Read სბს–სტოკჰოლმი 2001 1 მეფეთა 3 Bible Online

1 მეფეთა 3 - სბს–სტოკჰოლმი 2001 bible

1 მეფეთა 3

¹ყრმა სამუელი უფალს ემსახურებოდა ყელისთან. უფლის სიტყვა ძვირი იყო იმ დღეებში. ხილვები არ იყო ხშირი.

²ერთხელ ყელი თავის ადგილზე იწვა; თვალები დასნეულებული ჰქონდა და ვეღარ ხედავდა.

³ღვთის კანდელი ჯერ კიდევ არ იყო ჩამქრალი და სამუელს უფლის სახლში ეძინა, სადაც ღვთის კიდობანი იდგა.

⁴დაუძახა უფალმა სამუელს. გაეპასუხა: “აჰა, აქა ვარ.”

⁵და მიირბინა ყელისთან და უთხრა: “აჰა, აქა ვარ, რომ დამიძახე.” უთხრა: “არ დამიძახნიხარ, წადი, დაწექი.” ისიც წავიდა და დაწვა.

⁶კვლავ დაუძახა უფალმა სამუელს. ადგა სამუელი, მივიდა ყელისთან და უთხრა: “აჰა, აქა ვარ, რომ დამიძახე.” უთხრა: “არ დამიძახნიხარ, შვილო. წადი, დაწექი.”

⁷ჯერ კიდევ ვერ სცნობდა სამუელი უფალს, ჯერ კიდევ არ გამოსცხადებოდა მას უფლის სიტყვა.

⁸მესამე გზის დაუძახა უფალმა სამუელს. ადგა, მივიდა ყელისთან და უთხრა: “აჰა, აქა ვარ, რომ დამიძახე.” მიხვდა ყელი, რომ უფალი ეძახდა ყმაწვილს.

⁹უთხრა ყელიმ სამუელს: “წადი, დაწექი. თუ დაგიძახეს, უთხარი: ბრძანე, უფალო, გისმენს-თქო შენი მსახური.” წავიდა სამუელი და დაწვა თავის ადგილზე.

¹⁰მოვიდა უფალი და დადგა, კვლავ დაუძახა წინანდებურად: “სამუელ, სამუელ!” უთხრა სამუელმა: “ბრძანე, რადგან გისმენს შენი მსახური.”

¹¹უთხრა უფალმა სამუელს: “ისეთ რამეს მოვახდენ ისრაელში, რომ ყოველ მის მსმენელს ორთავე ყური გაუყრუვდეს.

¹²იმ დღეს თავიდან ბოლომდე აღვასრულებ ყელიზე ყველაფერს, რაც მის სახლზე წარმოვთქვი. დავიწყებ და დავასრულებ.

¹³ხომ გამოვუცხადე, რომ უკუნისამდე დავსჯიდი მის სახლს უკეთურების გამო, რადგან იცოდა, რომ თავს ირცხვენდნენ მისი შვილები და არ ამხილებდა მათ.

¹⁴ამიტომაც დავუფიცე ყელის სახლს, არც მსხვერპლით და არც პურეულის ძღვენით არ გამოისყიდება-მეთქი უკუნისამდე ყელის სახლის უკეთურება.”

¹⁵დილამდე ეძინა სამუელს. მერე გააღო უფლის სახლის კარი, ეკრძალებოდა სამუელს გაემხილა ყელისთვის ეს ხილვა.

¹⁶და დაუძახა ყელიმ სამუელს და უთხრა: “სამუელ, შვილო!” მიუგო: “აჰა, აქა ვარ.”

¹⁷უთხრა ყელიმ: “რაზე გელაპარაკა? ნუ დამიმალავ, თორემ შენც იმასვე დაგმართებს ღმერთი და უარესსაც, თუ დამიმალე და არ მიამბე ყველაფერი, რაც გელაპარაკა.”

¹⁸უამბო სამუელმა მთელი ნალაპარაკევი, არაფერი დაუმალავს მისთვის. თქვა ყელიმ: “უფალი ყოფილა, ქმნას, რაც ენებოს.”

¹⁹იზრდებოდა სამუელი და უფალი იყო მასთან. არ გაცუდებულა არც-ერთი მისი სიტყვა.

²⁰შეიტყო მთელმა ისრაელმა, დანიდან ბეერ-შებაყამდე, რომ სამუელი უფლის წინასწარმეტყველად იქნა დამტკიცებული.

²¹კვლავ ცხადდებოდა შილოში უფალი მას შემდეგ, რაც მოევლინა უფალი სამუელს შილოში უფლის სიტყვის მეშვეობით.