Read სბს–2013 2 მეფეთა 11 Bible Online

2 მეფეთა 11 - სბს–2013 bible

2 მეფეთა 11

¹ერთი წლის შემდეგ, მეფეთა გამოსვლის ჟამს, გაგზავნა დავითმა იოაბი მისი მსახურებითურთ და მთელი ისრაელი. და გაანადგურეს ყამონიანები და შემოადგნენ რაბას. დავითი კი იერუსალიმში დარჩა.

²საღამო ჟამს ადგა დავითი თავისი მოსასვენებლიდან და სამეფო სახლის ერდოზე იწყო სეირნობა. და იქიდან დაინახა ბაღში მობანავე ქალი. ქალი ძალზე მშვენიერი იყო.

³და გააგზავნა დავითმა ქალის ამბის გასაგებად. უთხრეს: „ის არის ბათშებაყი, ელიყამის ასული, ცოლი ურია ხეთელისა.“

⁴და გააგზავნა დავითმა მოციქულები ქალის მოსაყვანად. და მოვიდა ქალი. და დაწვა დავითი მასთან და როცა განიწმიდა ქალი თავისი უწმიდურებისაგან, დაბრუნდა თავის სახლში.

⁵და როცა ქალი დაორსულდა, შეუთვალა დავითს: „ფეხმძიმედა ვარ.“

⁶და შეუთვალა დავითმა იოაბს: გამომიგზავნეო ურია ხეთელი. და გამოუგზავნა იოაბმა დავითს ურია ხეთელი.

⁷როცა მოვიდა მასთან ურია ხეთელი, გამოჰკითხა დავითმა იოაბის, ჯარისა და ბრძოლის მსვლელობის ამბავი.

⁸უთხრა დავითმა ურიას: „შინ წადი და ფეხი დაიბანე.“ გავიდა ურია მეფის სახლიდან და მეფის სუფრიდან საჭმელი გააყოლეს უკან.

⁹ურიამ ის ღამე მეფის სახლის კართან გაათია თავისი ბატონის კარისკაცებთან ერთად, შინ არ წასულა.

¹⁰და როცა შეიტყო დავითმა, რომ ურია შინ არ წასულა, უთხრა მას: „ხომ ნამგზავრი იყავი, რატომ არ წახვედი შინ?“

¹¹და უთხრა ურიამ დავითს: „როცა უფლის კიდობანი, ისრაელი და იუდა კარვებში არიან, ჩემი ბატონი იოაბი და ჩემი ბატონის ხალხი ველზე დგანან, შინ როგორ წავიდე? როგორ ვჭამო და ვსვა, როგორ დავწვე ცოლთან? შენს სიცოცხლეს ვფიცავ, ვერ ვიზამ ამ საქმეს!“

¹²და უთხრა დავითმა ურიას: „დღესაც დარჩი აქ და ხვალ გაგაგზავნი.“ და დარჩა ურია იერუსალიმში ის ორი დღე.

¹³და მოიწვია იგი დავითმა, ჭამა და სვა მის წინაშე, და დაათრო იგი. და საღამოთი გავიდა, რომ თავისი ბატონის მსახურებთან ერთად დაეძინა თავის საგებელზე. შინ არ წასულა.

¹⁴და დილით დაწერა დავითმა წერილი იოაბისთვის და ურიას ხელითვე გაუგზავნა.

¹⁵წერილში ასე ეწერა: „დააყენეთ ურია იქ, სადაც სასტიკი ბრძოლა მოგელით, და მერე მიატოვეთ, რათა გაიგმიროს და მოკვდეს.“

¹⁶და როცა ქალაქის ალყას ამზადებდა იოაბი, სწორედ იმ ადგილას დააყენა ურია, სადაც იცოდა, რომ მამაცი ხალხი იყო.

¹⁷და გამოვიდნენ ქალაქის მცხოვრებნი და შეებნენ იოაბს. და დაეცნენ დავითის მსახურნი და მოკვდა ურია ხეთელიც.

¹⁸და გააგზავნა იოაბმა მოციქული მეფესთან ბრძოლის მთელი მსვლელობის შესატყობინებლად;

¹⁹და უბრძანა: „ბოლომდე უამბე მეფეს ბრძოლის ამბავი.

²⁰და, თუ ბრაზი მოერია მეფეს და გითხრა: ‘რატომ მიადექითო ქალაქს ასე ახლოს საომრად? განა არ იცოდით, რომ გალავნიდან დაგიწყებდნენ სროლას?

²¹ვინ განგმირა აბიმელექი, იერუბეშეთის ძე? განა დედაკაცმა არ დასცა გალავნიდან დოლაბის ნატეხი თავზე და მოკვდა იგი თებეცში? ახლოს რატომ მიადექით გალავანს?’ უთხარი: ურია ხეთელიც მოკვდა-თქო, შენი მსახური.“

²²და წავიდა მაცნე და ყველაფერი უამბო დავითს, რისთვისაც იოაბმა გააგზავნა.

²³და უთხრა მაცნემ დავითს: „როცა მოგვეძალნენ მტრები და ველზე გამოვიდნენ ჩვენს წინააღმდეგ, შევუტიეთ და ქალაქის კარიბჭემდე ვდიეთ.

²⁴და მშვილდოსნებმა ისრები დაუშინეს გალავნიდან შენს მსახურთ და ზოგნი დაიხოცნენ მეფის მსახურთაგან, მოკვდა ურია ხეთელიც, შენი მსახური.“

²⁵და უთხრა დავითმა მოციქულს: „ასე უთხარი იოაბს: ნუ გაწუხებს ეს ამბავი, რადგან ხან ერთს ფხრეწს მახვილი, ხან მეორეს. მაგრად შეუტიე ქალაქს და დაანგრიე-თქო; ასე გაამხნევე იოაბი.“

²⁶როცა შეიტყო ურიას ცოლმა, რომ ქმარი მოუკვდა, დაიტირა იგი.

²⁷და როცა გლოვის დღეები გავიდა, მოაყვანინა დავითმა ქალი თავის სახლში და ცოლად დაისვა; და უშვა ქალმა ძე. და ეს საქმე, რაც დავითმა ჩაიდინა, არ მოიწონა უფალმა.