Read სბს–2013 2 მეფეთა 21 Bible Online

2 მეფეთა 21 - სბს–2013 bible

2 მეფეთა 21

¹დავითის დღეებში ზედიზედ სამ წელიწადს შიმშილობა იყო ქვეყანაში. და დაეკითხა დავითი უფალს. და უთხრა უფალმა: „საულისა და მისი სისხლიანი სახლის გამოა, გიბეონელნი რომ გაწყვიტაო.“

²დაიბარა მეფემ გიბეონელნი და ელაპარაკა მათ. გაბაონელნი არა ისრაელიანები, არამედ დარჩენილ ამორეველთა შთამომავალნი იყვნენ. ისრაელიანებმა შეჰფიცეს მათ, მაგრამ საული ცდილობდა მათ გაწყვეტას ისრაელიანთა და იუდას მიმართ შურის გამო.

³და უთხრა დავითმა გიბეონელებს: „რა გაგიკეთოთ, რომ გამოვისყიდო ცოდვა და აკურთხოთ უფლის სამკვიდრო?“

⁴და უთხრეს გიბეონელებმა: „არც ვერცხლი და არც ოქრო არ გვინდა საულისგან და მისი სახლისგან. არც იმას მოვითხოვთ, რომ ვინმე მოკლან ისრაელში.“ და თქვა მეფემ: „რასაც იტყვით, აგისრულდებათ.“

⁵და უთხრეს მეფეს: „რაკი გვანადგურებდა ის კაცი და ჩვენს გადაშენებას ცდილობდა ისრაელის საზღვრებიდან,

⁶უნდა ჩაგვაბარონ შვიდი კაცი მის ძეთაგან და ჩვენ ჩამოვკიდებთ მათ უფლის წინაშე საულის გიბყაში, უფლის მთაზე.“ მეფემ თქვა: „ჩაგაბარებთ.“

⁷და დაინდო მეფემ მეფიბოშეთი, ძე იონათანისა, საულის ძისა, და უფლის ფიცის გამო, რომელიც დაიდო მათ შორის – დავითსა და იონათან საულის ძეს შორის.

⁸და წამოიყვანა მეფემ ორი ძე რიცფასი, აიას ასულისა, რომელმაც უშვა საულს არმონი და მეფიბოშეთი; და წამოიყვანა ხუთი ძე მიქალისა, საულის ასულისა, რომლებიც მან უშვა ყადრიელს, მეხოლათელი ბარზილაის ძეს.

⁹და ხელთ მისცა გაბაონელებს, რომელთაც ისინი ჩამოჰკიდეს მთაზე უფლის წინაშე. და დაიღუპა შვიდივე ერთად. მოიკლნენ ისინი ქერების მკის პირველ დღეებში.

¹⁰და აიღო რიცფამ, აიას ასულმა ჯვალო, დაიფინა კლდესთან და იყო იქ მკის დაწყებიდან, ვიდრე ციურმა წყალმა არ იწვიმა მათზე. და უგერიებდა გვამებს დღისით ცის ფრინველებს და ღამით ველის ნადირს.

¹¹და შეატყობინეს დავითს, რაც გააკეთა რიცფამ, აიას ასულმა, საულის ხარჭამ.

¹²და წავიდა დავითი და წამოიღო საულის ძვლები და მისი ძის, იონათანის ძვლები გალაადის იაბეშის მკვიდრთაგან, რომელთაც მოიპარეს ისინი ბეთ-შანის მოედნიდან, სადაც ფილისტიმელებმა ჩამოჰკიდეს, როცა მოკლეს ფილისტიმელებმა საული გილბოაყში.

¹³და ამოიტანა იქიდან საულის ძვლები და მისი ძის, იონათანის ძვლები; და მოკრიფეს ჩამოკიდებულთა ძვლები.

¹⁴და დამარხეს საულისა და მისი ძის, იონათანის ძვლები ბენიამინის ქვეყანაში, ცელაყში, კიშის, მისი მამის სამარხში. და ყველაფერი შეასრულეს, რაც ბრძანა მეფემ. ამის შემდეგ მოიღო ღმერთმა ქვეყანაზე მოწყალება.

¹⁵და კვლავ მოხდა ბრძოლა ფილისტიმელებსა და ისრაელს შორის. და გამოვიდა დავითი თავისი მსახურებითურთ. და შეებრძოლნენ ისინი ფილისტიმელებს. და მოიქანცა დავითი.

¹⁶მაშინ იშბი-ბენობმა, რაფას ნაშიერთაგანმა, რომელსაც 300 შეკელიანი ბრინჯაოს შუბი ჰქონდა და ახალი მახვილი ერტყა წელზე, დავითის მოკვლა განიზრახა.

¹⁷და მიეშველა მეფეს აბიშაი, ცერუიას ძე, და დაჰკრა ფილისტიმელს და მოკლა. მაშინ დავითის კაცებმა დააფიცეს ის და უთხრეს: „აღარ გამოხვიდე ჩვენთან ერთად საომრად, რომ არ ჩააქრო ისრაელის ლამპარი.“

¹⁸ამის შემდეგ კვლავ მოხდა ბრძოლა ფილისტიმელებთან გობში. მაშინ სიბექაი ხუშათელმა განგმირა საფი, რომელიც რაფას ნაშიერთაგანი იყო.

¹⁹კიდევ მოხდა ბრძოლა გობში ფილისტიმელებთან, და ელხანანმა, იაყარე-ორეგიმის ძემ, ბეთლემელმა, განგმირა გათელი გოლიათი, რომლის შუბის ტარი საქსელე ლილვის სიმსხო იყო.

²⁰კიდევ მოხდა ბრძოლა გათში, და იყო იქ უზარმაზარი კაცი, რომელსაც ხელებზე და ფეხებზე ექვს-ექვსი თითი ესხა – სულ 24. ისიც რაფას ნაშიერი იყო.

²¹და დასცინოდა ისრაელს, მაგრამ განგმირა იგი იონათანმა, შიმეყას ძემ, დავითის ძმისწულმა.

²²ეს ოთხნი იყვნენ რაფას ნაშიერთაგან გათში და ყველანი დავითისა და მის მსახურთა ხელით დაეცნენ.