Read სბს–სტოკჰოლმი 2001 1 მეფეთა 1 Bible Online

1 მეფეთა 1 - სბს–სტოკჰოლმი 2001 bible

1 მეფეთა 1

¹იყო ერთი კაცი რამათაიმ-ცოფიმიდან, ეფრემის მთიდან, და მისი სახელი იყო ელკანა, ძე იეროხამისა, ძისა ელიჰუსი, ძისა თოხუსი, ძისა ცუფისა - ეფრათელი.

²და ორი ცოლი ჰყავდა მას ერთის სახელი იყო ხანა, მეორისა - ფენინა. ფენინას შვილები ჰყავდა, ხანა კი უშვილო იყო.

³ადიოდა ეს კაცი თავისი ქალაქიდან დაწესებულ დღეებში ცაბაოთ უფლისათვის თაყვანისცემად და მსხვერპლის შესაწირად შილოში, სადაც ყელის ორი ვაჟი - ხოფნი და ფინხასი, უფლის მღვდლები იყვნენ.

⁴იმ დღეს, როცა შესწირავდა მსხვერპლს ელკანა, მისცემდა ხოლმე წილს ფენინას, თავის ცოლს, და მის ვაჟებსა და ასულებს.

⁵ხანას კი განსაკუთრებულ წილს აძლევდა, რადგან უყვარდა ხანა, თუმცა საშო დაეხშო მისთვის უფალს.

⁶მისი მეტოქე კიდევ უფრო აჭირვებდა მას, აწუხებდა იმის გამო, რომ საშო დაუხშო უფალმა.

⁷ასე ხდებოდა კაცი ყოველწლიურად, როცა კი ხანა უფლის სახლში ადიოდა. და ფენინა აწუხებდა მას, ის კი ტიროდა და არაფერს ჭამდა.

⁸და უთხრა ელკანამ, მისმა ქმარმა: “ხანა, რატომ ტირი? რატომ არაფერს ჭამ? გული რატომ გაქვს დამწუხრებული? განა ათ შვილს არ გირჩევნივარ?”

⁹ადგა ერთხელ ხანა სმა-ჭამის შემდეგ შილოში. ხოლო ყელი მღვდელი სკამზე იჯდა უფლის სახლის წირთხლთან.

¹⁰სულის სიმწარით დაუწყო ქალმა ვედრება უფალს, და ცხარედ ტიროდა.

¹¹და აღუთქვა და უთხრა: “ცაბაოთ უფალო, თუ მოხედავ შენი მხევლის ტანჯვას, თუ გამიხსენებ და არ დაივიწყებ შენს მხევალს და მისცემ შენს მხევალს ვაჟიშვილს, უფალს მივცემ მას ვიდრე ცოცხალი იქნება, სამართებელი არ შეეხება მის თავს.”

¹²და როცა დიდხანს ლოცულობდა ქალი უფლის წინაშე, ყელი მის ბაგეებს აკვირდებოდა.

¹³რაკი ხანა გულში ლაპარაკობდა და მხოლოდ ბაგეებს ამოძრავებდა, ხმა კი არ ისმოდა, მთვრალიაო, იფიქრა ყელიმ.

¹⁴უთხრა ყელიმ: “რამდენ ხანს უნდა იყო მთვრალი? გამოფხიზლდი ღვინისგან.”

¹⁵მიუგო ხანამ და უთხრა: “არა, ჩემო ბატონო. ერთი სულგამწარებული ქალი ვარ. ღვინო და თაფლუჭი არ დამილევია, უფლის წინაშე ვღვრი ჩემს სულს.

¹⁶უღირსი დედაკაცი ნუ გეგონება შენი მხევალი. მხოლოდ დიდი მწუხარებისა და სიმწრის გამო ვლაპარაკობდი ამდენ ხანს.”

¹⁷მიუგო ყელიმ და უთხრა: “წადი მშვიდობით და ისრაელის ღმერთმა აგისრულოს სათხოვარი, რასაც მოითხოვ მისგან.”

¹⁸თქვა ქალმა: “ნეტავ, მადლი პოვოს შენმა მხევალმა შენს თვალში.” და წავიდა ქალი თავისი გზით. საჭმელი ჭამა და აღარ ჰქონია სახე უწინდებურად.

¹⁹ადგნენ დილით და თაყვანი სცეს უფალს, დაბრუნდნენ რამას და მივიდნენ თავიანთ სახლში. შეიცნო ელკანამ ხანა, თავისი ცოლი, და გაიხსენა ხანა უფალმა.

²⁰რამდენიმე ხნის შემდეგ დაორსულდა ხანა, შვა ვაჟი და დაარქვა სახელად სამუელი, რადგან უფალს გამოვთხოვეო იგი.

²¹წავიდა მისი ქმარი ელკანა მთელი თავისი სახლითურთ უფლისადმი ყოველწლიური მსხვერპლის შესაწირად და თავისი აღთქმის აღსასრულებლად.

²²ხანა არ წასულა, უთხრა ქმარს: “როცა ბავშვი ძუძუს მოსწყდება და წამოიზრდება, მაშინ წავიყვან და ის გამოცხადდება უფლის წინაშე და უკუნისამდე იქ დარჩება.”

²³უთხრა ელკანამ, მისმა ქმარმა: “ისე გააკეთე, როგორც გერჩიოს. დარჩი, ვიდრე ძუძუს მოსწყვეტდე. ოღონდ აგისრულოს უფალმა თავისი სიტყვა.” დარჩა ცოლი და ძუძუს აწოვებდა ბავშვს, სანამ არ მოსწყვიტა.

²⁴როცა ძუძუს მოსწყვიტა, წაიყვანა იგი უფლის სახლში, შილოში. თან სამი მოზვერი, ერთი ეფა ფქვილი და ერთი ტიკი ღვინო წაიტანა, და მივიდა უფლის სახლში შილოში; ჯერ კიდევ ჩვილი იყო ყმაწვილი.

²⁵დაკლეს მოზვერი და ყელის მიუყვანა ყმაწვილი.

²⁶თქვა ქალმა: “იცოცხლე, ჩემო ბატონო! მე ის ქალი ვარ, აქ რომ ვიდექი შენს ახლოს და უფალს ვევედრებოდი.

²⁷ამ ყმაწვილის გამო ვევედრებოდი და აჰა, ამისრულა უფალმა სათხოვარი, რასაც ვთხოვდი.

²⁸ამიტომაც უფალს აღვუთქვი იგი, ვიდრე ცოცხალია, უფლისთვის იქნება აღთქმული.” და თაყვანი სცა იქ უფალს.