Read სბს–2013 3 მეფეთა 16 Bible Online

3 მეფეთა 16 - სბს–2013 bible

3 მეფეთა 16

¹იყო უფლის სიტყვა ხანანის ძის, იეჰუს მიმართ ბაყაშაზე:

²„მიწის მტვრიდან აგამაღლე და ჩემი ერის, ისრაელის წინამძღოლად დაგადგინე, მაგრამ რაკი იერობოყამის გზას მიჰყვები, აცდუნებ ჩემს ერს, ისრაელს, და მაბოროტებ მათი ცოდვებით,

³აჰა, მოვსპობ ბაყაშას და მის სახლს, და იმავეს დავმართებ შენს სახლს, რაც იერობოყამ ნებატის ძის სახლს დავმართე.

⁴ვინც ქალაქში მოუკვდება ბაყაშას, ძაღლები შეჭამენ მას; ვინც ველად მოუკვდება – ცის ფრინველები დაჯიჯგნიან.“

⁵ბაყაშას დანარჩენი საქმენი, ყველაფერი, რაც გააკეთა, და გმირობანი ისრაელის მეფეთა მატიანეშია ჩაწერილი.

⁶განისვენა ბაყაშამ თავის მამებთან, და დაიმარხა თირცაში; და მისი ძე, ელა გამეფდა მის ნაცვლად.

⁷წინასწარმეტყველ იეჰუს, ხანანის ძის პირით გამოცხადდა უფლის სიტყვა ბაყაშასა და მისი სახლის გამო, და ყოველი ბოროტების გამო, რასაც უფლის თვალში აკეთებდა იგი, რომ აბოროტებდა თავისი ხელის ნამოქმედარით უფალს, რომ ბაძავდა იერობოყამის სახლს, რის გამოც მოისპო იგი.

⁸იუდას მეფე ასას მეფობის ოცდამეექვსე წელს გამეფდა ელა, ბაყაშას ძე, ისრაელზე თირცაში, და ორ წელს იმეფა.

⁹და აუჯანყდა მისი მსახური ზიმრი, ეტლიონის ერთი ნახევრის მეთაური. ღვინით იყო მთვრალი ელა თირცას სასახლის მოურავის, არცას სახლში,

¹⁰და როცა შემოვიდა ზიმრი, ჩასცა მახვილი და მოკლა იგი იუდას მეფე ასას ოცდამეშვიდე წელს და მის ნაცვლად გამეფდა.

¹¹როგორც კი გამეფდა და დაჯდა მის ტახტზე, მუსრი გაავლო ბაყაშას მთელ სახლს, ერთი კაციც არ დაუტოვა ცოცხალი, არც მისი ნათესავი და არც მისი მეგობარი.

¹²და მოსპო ზიმრიმ ბაყაშას მთელი სახლი, უფლის სიტყვისამებრ, როგორც ნათქვამი ჰქონდა ბაყაშაზე იეჰუ წინასწარმეტყველის პირით,

¹³ყველა იმ ცოდვის გამო, რაც ბაყაშამ და ელამ ჩაიდინეს, და იმის გამოც, რომ აცდუნებდნენ ისრაელს და თავიანთი კერპებით აბოროტებდნენ უფალს, ისრაელის ღმერთს.

¹⁴ელას დანარჩენი საქმენი და ყველაფერი, რაც მან გააკეთა, ისრაელის მეფეთა მატიანეშია ჩაწერილი.

¹⁵იუდას მეფის, ასას ოცდამეშვიდე წელს გამეფდა ზიმრი და იმეფა შვიდ დღეს თირცაში. ამ დროს იყო, რომ შემოადგა ხალხი ფილისტიმის გიბეთონს.

¹⁶როცა შეიტყო მოალყე ხალხმა, რომ ზიმრი აჯანყდა და მეფე მოკლაო, ბანაკად მყოფმა ისრაელიანებმა იმავე დღეს ისრაელზე მხედართმთავარი ყომრი გაამეფეს.

¹⁷და დაიძრა ყომრი და მთელი ისრაელი მასთან ერთად გიბეთონიდან და ალყა შემოარტყეს თირცას.

¹⁸როცა დაინახა ზიმრიმ, რომ აღებულია ქალაქი, შევიდა სამეფო სახლის პალატში და თავზე გადაიწვა სამეფო სახლი, და ასე მოკვდა იგი,

¹⁹იმ ცოდვების გამო, რასაც სჩადიოდა, ბოროტს რომ აკეთებდა უფლის თვალში, რომ მიჰყვებოდა იერობოყამის გზას და მის ცოდვებს, რომელთაც იერობოყამი აკეთებდა ისრაელის საცდუნებლად.

²⁰ზიმრის დანარჩენი საქმენი და შეთქმულება, რომელიც მან მოაწყო, ჩაწერილია ისრაელის მეფეთა მატიანეში.

²¹მაშინ გაიყო ისრაელის ერი ორ ნაწილად: ხალხის ერთი ნაწილი თიბნის, გინათის ძის მხარეზე იყო, რათა გაემეფებინათ იგი, მეორე ნაწილი ყომრის უჭერდა მხარს.

²²და სძლია ყომრის მომხრე ხალხმა თიბნი გინათის ძის მომხრე ხალხს. მოკვდა თიბნი და გამეფდა ყომრი.

²³იუდას მეფე ასას ოცდამეთერთმეტე წელს გამეფდა ყომრი ისრაელზე და თორმეტ წელს იმეფა. ექვს წელს თირცაში მეფობდა იგი.

²⁴და იყიდა ყომრიმ სამარიის მთა შემერისგან ორ ტალანტ ვერცხლად და გააშენა ეს მთა, და მთის პატრონის, შემერის სახელზე, თავის გაშენებულ ქალაქს სამარია უწოდა.

²⁵ბოროტებას სჩადიოდა ყომრი უფლის თვალში და გადაამეტა ბოროტებაში ყველას, ვინც მის წინ იყო.

²⁶და მიჰყვებოდა იერობოყამ ნებატის ძის გზას და მის ცოდვებს, რომლითაც აცდუნა იერობოყამმა ისრაელი და თავისი კერპებით გააბოროტა უფალი, ისრაელის ღმერთი.

²⁷ყომრის დანარჩენი საქმენი, რაც გააკეთა, და გმირობანი, რაც ჩაიდინა, ჩაწერილია ისრაელის მეფეთა მატიანეში.

²⁸და განისვენა ყომრიმ თავის მამებთან. და დაიმარხა სამარიაში. მის ნაცვლად მისი ძე ახაბი გამეფდა.

²⁹და გამეფდა ისრაელზე ახაბი, ყომრის ძე, იუდას მეფის, ასას ოცდამეთვრამეტე წელს. იმეფა ახაბ ყომრის ძემ ისრაელზე სამარიაში 22 წელი.

³⁰ბოროტებას სჩადიოდა ახაბ ყომრის ძე უფლის თვალში, ყველაზე უარესად, ვინც მის წინ იყო.

³¹და არ იკმარა იერობოყამ ნებატის ძის ცოდვილ გზაზე სიარული და მოიყვანა ცოლად იეზებელი, ციდონელთა მეფის – ეთბაყალის ასული, და დაუწყო ბაყალს მსახურება და თაყვანისცემა.

³²და აღუმართა სამსხვერპლო ბაყალს ბაყალის ბომონში, რომელიც სამარიაში ააშენა.

³³და მოაწყო ახაბმა აშერა, და თავის წინამორბედ ისრაელის მეფეებზე უფრო მეტად აბოროტებდა ახაბი უფალს, ისრაელის ღმერთს.

³⁴მის დროს ააშენა ხიელ ბეთელელმა იერიხო. თავის პირმშოზე, აბირამზე დაუდო საფუძველი და სეგუბზე, უმცროს ვაჟზე, დაადგინა მისი კარიბჭე, უფლის სიტყვისამებრ, როგორც ნაბრძანები ჰქონდა მას იესო ნავეს ძის პირით.