Read სბს–2013 2 მეფეთა 12 Bible Online

2 მეფეთა 12 - სბს–2013 bible

2 მეფეთა 12

¹და მიუგზავნა უფალმა დავითს ნათანი და როცა მივიდა ის მასთან, უთხრა: „ორი კაცი ცხოვრობდა ერთ ქალაქში, ერთი – მდიდარი და მეორე – ღარიბი.

²მდიდარს უამრავი ცხვარი და ძროხა ჰყავდა;

³ღარიბს ერთი ბატკნის მეტი არაფერი გააჩნდა, რომელიც პატარა იყიდა და გამოკვება. და გაიზარდა ის მასთან და მის ბავშვებთან ერთად. მის ლუკმას ჭამდა, მისი თასით სვამდა, მის უბეში ეძინა, და მასაც თავისი ასულივით ჰყავდა.

⁴მაგრამ როცა ერთხელ მდიდარ კაცს ერთი ვინმე მგზავრი ეწვია, ვერაფერი გაიმეტა თავისი ცხვარ-ძროხიდან დასაკლავად და მის გასამასპინძლებლად, წამოიყვანა ღარიბი კაცის ბატკანი და მოუმზადა სტუმარს.“

⁵დიდად განრისხდა დავითი იმ კაცზე და უთხრა ნათანს: „უფალს ვფიცავ, სიკვდილის ღირსია ამის გამკეთებელი კაცი!

⁶ბატკანი ოთხმაგად უნდა ზღოს, ასეთი საქმე რომ გააკეთა და ასე შეუბრალებლად მოიქცა.“

⁷და უთხრა ნათანმა დავითს: „შენა ხარ ის კაცი. ასე ამბობს უფალი, ისრაელის ღმერთი: ‘მე გცხე მეფედ ისრაელზე, მე დაგიხსენი საულის ხელიდან,

⁸მე მოგეცი შენი ბატონის სახლი და მოგიწვინე შენი ბატონის ცოლები შენს წიაღში, მოგეცი ისრაელისა და იუდას სახლი, და, თუ ეს არ კმაროდა, კიდევ მეტს დაგიმატებდი.

⁹რატომ დაივიწყე უფლის სიტყვა და გააკეთე ის, რაც ბოროტებაა მის თვალში? მახვილით მოჰკალი ურია ხეთელი და ცოლად დაისვი მისი ქვრივი; ის კი ყამონიანთა მახვილით მოჰკალი.

¹⁰ამიერიდან მახვილი არ მოსცილდება შენს სახლს უკუნისამდე, რადგან უგულებელმყავ და ურია ხეთელის ქვრივი მოიყვანე, რომ ცოლად დაგესვა.’

¹¹ასე ამბობს უფალი: ‘აჰა, უბედურებას დაგათევ შენივე სახლიდან, ავიყვან შენს თვალწინ შენს ცოლებს და შენს მახლობელს მივცემ, მზისით დაწვება ის შენს ცოლებთან;

¹²თუმცა შენ ჩუმად გააკეთე, მე მთელი ისრაელის წინაშე და მზისით გავაკეთებ ამას.’“

¹³და უთხრა დავითმა ნათანს: „შევცოდე უფლის წინაშე.“ და უთხრა ნათანმა დავითს: „უფალმა მოგიტევა შენი ცოდვა: შენ არ მოკვდები.

¹⁴ოღონდ, რაკი ამ საქციელით უფლის ლანძღვის საბაბი მიეცი მტრებს, შვილი მოგიკვდება, რომელიც შეგეძინა.“

¹⁵და წავიდა ნათანი თავის სახლში. და შეეხო უფალი ბავშვს, ურიას ცოლმა რომ უშვა დავითს, და მძიმედ დასნეულდა ბავშვი.

¹⁶ევედრებოდა დავითი ღმერთს ყმაწვილის გამო, და მარხულობდა დავითი და მიწაზე ათევდა ღამეს განმარტოებული.

¹⁷და დაადგნენ თავზე მისი სახლის უხუცესები, რომ მიწიდან აეყენებინათ იგი, მაგრამ არ შეწყვიტა მარხვა და არ ჭამა პური.

¹⁸მეშვიდე დღეს მოკვდა ბავშვი. ვერ გაბედეს დავითის მსახურებმა მოეხსენებინათ ბავშვის სიკვდილის ამბავი, რადგან ასე ფიქრობდნენ: „ვიდრე ბავშვი ცოცხალი იყო, რა არ ვუთხარით, და არ გაიგონა ჩვენი სიტყვა, ახლა როგორღა ვუთხრათ, რომ მკვდარია ბავშვი? უბედურებას აუტეხს თავს.“

¹⁹და დაინახა დავითმა, რომ ერთმანეთში ჩურჩულებენ მისი მსახურნი. მიხვდა დავითი, რომ ბავშვი მომკვდარიყო, და უთხრა თავის მსახურთ: „მოკვდა ბავშვი?“ უთხრეს: „მოკვდა.“

²⁰და ადგა მიწიდან დავითი, დაიბანა და ზეთი იცხო, სამოსელი გამოიცვალა და წავიდა უფლის სახლში და თაყვანი სცა. დაბრუნდა სახლში, პური მოითხოვა, მიართვეს და ჭამა.

²¹უთხრეს მისმა მსახურებმა: „რას ნიშნავს ეს შენი საქციელი? სანამ ბავშვი ცოცხალი იყო, მარხულობდი და ტიროდი, ხოლო როგორც კი მოკვდა, წამოდექი და პური ჭამე?“

²²მან თქვა: „ვიდრე ბავშვი ცოცხალი იყო, ვმარხულობდი და ვტიროდი, რადგან ვფიქრობდი: ვინ იცის? იქნებ შემიწყალოს უფალმა და გადამირჩეს-მეთქი ბავშვი.

²³ახლა, როცა ის მკვდარია, რისთვის ვიმარხულო? შევძლებ მის უკან დაბრუნებას? მე ადვილად წავალ მასთან, ის კი აღარ დამიბრუნდება.“

²⁴და როცა ანუგეშა დავითმა ბათშებაყი, თავისი ცოლი, შევიდა და დაწვა მასთან. და შვა ქალმა ვაჟი, და უწოდა დავითმა სახელად სოლომონი. უფალმა შეიყვარა იგი

²⁵და გააგზავნა ნათან წინასწარმეტყველი და მან უფლის სიტყვისამებრ სახელად უწოდა იედიდია.

²⁶ებრძოდა იოაბი ყამონიანთა რაბას და აიღო სამეფო ქალაქი.

²⁷და გამოუგზავნა იოაბმა დავითს მოციქულნი და შემოუთვალა: „ვებრძვი რაბას და ხელში მაქვს ჩაგდებული ქალაქის წყალსატევი.

²⁸ახლა შეკრიბე დანარჩენი ხალხი, შემოადექი ქალაქს და აიღე, თორემ, თუ მე ავიღებ ქალაქს, ჩემი სახელი დაერქმევა.“

²⁹და შეკრიბა დავითმა მთელი ხალხი და წავიდა რაბასკენ, თავს დაესხა და დაიპყრო.

³⁰და აიღო დავითმა მათი მეფის გვირგვინი, ერთი ოქროს ტალანტის წონისა, ძვირფასი ქვებით მოჭედილი, და თავზე დაიდგა. და აურაცხელი ნადავლი წამოიღო დავითმა ქალაქიდან.

³¹და გამოიყვანა იქ მყოფი ხალხი და აგურის კეთება დააკისრა. ქალაქი კი მიწასთან გაასწორა ხერხებით, რკინის ქანჩებითა და ცულებით. ასე მოექცა ყამონიანთა ყველა ქალაქს და კვლავ დაბრუნდნენ დავითი და მთელი ხალხი იერუსალიმში.