Read სბს–2013 2 მეფეთა 8 Bible Online

2 მეფეთა 8 - სბს–2013 bible

2 მეფეთა 8

¹ამის შემდეგ იყო, რომ დაამარცხა დავითმა ფილისტიმელები და დაიმორჩილა ისინი. და გამოგლიჯა დავითმა ხელიდან ფილისტიმელებს მეთეგ-ამა.

²და დაამარცხა მოაბიც, მიწაზე წააწვინა ისინი და საბლით გაზომა: ორი საბელი დასახოცად გადაზომა, ერთი საბელი – ცოცხლად დასატოვებლად. და გახდნენ მოაბელები დავითის მორჩილნი და ხარკს უხდიდნენ მას.

³და დაამარცხა დავითმა ცობას მეფე ჰადადყეზერი, რეხობის ძე, როცა ის მდინარე ევფრატზე თავისი ბატონობის აღსადგენად მოდიოდა.

⁴და წაართვა მას დავითმა 1700 მხედარი და 20 ათასი ქვეითი. და ეტლის ცხენებს ძარღვები გადაუჭრა დავითმა, მხოლოდ 100 ეტლისთვის დაიტოვა ისინი.

⁵და მოვიდნენ დამასკოს არამელები ცობას მეფის, ჰადადყეზერის დასახმარებლად. და მუსრი გაავლო დავითმა არამელთა 22 ათას კაცს.

⁶და ჩააყენა დავითმა მეციხოვნენი შუა დამასკოს არამში. და გახდნენ არამელები დავითის მორჩილნი და აძლევდნენ ხარკს. საითაც კი გაიხედავდა დავითი, ყველგან ამარჯვებინებდა მას უფალი.

⁷აიღო დავითმა ოქროს ფარები, ჰადადყეზერის კაცებს რომ ჰქონდათ, და იერუსალიმში ამოიტანა.

⁸დიდძალი ბრინჯაო წამოიღო დავითმა ბეტახიდან და ბეროთაიდან – ჰადადყეზერის ქალაქებიდან.

⁹როცა შეიტყო თოყიმ, ხამათის მეფემ, რომ სძლია დავითმა ჰადადყეზერის მთელ ძალებს,

¹⁰გაგზავნა თავისი ძე იორამი დავით მეფესთან მოსაკითხად და მადლობის სათქმელად, რომ შეებრძოლა ჰადადყეზერს და სძლია მას, რადგან ჰადადყეზერს ომი ჰქონდა თოყისთან. იორამს მასთან მიჰქონდა ვერცხლის, ოქროსა და ბრინჯაოს ჭურჭელი,

¹¹ეს ჭურჭელიც უფალს შესწირა მეფე დავითმა იმ შეწირულ ოქრო-ვერცხლთან ერთად, დამორჩილებულ ხალხებს რომ წაართვა:

¹²არამელთ, მოაბელთ, ყამონიანებს, ფილისტიმელთ, ყამალეკს, აგრეთვე ცობას მეფე ჰადადყეზერს, რეხობის ძეს.

¹³გაითქვა სახელი დავითმა მარილოვან ველზე 18 ათასი ედომელის დამარცხებით.

¹⁴მან მეციხოვნენი ჩააყენა ედომში; მთელს ედომში აყენებდა მეციხოვნეებს, და გახდა მთელი ედომი დავითის მორჩილი. და უფალი ყველგან შეეწეოდა დავითს, საითაც კი წავიდოდა.

¹⁵და მეფობდა დავითი მთელს ისრაელზე, და კანონსა და სამართალს აძლევდა მთელ თავის ხალხს.

¹⁶იოაბი, ძე ცერუიასი, ჯარის სარდალი იყო, და იოშაფატი, ძე ახილუდისა – მემატიანე.

¹⁷ცადოკი, ძე ახიტუბისა და ახიმელექი, ძე აბიათარისა, მღვდლები იყვნენ; სერაია – მწიგნობარი;

¹⁸ბენაია, ძე იეჰოიადაყისა, ქერეთელებს და ფელეთელებს განაგებდა; დავითის შვილები კი ეზოსმოძღვრები იყვნენ.