Read სბს–2013 2 მეფეთა 4 Bible Online

2 მეფეთა 4 - სბს–2013 bible

2 მეფეთა 4

¹და როცა შეიტყო საულის ძემ, რომ მოკვდა აბნერი ხებრონში, მხნეობა წარეკვეთა, და მთელი ისრაელიც შეშფოთდა.

²ორი კაცი ჰყავდა საულის ძეს რაზმის მეთაურებად: ერთს ერქვა ბაყანა, მეორეს – რექაბი, რიმონ ბეეროთელის ძენი იყვნენ, ბენიამინის ძეთაგან, რადგან ბეეროთიც ბენიამინს ეთვლებოდა.

³თავად ბეეროთელნი გითაიმში გაიქცნენ და დღემდე იქ ხიზნობენ.

⁴და იონათანს, საულის ძეს, ერთი კოჭლი ძე ჰყავდა. ხუთი წლის იყო იგი, როცა საულისა და იონათანის ამბავი მოვიდა იზრეყელიდან, და ხელში აიტაცა იგი ძიძამ და გაიქცა. როცა გარბოდა, ხელიდან გაუვარდა ბიჭი და დაკოჭლდა. სახელად მას მეფიბოშეთი ერქვა.

⁵და წავიდნენ რიმონ ბეეროთელის ძენი: რექაბი და ბაყანა და დღის ხვატში მიადგნენ იშ-ბოშეთის სახლს. ის კი საწოლზე იწვა და ეძინა შუადღისით.

⁶და აჰა, რექაბი და მისი ძმა ბაყანა შევიდნენ სახლში, ვითომდა ხორბლის საყიდლად, და მეხუთე ნეკნთან ჩასცეს მახვილი და მიიმალნენ.

⁷როცა ისინი სახლში შევიდნენ, იშ-ბოშეთს თავის საწოლ ოთახში ეძინა ლოგინზე; მახვილი ჩასცეს, მოკლეს და თავი მოაჭრეს. და წამოიღეს მისი თავი და მთელი ღამე იარეს ყარაბას გზაზე.

⁸და მიუტანეს იშ-ბოშეთის თავი დავითს ხებრონში და უთხრეს მეფეს: „აჰა, იშ-ბოშეთის თავი, საულის, შენი მტრის ძისა, რომელსაც შენი მოკვლა უნდოდა, შური უძია უფალმა ჩემს მეფე-ბატონს საულზე და მის ნაშიერებზე.“

⁹და მიუგო დავითმა რექაბს და ბაყანას, მის ძმას, ბეეროთელი რიმონის ვაჟებს, და უთხრა: „უფალს ვფიცავ, რომელმაც მიხსნა ყოველი გასაჭირისგან!

¹⁰თუკი მაცნე, რომელმაც მაუწყა და მითხრა: ‘აჰა, მოკვდა საული!’ და კეთილის მაცნე ეგონა თავი, შევიპყარ და მოვკალი ციკლაგში, იმის ნაცვლად, რომ სამახარობლო მიმეცა,

¹¹რას იმსახურებენ ის ბოროტი კაცები, რომელთაც უდანაშაულო კაცი თავისსავე სახლში, თავის საწოლზე, მოკლეს? ახლა განა თქვენს ხელს არ უნდა მოვკითხო მისი სისხლი, და არ უნდა აღმოგფხვრათ ამ ქვეყნიდან?“

¹²და უბრძანა დავითმა მსახურებს და დახოცეს ისინი; ხელ-ფეხი დააჭრეს და ტბორზე გადმოჰკიდეს ხებრონში. ხოლო იშ-ბოშეთის თავი აიღეს და აბნერის საფლავში დამარხეს, ხებრონში.