Read სბს–2013 2 მეფეთა 10 Bible Online

2 მეფეთა 10 - სბს–2013 bible

2 მეფეთა 10

¹ამის შემდეგ იყო, რომ მოკვდა ყამონიანთა მეფე და მის ნაცვლად მისი ძე ხანუნი გამეფდა.

²და თქვა დავითმა: „წყალობას მივაგებ ხანუნს, ნახაშის ძეს, იმ წყალობისათვის, რომელიც მომაგო მამამისმა.“ და გააგზავნა დავითმა თავისი მსახურნი, მისასამძიმრებლად მამამისის გამო. და როცა მივიდნენ დავითის მსახურნი ყამონიანთა ქვეყანაში,

³ყამონის მთავრებმა უთხრეს ხანუნს, თავიანთ ბატონს: „ნუთუ გგონია, რომ მამაშენის პატივისცემის გამო გიგზავნის დავითი ნუგეშისმცემლებს? იქნებ ქალაქის დასაზვერად გამოგიგზანა დავითმა ხალხი, დასათვალიერებლად და დასაქცევად?“

⁴და ადგა ხანუნი და დავითის მსახურთ ცალი წვერი ჩამოჰპარსა, შემოაჭრა ნახევარი სამოსელი თეძოებამდე და ისე გაუშვა.

⁵და როცა ეს ამბავი შეატყობინეს დავითს, გაგზავნა მათ შესაგებებლად, რადგან ძალზე შეურაცხყოფილნი იყვნენ კაცები. და ბრძანა მეფემ ეთქვათ მათთვის: „იერიხოში დარჩით, ვიდრე წვერი მოგეზრდებოდეთ, და მერე მობრუნდით.“

⁶ნახეს ყამონიანებმა, რომ თავი შეაძულეს დავითს, და კაცები გაგზავნეს, რომ დაექირავებინათ არამელები ბეთ-რეხობიდან და არამელები ცობადან 20 ათასი ქვეითი, მეფე მაყაქასაგან ათასი კაცი და ტობიდან 12 ათასი კაცი.

⁷როცა ეს შეიტყო დავითმა, გაგზავნა იოაბი რჩეულთა მთელი ლაშქრით.

⁸და გამოვიდნენ ყამონიანები და გაეწყვნენ საომრად კარიბჭის შესასვლელთან. ხოლო ცობასა და რეხობის არამელები, და ტობისა და მაყაქას კაცები ცალკე დადგნენ ველზე.

⁹და როცა დაინახა იოაბმა, რომ მტრის ჯარები წინიდან და ზურგიდან იყო მისკენ მიმართული, გამოარჩია ისრაელიანთაგან ურჩეულესნი და გააწყო არამელთა პირისპირ.

¹⁰დანარჩენი ხალხი აბიშაის, თავის ძმას ჩააბარა და მანაც გააწყო ისინი ყამონიანთა წინააღმდეგ.

¹¹და თქვა: „თუ არამელები მძლევენ, შენ მომეშველები; თუ ყამონიანები გძლევენ შენ, მე მოვალ შენს მოსაშველებლად.

¹²მამაცად იყავი, და მტკიცედ ვიდგეთ ჩვენი ხალხისათვის და ჩვენი ღმერთის ქალაქისთვის, დაე, უფლის ნებისამებრ იქნეს ყოველივე.“

¹³და გავიდა იოაბი და ხალხი, რომელიც მასთან იყო, არამელთა წინააღმდეგ საომრად, და უკუიქცნენ არამელნი.

¹⁴და როცა ყამონიანთ დაინახეს, რომ არამელები გარბოდნენ, თავადაც გაექცნენ აბიშაის და ქალაქში შეცვივდნენ. და გამობრუნდა იოაბი ყამონიანთაგან და იერუსალიმში მივიდა.

¹⁵როცა დაინახეს არამელებმა, რომ მარცხდებოდნენ ისრაელთან, ერთად შეიკრიბნენ.

¹⁶და გააგზავნა ჰადადყეზერმა და მოუწოდა არამელთ, რომლებიც მდინარის გაღმა იყვნენ, და ისინიც მოვიდნენ ხელამში. ხოლო მათ შობაქი, ჰადადყეზერის მხედართმთავარი მიუძღოდა.

¹⁷როდესაც შეატყობინეს ეს დავითს, მანაც მთელი ისრაელი შეკრიბა, და გადალახა იორდანე და მივიდა ხელამს. და დაეწყვნენ არამელები დავითის წინააღმდეგ და შეებრძოლნენ.

¹⁸გაექცნენ არამელები ისრაელს. დახოცა დავითმა არამელთაგან 700 ეტლოსანი და 40 ათასი მხედარი. მახვილი უგმირა შობაქს, მათ მხედართმთავარს, და იქვე მოკვდა იგი.

¹⁹და როცა ჰადადყეზერის ქვეშევრდომმა მეფეებმა დაინახეს, რომ მარცხდებოდნენ ისრაელთან, დაეზავნენ ისრაელს და დაემორჩილნენ. ხოლო არამელებმა ვეღარ გაბედეს, რომ მიხმარებოდნენ ყამონიანთ.