Read სბს–2013 2 მეფეთა 15 Bible Online

2 მეფეთა 15 - სბს–2013 bible

2 მეფეთა 15

¹ამის შემდეგ იყო, რომ გაიჩინა აბესალომმა ეტლები და ცხენები და 50 მალემსრბოლი.

²და ადგებოდა დილაადრიანად აბესალომი, დადგებოდა კარიბჭის გზასთან და ყველას, ვისაც კი საჩივარი ჰქონდა და მეფესთან მოდიოდა სამართლის საძებრად, თავისთან იხმობდა და ეუბნებოდა: „რომელი ქალაქიდან ხარ?“ და როცა ეტყოდნენ: ისრაელის ამა და ამ ტომიდან არისო შენი მსახური,

³ეტყოდა აბესალომი: „სასიკეთო და სამართლიანია შენი საქმე, მაგრამ ვინ მოგისმენს მეფის კარზე!“

⁴და დასძენდა აბესალომი: „ნეტავ მსაჯულად დამადგინონ ამ ქვეყანაში! ყველა მე მომაკითხავდა, ვისაც კი სადაო საქმე და საჩივარი ექნებოდა, და მეც სამართალს გავუჩენდი.“

⁵თაყვანის საცემად მისულ კაცს ხელს გაუწვდიდა, მოეხვეოდა და აკოცებდა.

⁶ამგვარად ექცეოდა აბესალომი ყველა ისრაელის ძეს, ვინც კი მეფესთან მიდიოდა სამართლისათვის. და ასე მოიგო აბესალომმა ისრაელიანთა გული.

⁷და ოთხი წლის თავზე უთხრა აბესალომმა მეფეს: „წავალ ხებრონში და შევუსრულებ უფალს აღთქმას, რომელიც დადებული მაქვს,

⁸რადგან ასეთი აღთქმა დადო შენმა მსახურმა გეშურში, არამში ყოფნისას: თუ დამაბრუნებს უფალი იერუსალიმში, მსხვერპლს შევწირავო უფალს.“

⁹და უთხრა მეფემ: „მშვიდობით გევლოს!“ და ადგა და წავიდა ხებრონს.

¹⁰მაცნეები დაგზავნა აბესალომმა ისრაელის ყველა ტომში და შეუთვალა: „ბუკის ხმის გაგონებისთანავე გამოაცხადეთ: აბესალომი გამეფდაო ხებრონში!“

¹¹ორას კაცს დაუძახა აბესალომმა და გაიყოლა იერუსალიმიდან, და ისინიც ალალად გაჰყვნენ, არ იცოდნენ რა ხდებოდა.

¹²და გილონელი ახითოფელიც, დავითის მრჩეველი, დაიბარა აბესალომმა მისი ქალაქიდან – გილოდან, მსხვერპლშეწირვაზე. და განმტკიცდა შეთქმულება და უამრავმა ხალხმა იწყო დენა აბესალომისკენ.

¹³მივიდა მაცნე დავითთან და უთხრა: „აბესალომს მიემხრო მთელი ისრაელი.“

¹⁴და უთხრა დავითმა თავის მსახურთ და ყველას, ვინც კი თან ახლდა იერუსალიმში: „ადექით და გავიქცეთ, თორემ ვერ გადავურჩებით აბესალომს. იჩქარეთ წასვლა, რომ არ მოგვისწროს და არ შეგვიპყროს, და უბედურება არ დაგვათიოს თავს, მახვილს არ მისცეს ქალაქი.“

¹⁵და უთხრეს მეფის მსახურებმა მეფეს: „გადაწყვიტოს ჩვენმა მეფე-ბატონმა და აჰა, ჩვენც აქა ვართ, შენი მსახურნი.“

¹⁶და გავიდა მეფე და ფეხით მიჰყვა მას მთელი სახლი. მხოლოდ ათი ხარჭა დატოვა მეფემ სახლის საპატრონოდ.

¹⁷და როცა გავიდა მეფე, ფეხდაფეხ მიჰყვა მას მთელი ხალხი, და დადგნენ ერთ განაპირა სახლში.

¹⁸მხარდამხარ მიჰყვებოდნენ მისი მსახურნი, ხოლო ქერეთელები, ფელეთელები და გათელები – 600 კაცი, გათიდან რომ წამოჰყვა მას, წინ მიუძღოდნენ მეფეს.

¹⁹და უთხრა მეფემ ითაი გათელს: „შენ რაღას მოგვყვები? გაბრუნდი და დარჩი იმ მეფესთან, რადგან უცხოელი ხარ და შენი ადგილიდან გადმოხვეწილი.

²⁰გუშინ მოხვედი და დღეს როგორ გაიძულო ჩვენთან ერთად წამოსვლა? მე წავალ, სადაც იქნება; შენ კი გაბრუნდი და უკან გააბრუნე შენი ძმები. წყალობა და ჭეშმარიტება იყოს შენთან!“

²¹მიუგო ითაიმ მეფეს და უთხრა: „უფალს და ჩემს მეფე-ბატონს ვფიცავ: სადაც არ უნდა იყოს ჩემი მეფე-ბატონი, სიკვდილსაცა და სიცოცხლეშიც, შენს გვერდით იქნება შენი მსახური.“

²²და უთხრა დავითმა ითაის: „წამოდი და იარე.“ და წაჰყვა ითაი გათელი და მთელი მისი ხალხი და მთელი მისი წვრილფეხობა, ვინც კი მასთან იყო.

²³და ხმამაღლა ტიროდა მთელი ქვეყანა, ვიდრე ეს ხალხი ჩაივლიდა. და გადალახა მეფემაც კიდრონის ხევი და მთელი ხალხი დაადგა უდაბნოს გზას.

²⁴და აჰა, ცადოკს და მასთან ერთად ყველა ლევიანს მოჰქონდათ ღვთის აღთქმის კიდობანი. და დაასვენეს ღვთის კიდობანი. და მაღლობზე იდგა აბიათარი, ვიდრე მთლიანად არ გამოვიდა ხალხი ქალაქიდან.

²⁵და უთხრა მეფემ ცადოკს: „დააბრუნე ქალაქში ღვთის კიდობანი. თუ მადლი მიპოვია უფლის თვალში, მეც დამაბრუნებს და მახილვინებს მას და მის ადგილსამყოფელს.

²⁶და თუ ბრძანებს, აღარ მინდიხარო, სადღა წავალ? მიყოს, რასაც ინებებს.“

²⁷და უთხრა მეფემ ცადოკ მღვდელს: „აბა, მშვიდობით დაბრუნდი ქალაქში, ახიმაყაცი, შენი ძე, და იონათანი, აბიათარის ძე, თქვენი ორივე შვილი თქვენთან ერთად;

²⁸იცოდეთ, უდაბნოს ვაკობზე დაველოდები, ვიდრე ამბავი არ მომივა თქვენგან.“

²⁹და გააბრუნეს ცადოკმა და აბიათარმა ღვთის კიდობანი იერუსალიმში და იქ დარჩნენ.

³⁰ხოლო დავითი შეუდგა ზეთისხილის მთას ფეხშიშველი და თავდაბურული; ადიოდა და ტიროდა; და ასევე მასთან მყოფი მთელი ხალხი თავდაბურული მოთქმა-გოდებით ადიოდა.

³¹და როცა შეატყობინეს დავითს: ახითოფელიც შეთქმულებაში არისო აბესალომთან, დავითმა თქვა: „უფალო, სიგიჟედ აქციე ახითოფელის თათბირი.“

³²და მიაღწია დავითმა მთის თხემამდე, სადაც თაყვანი სცა ღმერთს, და აჰა, მოდის ხუშაი არქელი, ღვთის ერთგული, სამოსელშემოგლეჯილი და თავზე მტვერდაყრილი.

³³და უთხრა დავითმა: „თუ წამომყვები, ტვირთად დამაწვები,

³⁴ხოლო თუ ქალაქში გაბრუნდები და ეტყვი აბესალომს: შენი მსახური ვარ, მეფევ; როგორც აქამდე მამაშენის მსახური ვიყავი, ამიერიდან შენი მსახური ვარ-თქო, ამით გააცუდებ ჩემს სასარგებლოდ ახითოფელის თათბირს.

³⁵განა შენთან არ იქნებიან იქ მღვდლები: ცადოკი და აბიათარი? და ყველაფერს, რასაც გაიგონებ მეფის სასახლეში, ცადოკსა და აბიათარს – მღვდლებს – შეატყობინებ.

³⁶იქა ჰყავთ მათ ორი ვაჟი: ცადოკს – ახიმაყაცი და აბიათარს – იონათანი. მათ მიერ მომაწვდენთ ყველა ამბავს, რასაც გაიგებთ.“

³⁷და მივიდა ხუშაი, დავითის ერთგული, ქალაქში და აბესალომიც შევიდა იერუსალიმში.