Read სბს–2013 2 მეფეთა 24 Bible Online

2 მეფეთა 24 - სბს–2013 bible

2 მეფეთა 24

¹კვლავ აღიგზნო უფლის რისხვა ისრაელზე და წააქეზა მან დავითი მათ წინააღმდეგ, და ათქმევინა: „წადი, აღრიცხე ისრაელი და იუდა.“

²და უთხრა მეფემ იოაბს, თავისი ლაშქრის მხედართმთავარს, რომელიც მასთან იყო: „შემოიარე ისრაელის ყველა შტო დანიდან ბეერ-შებაყამდე და აღრიცხე ხალხი, რომ ვიცოდე მათი რიცხვი.“

³და უთხრა იოაბმა მეფეს: „უფალმა, შენმა ღმერთმა შემატოს ერს ერთი ამდენი და კიდევ ასჯერ მეტი, და ამის მომსწრე გახადოს მეფე-ბატონი. მაგრამ რად ინება მეფე-ბატონმა ეს საქმე?“

⁴და იძალა მეფის სიტყვამ იოაბსა და ლაშქრის მხედართმთავრებზე. და გავიდნენ მეფისგან იოაბი და მხედართმთავრები ისრაელიანთა აღსარიცხად.

⁵და გავიდნენ იორდანეს გაღმა და ყაროყერში დაიბანაკეს, ქალაქის მარჯვნივ, გადის ხეობაში რომ მდებარეობს, იაყზერის პირდაპირ.

⁶და მივიდნენ გალაადში და კადეშში თახთიმ-ხოდშის მხარეში, იქიდან წავიდნენ დან-იაყანში და ციდონის მიდამოებში.

⁷მივიდნენ ცორის ციხესიმაგრესთან და მოიარეს ხიველთა და ქანაანელთა ყველა ქალაქი და გავიდნენ იუდას ნეგებში ბეერ-შებაყთან.

⁸და მოიარეს მთელი ქვეყანა და ცხრა თვისა და 20 დღის შემდეგ იერუსალიმში დაბრუნდნენ.

⁹და მიართვა იოაბმა მეფეს ხალხის აღრიცხვის გრაგნილი; და აღმოჩნდა ისრაელში 800 ათასი მებრძოლი, მახვილის მაშიშვლებელი, და იუდაში – 5 ათასი კაცი.

¹⁰და გულმა გაჰკრა დავითს მას შემდეგ, რაც აღრიცხა ხალხი. და უთხრა დავითმა უფალს: „დიდად შევცოდე, იმით, რაც გავაკეთე. ახლა გევედრები შენ, უფალო, მიუტევე შეცოდება შენს მსახურს, რადგან უგუნურად მოვიქეცი.“

¹¹და დილით, როცა ადგა დავითი, უფლის სიტყვა გამოეცხადა წინასწარმეტყველ გადს, დავითის მისანს:

¹²„წადი და უთხარი დავითს, ასე ამბობს-თქო უფალი: ‘სამს შემოგთავაზებ, ერთ-ერთი აირჩიე, რომ დაგსაჯო.’“

¹³და მივიდა გადი დავითთან და გამოუცხადა ეს ამბავი: „რა გიჯობს: შვიდწლიანი შიმშილი შენს ქვეყანაში, სამი თვის ლტოლვილება შენი მტრებისგან და მათგან შენი დევნა, თუ შავი ჭირი სამ დღეს შენს ქვეყანაში? ახლა იფიქრე და აწონ-დაწონე, რა პასუხი მივუტანო ჩემს მომავლინებელს.“

¹⁴და უთხრა დავითმა გადს: „მეტისმეტად დამწუხრებული ვარ, მაგრამ მიჯობს უფლის ხელში ჩავვარდე, რადგან დიდია მისი მოწყალება, ოღონდ კაცის ხელში ნუ ჩავვარდები.“

¹⁵და მოავლინა უფალმა შავი ჭირი ისრაელში იმ დილიდან დათქმულ დრომდე, და გაწყდა დანიდან ბეერ-შებაყამდე 70 ათასი კაცი.

¹⁶ხოლო როცა გაიწოდა ხელი ანგელოზმა იერუსალიმისკენ მის დასაღუპად, უფალმა აკმარა უბედურება და უთხრა ხალხის დამღუპველ ანგელოზს: „კმარა, ახლა უკან წაიღე ხელი!“ იებუსელი არავნას კალოსთან იდგა უფლის ანგელოზი.

¹⁷და უთხრა დავითმა უფალს ხალხის შემმუსვრელი ანგელოზის დანახვისას: „აჰა, მე კი შევცოდე და დავაშავე, მაგრამ ამ ცხვრებმა რა გააკეთეს? ჩემზე და მამაჩემის სახლზე იყოს შენი ხელი!“

¹⁸და მივიდა დავითთან გადი იმავე დღეს და უთხრა: „წადი და აღუმართე უფალს სამსხვერპლო არავნა იებუსელის კალოზე.“

¹⁹და წავიდა დავითი გადის სიტყვისამებრ, როგორც უბრძანა უფალმა.

²⁰და გამოიხედა არავნამ და დაინახა მისკენ მომავალი მეფე და მისი მსახურნი, და გამოვიდა არავნა და მდაბლად თაყვანი სცა მეფეს.

²¹და თქვა არავნამ: „რისთვის მოსულა მეფე-ბატონი თავის მსახურთან?“ უთხრა დავითმა: „შენგან კალოს საყიდლად და უფლის სამსხვერპლოს ასაგებად, რათა განერიდოს ხალხს ჟამიანობა.“

²²და უთხრა არავნამ დავითს: „აიღოს და აღავლინოს ჩემმა მეფე-ბატონმა, რაც ნებავს. აჰა, ხარები სრულადდასაწველად, აჰა, კევრი და ხარების უღლები სამსხვერპლო შეშად.

²³ყველაფერ ამას უძღვნის, მეფეო, არავნა მეფეს.“ და უთხრა არავნამ მეფეს: „უფალი, შენი ღმერთი გწყალობდეს!“

²⁴და უთხრა მეფემ არავნას: „არა, საფასურით უნდა ვიყიდო შენგან. ვერ შევწირავ უფალს, ჩემს ღმერთს, მუქთად მიღებულ სრულადდასაწველს.“ და იყიდა მეფემ კალო და ხარები 50 შეკელ ვერცხლად.

²⁵და აუგო დავითმა იქ უფალს სამსხვერპლო, აღავლინა სრულადდასაწველი და სამშვიდობო მსხვერპლი, და შეიწყალა უფალმა ქვეყანა და განერიდა ჟამიანობა ისრაელს.