Read სბს–2013 2 მეფეთა 20 Bible Online

2 მეფეთა 20 - სბს–2013 bible

2 მეფეთა 20

¹და მოხვდა იქ ერთი უგვანი კაცი, სახელად შებაყი, ბიქრის ძე, ბენიამინელი; ბუკი დაჰბერა მან და გამოაცხადა: „არა გვაქვს წილი დავითთან, არა გვაქვს წილი იესეს ძესთან! ყველა თავის კარვებისაკენ, ისრაელიანებო!“

²და ზურგი აქცია დავითს ისრაელმა და გაჰყვნენ შებაყს, ბიქრის ძეს, ხოლო იუდა არ მოშორებია თავის მეფეს იორდანედან იერუსალიმამდე.

³და დაბრუნდა მეფე იერუსალიმში თავის სახლში. და გამოიყვანა მეფემ ათი ხარჭა, სახლის საპატრონოდ რომ ჰყავდა დატოვებული და მოათავსა განსაკუთრებულ სახლში დაცვის მიჩენით, და არჩენდა მათ, მაგრამ არ შედიოდა მათთან. და გამოკეტილნი იყვნენ სიკვდილის დღემდე, და ქვრივებივით ცხოვრობდნენ.

⁴და უთხრა მეფემ ყამასას: „სამ დღეში შემიყარე იუდა და შენც აქ მეახლე.“

⁵და წავიდა ყამასა იუდას მოსახმობად, მაგრამ გადააცილა მისთვის დაწესებულ ვადას.

⁶მაშინ უთხრა დავითმა აბიშაის: „აბესალომზე უფრო მეტად გვიბოროტებს ახლა შებაყი, ბიქრის ძე. წაიყვანე შენი ბატონის მსახურნი და დაედევნე, რათა გამაგრებული ქალაქები არ იპოვოს და არ მიეფაროს ჩვენს თვალთაგან.“

⁷და გაჰყვა მას იოაბის ხალხი, და ქერეთელნი და ფელეთელნი, და გავიდა ყველა მამაცი იერუსალიმიდან შებაყის, ბიქრის ძის მდევრად.

⁸გიბეონში დიდ ლოდთან რომ მივიდნენ, ყამასა წარუდგა მათ. იოაბი აბჯარში იჯდა და ხმალი ერტყა, რომელიც თეძოზე დასთრევდა ქარქაშით, რომლიდანაც იოლი ამოსაძრობი იყო.

⁹და უთხრა იოაბმა ყამასას: „ხომ მშვიდობით ხარ, ძმაო?“ და წვერზე მოჰკიდა იოაბმა ყამასას მარჯვენა ხელი საკოცნელად.

¹⁰და ვერ დაიცვა თავი ყამასამ მახვილისაგან, იოაბს რომ ეჭირა ხელში, და ჩასცა იოაბმა ფერდში და ნაწლავები გადმოაყრევინა მიწაზე. მეორედ აღარ ჩაუცია, მკვდარი იყო. და დაედევნენ იოაბი და მისი ძმა აბიშაი შებაყ ბიქრის ძეს.

¹¹თავზე ედგა მოკლულს იოაბის მსახურთაგანი და ამბობდა: ვისაც იოაბი უყვარს და ვინც დავითის მხარეზეა, იოაბს გაჰყვესო!

¹²სისხლში მოსვრილი ეგდო ყამასა შუა გზაზე. დაინახა იმ კაცმა, რომ ჩერდებოდა ხალხი, და გზიდან გადაათრია ყამასა მინდორში, და მოსასხამი წააფარა, რადგან ხედავდა, რომ ყველა ჩერდებოდა, ვინც კი თავს წაადგებოდა გვამს.

¹³და როცა გზიდან გადაათრიეს ის, ყველანი იოაბს გაჰყვნენ, რათა შებაყ ბიქრის ძეს დასდევნებოდნენ.

¹⁴მან კი ისრაელის ყველა ტომი გაიარა აბელ-ბეთ-მაყაქამდე. შეიკრიბა ყველა ბერიელი და გაჰყვა მას.

¹⁵როცა მოვიდა იოაბის ხალხი, მოიმწყვდიეს იგი აბელ-ბეთ-მაყაქაში. და აღმართეს ქალაქის წინ მიწაყრილი და მიადგნენ კედელს. მთელი ხალხი, იოაბს რომ ახლდა, ცდილობდა კედლის განგრევას.

¹⁶და დაიძახა ერთმა გონიერმა დედაკაცმა ქალაქის კედლიდან: „მომისმინეთ! მომისმინეთ! უთხარით იოაბს, რომ ახლოს მოვიდეს, სიტყვა მაქვს სათქმელი!“

¹⁷და მიუახლოვდა მას იოაბი და თქვა დედაკაცმა: „შენა ხარ იოაბი?“ მიუგო: „მე ვარ.“ უთხრა: „ყური უგდე შენი მხევლის სიტყვას.“ და თქვა: „გისმენ.“

¹⁸უთხრა დედაკაცმა: „ასე იტყოდნენ ძველად: ვისაც კითხვა სურს, აბელში იკითხოსო. – და ისე წყვეტდენ საქმეს.

¹⁹მე ისრაელის ერთი მშვიდობიანი და პატიოსანი ქალაქთაგანი ვარ. შენ გინდა გაანადგურო ქალაქი, დედა ისრაელისა? რატომ სპობ უფლის სამკვიდროს?“

²⁰მიუგო იოაბმა და უთხრა: „შორს, შორს ჩემგან მისი ნგრევა და განადგურება!

²¹აქ სხვა ამბავია: ერთმა კაცმა ეფრემის მთიდან, სახელად შებაყ ბიქრის ძემ, ხელი აღმართა მეფე დავითზე. მხოლოდ ის მოგვეცით და დავეხსნები ქალაქს.“ და უთხრა დედაკაცმა იოაბს: „კეთილი. გალავნიდან გადმოგიგდებენ მის თავს.“

²²და მივიდა დედაკაცი ხალხთან თავისი გონივრული სიტყვით. და მოკვეთეს თავი შებაყ ბიქრის ძეს და გადაუგდეს იოაბს. და ბუკსა სცა მან, და ყველანი მოსცილდნენ ქალაქს და თავ-თავის კარვებში მიმოიფანტნენ. ხოლო გაბრუნდა იოაბი იერუსალიმში მეფესთან.

²³იოაბი სარდლობდა ისრაელის მთელ ლაშქარს, ხოლო ბენაია იეჰოიადაყის ძე – ქერეთელებსა და ფელეთელებს;

²⁴და ადორამი ხარკის აკრეფას განაგებდა. და იოშაფატ ახილუდის ძე მემატიანე იყო;

²⁵შევა მწიგნობარი იყო, ცადოკი და აბიათარი კი – მღვდლები,

²⁶იაირელი ყირაც მღვდელი იყო დავითთან.