ისრაელის ძენი დამკვიდრდნენ ქანაანელთა, ხეთელთა, ამორეველთა, ფერიზელთა, ხიველთა და იებუსელთა შორის;

⁶და შეირთეს მათი ასულნი ცოლებად, და თავიანთი ასულები მიათხოვეს მათ ძეებს, და ემსახურებოდნენ მათ ღმერთებს.

⁷და ბოროტება ჩაიდინეს ისრაელის ძეთ უფლის თვალში: დაივიწყეს უფალი, თავიანთი ღმერთი, და ემსახურებოდნენ ბაყალებსა და ყაშთაროთებს.

⁸და აღიგზნო რისხვა უფლისა ისრაელზე და ხელში ჩაუგდო ისინი ქუშან-რიშათაიმს, არამის მეფეს, და ემსახურობოდნენ ქუშან-რიშათაიმს ისრაელის ძენი რვა წელი.

⁹და შეჰღაღადეს ისრაელის ძეთ უფალს, და აღუდგინა უფალმა მხსნელი ისრაელის ძეთ, რომელმაც იხსნა ისინი: ეს იყო ღოთენიელი, ქალების უმცროსი ძმის, კენაზის ძე.

¹⁰და უფლის სული იყო მასზე, და ის იყო მსაჯული ისრაელისა. და გავიდა იგი სალაშქროდ, და ხელში ჩაუგდო მას უფალმა ქუშან-რიშთაიმი, მეფე არამისა, და სძლია მისმა ხელმა ქუშან-რიშთაიმს.

¹¹და მოისვენა ქვეყანამ ორმოცი წელი. და მოკვდა ღოთენიელი, კენაზის ძე.

¹²და კვლავ დაიწყეს ისრაელის ძეთ ბოროტის კეთება უფლის თვალში, და გააძლიერა უფალმა ყეგლონი, მეფე მოაბისა, ისრაელზე, რადგან ბოროტება ჩაიდინეს უფლის თვალში.

¹³და მან შემოიკრიბა ყამონის ძენი და ყამალეკნი, და წავიდა და დაამარცხა ისრაელი, და დაიპყრო პალმების ქალაქი.

¹⁴და ემსახურებოდნენ ისრაელის ძენი ყეგლონს, მოაბის მეფეს, თვრამეტი წელი.

¹⁵და შეჰღაღადეს ისრაელის ძეთ უფალს, და მოუვლინა უფალმა მათ მხსნელად ეჰუდი, ძე გერასი, ბენიამინის ძეთაგან, ცაცია კაცი. და ხარკი გაუგზავნეს ისრაელის ძეთ მისი ხელით ყეგლონს, მოაბის მეფეს.

¹⁶და გაიკეთა თავისთვის ეჰუდმა ორლესული მახვილი, ერთწყრთიანი, და შეიბა იგი თავისი მოსასხამის ქვეშ, მარჯვენა თეძოზე.

¹⁷და მიართვა ხარკი ყეგლონს, მოაბის მეფეს; და ყეგლონი ძალიან მსუქანი კაცი იყო.

¹⁸და როგორც კი ძღვენი მიართვეს, მაშინვე უკან გაისტუმრა მომტანები.

¹⁹და თავად კი, გილგალთან რომ კერპებია, იქიდან უკან დაბრუნდა და უთხრა: “საიდუმლო სიტყვა მაქვს შენთან, მეფეო.” და უპასუხა მან: “ჩუმად!” და ყველა გამოვიდა, ვინც მასთან იყო.

²⁰და შევიდა ეჰუდი მასთან; და იგი მარტო იჯდა ზემო საგრილებელ ოთახში, და უთხრა ეჰუდმა: “ღვთის სიტყვა მაქვს შენთან სათქმელი.” და წამოდგა მეფე სავარძლიდან.

²¹და გაიკრა ეჰუდმა მარცხენა ხელი, იძრო მარჯვენა თეძოსთან შებმული მახვილი და მუცელში აძგერა.

²²და წვერიან-ვადიანად ჩაიფლო მახვილი და გადაფარა ქონმა მახვილი, რადგან არ გამოუძვრია უკან მახვილი მუცლიდან, და განავალი გარეთ გამოუვიდა.

²³და მერე გამოვიდა ტალანში ეჰუდი, გამოიხურა და გამოიკეტა კარი.

²⁴და როგორც კი გავიდა, მოვიდნენ მეფის მონები და აჰა, ჩაკეტილი დახვდათ ზემო ოთახის კარი. თქვეს: “მოსასაქმებლად ჩაიკეტებოდა საგრილებელ ოთახში.”

²⁵იცადეს, ვიდრე არ შეფიქრიანდნენ. და აჰა, არ იქნა და არ გააღო მან ზემო ოთახის კარი. ამიტომ აიღეს გასაღები და გახსნეს კარი და აჰა, მათი ბატონი მიწაზე აგდია მკვდარი.

²⁶და ეჰუდმა სამშვიდობოს გააღწია, ვიდრე ისინი ყოვნდებოდნენ, და იგი გასცდა კერპებს და სეყირს შეაფარა თავი.

²⁷და მისვლისას დააყვირა რქის საყვირი ეფრემის მთაში, და ჩამოვიდნენ მასთან ერთად ისრაელის ძენი მთიდან, და წაუძღვა წინ.

²⁸და უთხრა მათ: “მომყევით, რადგან ხელში ჩაგიგდოთ უფალმა თქვენი მტრები, მოაბელნი.” და გაჰყვნენ უკან, და გადაუჭრეს მოაბელებს იორდანეზე გადასასვლელი ფონები და აღარავინ გაატარეს.

²⁹და მოსრეს მოაბელნი იმ დროს ათი ათასამდე კაცი, ყველა ძლიერი და მამაცი, და თავს ვერავინ უშველა.

³⁰და იმ დღეს მოაბი ისრაელის ხელქვეითად იქცა და მოისვენა და დამშვიდდა ქვეყანა ოთხმოცი წელი.

³¹და მის შემდეგ იყო შამგარი, ძე ყანათისა, და მან მოსრა ფილისტიმელთა ექვსასი კაცი ხარის საგმირით; და მანაც იხსნა ისრაელი.