Read სბს–სტოკჰოლმი 2001 რუთი 4 Bible Online

რუთი 4 - სბს–სტოკჰოლმი 2001 bible

რუთი 4

¹გავიდა ბოყაზი კარიბჭესთან, და იქ ჩამოჯდა. და აჰა, იმ ახლო ნათესავმა უნდა ჩაიაროს, ვისზეც, ლაპარაკობდა ბოყაზი. დაუძახა მას: “მოდი და აქ ჩამოჯექ!” და ისიც მივიდა და ჩამოჯდა.

²და მოიყვანა ბოყაზმა ათი კაცი ქალაქის უხუცესთაგან, და უთხრა მათ: “დასხედით აქ.” და დასხდნენ ისინი.

³და უთხრა მან ნათესავს: “ნაყომი, რომელიც დაბრუნდა მოაბის ველიდან, ჰყიდის ყანის ნაკვეთს, რომელიც ჩვენს ძმას, ელიმელექს ეკუთვნოდა.

⁴და მე ვიფიქრე, შემეტყობინებინა შენთვის და მეთქვა: იყიდე ყანა აქ მსხდომთა და ჩემი ხალხის უხუცესთა თანდასწრებით. თუ გამოიხსნი, გამოიხსენი, და თუ არ გამოიხსნი, მითხარი და მეცოდინება, რადგან შენს მეტს არავის არა აქვს გამოხსნის უფლება. შენს შემდეგ კი მე ვარ.” და უთხრა მას ნათესავმა: “თანახმა ვარ გამოვიხსნა.”

⁵და თქვა ბოყაზმა: “როცა ყანას გამოისყიდი ნაყომის ხელიდან და მოაბელი რუთისაგან, გარდაცვლილის ცოლიც უნდა გამოისყიდო, რათა სახელი აღუდგინო გარდაცვლილს თავის სამკვიდროში.”

⁶თქვა იმ ნათესავმა: “ვერ გამოვიხსნი. ვაითუ დავაქციო ჩემი სამკვიდრებელი. შენ გამოიხსენი ქალი, რადგან მე ვერ გამოვიხსნი.”

⁷ასეთი წესი ჰქონდათ უწინ ისრაელში გამოხსნაზე, გაცვლაზე, ან რაიმე საქმის დადასტურებაზე: ერთი მათგანი გაიძრობდა ფეხსაცმელს და მეორეს მისცემდა. ეს მოწმობის ნიშანი იყო ისრაელში.

⁸და უთხრა იმ ნათესავმა: “შენთვის გამოისყიდე!” და გაიძრო ფეხსაცმელი.

⁹და უთხრა ბოყაზმა უხუცესებს და მთელ ხალხს: “დღეს თქვენ მოწმენი ხართ, გამოვისყიდე ნაყომის ხელიდან ელიმელექის მთელი საბადებელი, ქილიონის და მახლონის მთელი საბადებელი.

¹⁰ასევე მოაბელი რუთი, მახლონის ქვრივი, ცოლად გამოვისყიდე, რომ სახელი აღვუდგინო გარდაცვლილს თავის სამკვიდრებელში, რათა არ გაქრეს გარდაცვლილის სახელი მის ძმებს შორის თავისი ადგილსამყოფლის კარიბჭიდან. ამის მოწმენი ხართ თქვენ დღეს!”

¹¹და უთხრეს კარიბჭესთან მდგომმა მთელმა ხალხმა და უხუცესებმა: “მოწმენი ვართ! ღმერთმა დალოცოს შენს სახლში შემომავალი ქალი რახელივით და ლეასავით, რომელთაც ააშენეს ისრაელის სახლი. ღირსეულად მოიქეცი ეფრათში და სახელი გაითქვი ბეთლემში!

¹²და გახდეს შენი სახლი, როგორც სახლი ფერეცისა, რომელიც უშვა თამარმა იუდას, იმავე თესლიდან, უფალი რომ მოგცემს ამ ყმაწვილი ქალისგან.”

¹³და წაიყვანა ბოყაზმა რუთი და გახდა იგი მისი ცოლი. და შევიდა მასთან, და მისცა უფალმა რუთს ორსულობა და შვა ვაჟი.

¹⁴და დედაკაცებმა უთხრეს ნაყომის: “კურთხეულია უფალი, რომელმაც არ მოგიშალა ნათესავი დღეს! განდიდდეს მისი სახელი ისრაელში!

¹⁵ის იყოს განმაახლებელი შენი სიცოცხლისა და მარჩენალი შენი სიბერისა, რადგან იგი გააჩინა შენმა რძალმა, რომელსაც უყვარხარ და რომელიც შვიდ ვაჟიშვილზე მეტია შენთვის.”

¹⁶და მიირქვა ნაყომიმ ყმაწვილი, კალთით ატარებდა, და გახდა მისი გამდელი.

¹⁷და სახელი მეზობლის ქალებმა დაარქვეს და თქვეს: “ვაჟი შეეძინა ნაყომის.” და დაარქვეს სახელად ყობედი. იგი იყო მამა იესესი, დავითის მამისა.

¹⁸აჰა, შთამომავლობა ფერეცისა: ფერეცმა შვა ხეცრონი,

¹⁹და ხეცრონმა შვა რამი, და რამმა შვა ყამინადაბი,

²⁰და ყამინადაბმა შვა ნახშონი, და ნახშონმა შვა სალმონი,

²¹და სალმონმა შვა ბოყაზი, და ბოყაზმა შვა ყობედი,

²²ყობედმა შვა იესე, და იესემ შვა დავითი.