Read სბს–2013 3 მეფეთა 12 Bible Online

3 მეფეთა 12 - სბს–2013 bible

3 მეფეთა 12

¹და წავიდა რეხობოყამი შექემში, რადგან იქ იყო მისული მთელი ისრაელი მის გასამეფებლად.

²ეს ამბავი იერობოყამ ნებატის ძემ ჯერ კიდევ ეგვიპტეში ყოფნისას შეიტყო, სადაც სოლომონ მეფის მიერ იყო დევნილი; და დაბრუნდა იერობოყამი ეგვიპტიდან.

³გაუგზავნეს მას კაცები და მოიწვიეს; მოვიდნენ იერობოყამი და ისრაელის მთელი კრებული და ასე უთხრეს მეფე რეხობოყამს:

⁴„მძიმე უღელი დაგვადგა მამაშენმა. ახლა შენ მაინც შეგვიმსუბუქე მამაშენის კირთები და მძიმე უღელი, მან რომ დაგვადგა, და მაშინ გაგიხდებით მსახურებად.“

⁵და უთხრა მათ: „ახლა წადით და სამი დღის შემდეგ მოდით ჩემთან.“ და წავიდა ხალხი.

⁶და რჩევა ჰკითხა მეფე რეხობოყამმა უხუცესებს, რომლებიც სოლომონის სიცოცხლეში მის წინაშე იდგნენ და უთხრა: „როგორ მირჩევდით, რა პასუხი გავცე ამ ხალხს?“

⁷ელაპარაკნენ ისინი მას და უთხრეს: „თუ დღეს მაგ ხალხის მსახური იქნები, მოემსახურები და დააკმაყოფილებ მათ, ლმობიერ სიტყვებს ეტყვი, მაშინ ისინი შენი მსახურნი იქნებიან სამარადჟამოდ.“

⁸ყური არ უგდო უხუცესების რჩევას და რჩევა ჭაბუკებს დაეკითხა, რომლებიც მასთან იყვნენ შეზრდილნი და გარს ეხვივნენ.

⁹და უთხრა მათ: „რას მირჩევთ, რა პასუხი გავცე მაგ ხალხს, რომ მეუბნებიან: შეგვიმსუბუქეო მამაშენის მძიმე უღელი?“

¹⁰და ელაპარაკნენ ჭაბუკები, მასთან რომ იყვნენ შეზრდილნი, და უთხრეს: „ასე უთხარი იმ ხალხს, რომელიც გელაპარაკა და გითხრა: უღელი დაგვიმძიმა მამაშენმა და ახლა შენ უნდა შეგვიმსუბუქოო: მამაჩემის წელზე მსხვილია ჩემი ნეკათითი;

¹¹ხომ დაგადგათ მამაჩემმა მძიმე უღელი, მე კიდევ უფრო დაგიმძიმებთ უღელს! ხომ გსჯიდათ შოლტებით მამაჩემი, მე მორიელებითჯალათის შოლტი, რომელსაც ბოლოზე ბასრი რკინის ნაჭრები ან გალესილი ლურსმები აქვს მიმაგრებული დაგსჯით-თქო!“

¹²და მოვიდნენ იერობოყამი და მთელი ხალხი მესამე დღეს რეხობოყამთან, როგორც ნაბრძანები ჰქონდა მეფეს – სამი დღის შემდეგ მოდითო ჩემთან.

¹³მკაცრად მიმართა მეფემ ხალხს; მან ყური არ ათხოვა უხუცესთა რჩევას.

¹⁴ახალგაზრდების რჩევის თანახმად დაელაპარაკა მათ და უთხრა: „ხომ დაგიმძიმათ მამაჩემმა უღელი, მე კიდევ უარესად დაგიმძიმებთ მას; ხომ შოლტებით გსჯიდათ მამაჩემი, მე მორიელებით დაგსჯით!“

¹⁵და არ მოუსმინა მეფემ ხალხის სათხოვარს, რადგან ასეთი იყო უფლის ნება – უნდა აღსრულებულიყო მისი სიტყვა, რაც ნათქვამი ჰქონდა იერობოყამ ნებატის ძისთვის ახია შილოელის პირით.

¹⁶და ნახა მთელმა ისრაელმა, რომ არ მოუსმინა მათ მეფემ. და სიტყვა შეუბრუნა ხალხმა მეფეს და უთხრა: „დავითთან ჩვენ რა გვესაქმება? საერთო რა გვაქვს იესეს ძესთან?! თქვენ თქვენი კარვებისკენ გასწით, ისრაელიანებო! ახლა შენ მიხედე შენს სახლს, დავით!“ – და თავ-თავისი კარვებისაკენ წავიდა ისრაელი.

¹⁷მხოლოდ იუდას ქალაქებში მცხოვრებ ისრაელიანებზეღა მეფობდა რეხობოყამი.

¹⁸და გაგზავნა მეფე რეხობოყამმა ადორამი, ხარკის ამკრეფი, მაგრამ ქვა დაუშინეს მას ისრაელიანებმა, და მოკვდა იგი. მაშინ სასწრაფოდ შეხტა ეტლზე მეფე რეხობოყამი, რათა იერუსალიმისკენ გაქცეულიყო.

¹⁹და განუდგა ისრაელი დავითის სახლს, და ასეა ეს დღემდე.

²⁰როცა შეიტყო მთელმა ისრაელმა, რომ ეგვიპტიდან დაბრუნდაო იერობოყამი, კაცები გაუგზავნეს, საკრებულოში დაიბარეს და გაამეფეს მთელს ისრაელზე. ერთადერთი იუდას ტომი შერჩა დავითის სახლს.

²¹და მივიდა რეხობოყამი იერუსალიმში და შეკრიბა იუდას მთელი სახლიდან და ბენიამინის შტოდან 180 ათასი რჩეული მეომარი, რათა შებრძოლებოდნენ ისრაელის სახლს და დაებრუნებინათ მეფობა სოლომონის ძის – რეხობოყამისათვის.

²²და გამოეცხადა ღვთის სიტყვა შემაყიას, ღვთისკაცს:

²³„ასე უთხარი რეხობოყამს, სოლომონის ძეს, იუდას მეფეს, იუდასა და ბენიამინის მთელს სახლს და დანარჩენ ხალხს:

²⁴ასე ამბობს-თქო უფალი: ‘ნუ გახვალთ საომრად თქვენს ძმებთან, ისრაელიანებთან; შინ გაბრუნდით ყველა, რადგან ჩემი ნებით მოხდა ეს ამბავი.’“ და დაიჯერეს უფლის სიტყვა და უფლის სიტყვისამებრ გაბრუნდნენ უკან.

²⁵და ააშენა იერობოყამმა შექემი ეფრემის მთაზე და იქ დასახლდა. მერე წავიდა იქიდან და ფენუელი ააშენა.

²⁶და ამბობდა თავის გულში იერობოყამი: კვლავ დაუბრუნდება მეფობა დავითის სახლს.

²⁷თუ ამ ხალხმა მსხვერპლის შესაწირად იერუსალიმში დაიწყო სიარული უფლის სახლში, გული მოუბრუნდებათ მათ თავისი ბატონის, იუდას მეფის, ეხობყამისკენ, მე მომკლავენ და რეხობოყამთან, იუდას მეფესთან დაბრუნდებიან.

²⁸და ითათბირა მეფემ, და გააკეთა ორი ოქროს ხბო. და უთხრა ხალხს: „გეყოფათ იერუსალიმში სიარული. აჰა, შენი ღმერთები, ისრაელო, რომელთაც ეგვიპტიდან გამოგიყვანეს.“

²⁹და ერთი ხბო ბეთელში დადგა, მეორე დანში გაგზავნა.

³⁰ეს იყო ცოდვის დასაბამი. და დაიწყო ხალხმა სიარული იმ ხბორების თაყვანის საცემად თვით დანამდე.

³¹და ააშენა გორაკზე ბომონი და განაწესა ხალხიდან გამოყვანილი მღვდლები, რომლებიც ლევიანები არ იყვნენ.

³²და დააწესა იერობოყამმა დღესასწაული მერვე თვეს, თვის მეთხუთმეტე დღეს, იმ დღესასწაულის მსგავსი, იუდაში რომ იმართებოდა, და მსხვერპლი აღავლინა სამსხვერპლოზე. ასევე გააკეთა ბეთელში, რომ მსხვერპლი შეეწირათ მის მიერ გაკეთებული ხბორებისთვის. და დაუდგინა ბეთელში მღვდლები მაღლობებს, რომლებიც აღმართა.

³³და სამსხვერპლოზე, რომელიც ბეთელში ააგო, მსხვერპლი შესწირა მერვე თვის მეთხუთმეტე დღეს, იმ თვეში, რომელიც თავისი ნებით ამოარჩია; და დაუწესა დღესასწაული ისრაელიანთ, და ავიდა სამსხვერპლოზე საკმევლის საკმევად.