Read სბს–2013 2 მეფეთა 17 Bible Online

2 მეფეთა 17 - სბს–2013 bible

2 მეფეთა 17

¹და უთხრა ახითოფელმა აბესალომს: „შემარჩევინე 12 ათასი კაცი, ავდგები და ამაღამვე დავედევნები დავითს.

²თავს დავესხმები, ვიდრე დაღლილი და მკლავმოდუნებულია. შიშის ზარს დავცემ და გაეფანტება მთელი ხალხი, ვინც მასთან არის, და მოვკლავ მარტოდ დარჩენილ მეფეს.

³და შენსკენ მოვაქცევ მთელ ხალხს, და როგორც კი ყველა მობრუნდება, ვისაც ეძებ, მშვიდობით იქნება მთელი ხალხი.“

⁴და მოეწონათ ეს თათბირი აბესალომს და ისრაელის უხუცესობას.

⁵და თქვა აბესალომმა: „ხუშაი არქელსაც მოუხმეთ, მასაც მოვუსმინოთ, რას იტყვის.“

⁶როცა ხუშაი მივიდა აბესალომთან, უთხრა აბესალომმა: „ასე და ასე ლაპარაკობს ახითოფელი; მოვიქცეთ მისი სიტყვისამებრ? თუ არა და, შენ თქვი რამე.“

⁷მიუგო ხუშაიმ აბესალომს: „არ ივარგებს ამჯერად ახითოფელის თათბირი.“

⁸და თქვა ხუშაიმ: „ხომ იცნობ მამაშენს და მის კაცებს: მამაცები არიან და გამწარებულნი, როგორც ბელებწაგვრილი ძუ დათვი ველზე. მამაშენი მებრძოლი კაცია და ხალხთან ერთად არ დარჩებოდა ღამით.

⁹აჰა, ახლა, ალბათ, რომელიმე მღვიმეში ან სადმე სხვა ადგილას იმალება. თუ ბრძოლის დასაწყისშივე დამარცხდნენ ჩვენები და ხმა გავარდა: დამარცხდაო აბესალომის ხალხი,

¹⁰მაშინ უმამაცესნიც კი, რომელნიც ლომგულები არიან, შედრკებიან, რადგან მთელმა ისრაელმა იცის, რა მაგარი კაციც არის მამაშენი და რა მამაცი ხალხია მისი მომხრეები;

¹¹ამიტომ გირჩევ, შემოიკრიბო მთელი ისრაელი, დანიდან ბეერ-შებაყამდე, ზღვის ქვიშასავით უთვალავი, და შენ თავად გახვიდე საომრად.

¹²მივადგეთ მას, სადაც არ უნდა იმყოფებოდეს, თავს დავეცეთ, როგორც ცვარი ეცემა მიწას, და ერთ კაცსაც არ დავტოვებთ ცოცხალს მისი ხალხიდან.

¹³თუ რომელიმე ქალაქში ჩაიკეტება, მთელი ისრაელი თოკებს შემოარტყამს ქალაქს და ხევში ჩავათრევთ, ისე, რომ კენჭიც არ დარჩება იმ ადგილას.“

¹⁴და თქვა აბესალომმა და ყველა ისრაელის ძემ: „ხუშაი არქელის თათბირი სჯობია ახითოფელის თათბირს.“ უფალმა გადაწყვიტა, ჩაეშალა ახითოფელის უკეთესი თათბირი, რათა უბედურება დაეთია აბესალომისთვის.

¹⁵და უთხრა ხუშაიმ ცადოკ და აბიათარ მღვდლებს: „ასე და ასე ურჩია ახითოფელმა აბესალომს და ისრაელის უხუცესებს, ხოლო მე ასე და ასე ვურჩიე.

¹⁶ახლა საჩქაროდ გაუგზავნეთ და შეუთვალეთ დავითს: უდაბნოს ვაკეზე ნუ გაათევ ღამეს, გაღმა გადი-თქო, თორემ დაიღუპება მეფეც და მთელი მისი ხალხიც.“

¹⁷როგელის წყაროსთან იდგნენ იონათანი და ახიმაყაცი, როცა მივიდა მხევალი და უთხრა, წასულიყვნენ და ეცნობებინათ დავით მეფისთვის, რადგან ქალაქში გამოჩენა არ შეეძლოთ მათ.

¹⁸მაგრამ დაინახა ისინი ერთმა ყმაწვილმა და შეატყობინა აბესალომს, მაგრამ საჩქაროდ წავიდნენ ორივენი და მივიდნენ ბახურიმს, ერთი კაცის სახლში, რომელსაც ჭა ჰქონდა ეზოში და შიგ ჩავიდნენ.

¹⁹და ადგა იმ კაცის ცოლი და ქვეშსაფენი გადააფარა ჭას და ზედ ბურღული დააყარა. და დაიფარა კვალი.

²⁰როცა აბესალომის მსახურნი მივიდნენ ამ ქალთან სახლში და იკითხეს: „სად არიან ახიმაყაცი და იონათანი?“ ქალმა უთხრა: „წყალს გაღმა გავიდნენ.“ და ეძებეს, მაგრამ ვერ იპოვეს და იერუსალიმში დაბრუნდნენ.

²¹მათი წასვლის შემდეგ ამოვიდნენ ჭიდან და ამბავი მიუტანეს დავით მეფეს. უთხრეს: „ადექით და წყალგაღმა გადით, რადგან ასე და ასე ურჩია თქვენზე ახითოფელმა.“

²²და ადგა დავითი და მთელი მისი ხალხი და გადავიდნენ იორდანეზე. განთიადამდე არავინ დარჩენილა იორდანეს გაღმა გაუსვლელი.

²³და როცა დაინახა ახითოფელმა, რომ არ გავიდა მისი თათბირი, შეკაზმა სახედარი, გაემზადა და შინ წავიდა, თავის ქალაქში. ანდერძი დაუტოვა თავის სახლს და თავი ჩამოიხრჩო. და მოკვდა და თავისი მამის საძვალეში დამარხეს.

²⁴ამასობაში დავითი მივიდა მახანაიმში, ხოლო აბესალომმა გადალახა იორდანე და უკან მიჰყვა მას მთელი ისრაელი.

²⁵იოაბის ნაცვლად ყამასა დააყენა აბესალომმა მხედართმთავრად. ყამასას მამა იყო კაცი, სახელად ითრა იშმაყელელი, რომელიც შევიდა აბიგაილთან, ნახაშის ასულთან, ცერუიას დასთან, იოაბის დედასთან.

²⁶და დაიბანაკეს ისრაელმა და აბესალომმა გალაადის მიწაზე.

²⁷როცა დავითი მახანაიმში მივიდა, შობი ნახაშის ძემ რაბადან, ყამონიანთაგანმა და მაქირ ყამიელის ძემ ლო-დებარიდან და ბარზილაი გალაადელმა როგელიმიდან

²⁸ქვეშაგებელი, თასები და თიხის ჭურჭელი, ხორბალი და ქერი, ფქვილი და ქუმელი, ცერცვი და ოსპი,

²⁹თაფლი და ერბო, ცხვარი და ხბორები მიართვეს დავითსა და მის ხალხს საჭმელად, რადგან ფიქრობდნენ, მშიერ-მწყურვალნი და დაქანცულნი მოვიდოდნენო უდაბნოდან.