Read სბს–2013 3 მეფეთა 18 Bible Online

3 მეფეთა 18 - სბს–2013 bible

3 მეფეთა 18

¹კარგა ხანმა გაიარა და მესამე წელს იყო უფლის სიტყვა ელიას მიმართ: „წადი, ეჩვენე ახაბს, და მეც ვაწვიმებ დედამიწაზე.“

²და წავიდა ელია, რომ სჩვენებოდა ახაბს. დიდი შიმშილობა იყო სამარიაში.

³და დაუძახა ახაბმა ყობადიაჰუს, სასახლის მოურავს – ძალზე ღვთისმოშიში იყო ყობადიაჰუ.

⁴როცა იეზებელი უფლის წინასწარმეტყველთ ჟლეტდა, წაიყვანა ყობადიაჰუმ 100 წინასწარმეტყველი და ორმოცდაათ-ორმოცდაათ კაცს მალავდა მღვიმეებში და პურითა და წყლით არჩენდა მათ.

⁵და უთხრა ახაბმა ყობადიაჰუს: „წადი და მოიარე ქვეყნის წყაროები და ღელეები; იქნებ აღმოჩნდეს სადმე ბალახი, რომ როგორმე გამოვკვებო ცხენები და ჯორები და არ გაგვიწყდეს პირუტყვი.“

⁶და დაინაწილეს ქვეყანა ერთმანეთში, ვინ სად უნდა წასულიყო: ახაბი მარტო წავიდა ერთი გზით, და ყობადიაჰუ მეორე გზით წავიდა მარტო.

⁷გზად რომ იყო ყობადიაჰუ, აჰა, ელია შემოეყარა, იცნო და დაეცა მის წინაშე და უთხრა: „ნუთუ შენ ელია ხარ, ჩემო ბატონო?“

⁸უთხრა: „მე ვარ. წადი და უთხარი შენს ბატონს: აქ ელია არის-თქო.“

⁹და უთხრა ყობადიაჰუმ: „რა დავაშავე, რომ შენი მსახური ახაბის ხელში გინდა ჩააგდო მოსაკლავად?

¹⁰უფალს, შენს ღმერთს გეფიცები, რომ არ დარჩენილა ხალხი ან სამეფო, სადაც შენს მოსაძებნად არ გაეგზავნოს კაცი ჩემს ბატონს. და როცა ეუბნებოდნენ, აქ არ არისო, ის იმ სამეფოსა და ხალხისგან ფიცით მოითხოვდა იმის დადასტურებას, რომ სინამდვილეში ვერ გიპოვეს.

¹¹ახლა კი მეუბნები, წადი და უთხარი შენს ბატონს, რომ ელია აქ არისო.

¹²როცა გაგშორდები, მაშინ გაგიტაცებს უფლის სული, და არ მეცოდინება – საით; და თუ მივალ შესატყობინებლად ახაბთან, და ვერ გიპოვნის, მომკლავს შენს მსახურს; შენი მსახური კი ყმაწვილკაცობიდანვე ღვთის მოშიშია.

¹³განა არ მოგითხრეს ჩემს ბატონს, რაც გავაკეთე, როცა იეზებელი უფლის წინასწარმეტყველთ ხოცავდა, როგორ ვმალავდი უფლის ას წინასწარმეტყველს, ორმოცდაათ-ორმოცდაათ კაცს მღვიმეებში და პურითა და წყლით ვარჩენდი?

¹⁴ახლა მეუბნები: წადი და უთხარი შენს ბატონს, რომ ელია აქ არისო. ხომ მომკლავს!“

¹⁵და თქვა ელიამ: „ვფიცავ ცაბაოთ უფალს, რომლის წინაშეც ვდგავარ, რომ დღესვე ვეჩვენები მას.“

¹⁶და წავიდა ყობადიაჰუ ახაბის შესახვედრად და შეატყობინა. და წამოვიდა ახაბი ელიას შესახვედრად.

¹⁷როცა დაინახა ახაბმა ელია, უთხრა: „შენ აქა ხარ, ისრაელის ამრევო?“

¹⁸და თქვა ელიამ: „მე კი არ ვაშფოთებ ისრაელს, არამედ შენ და მამაშენის სახლი, იმით, რომ დაივიწყეთ უფლის მცნებანი და ბაყალებს გაჰყევით.

¹⁹ახლა დაგზავნე ხალხი და შემიკრიბე ქარმელის მთაზე მთელი ისრაელი და ბაყალის წინასწარმეტყველნი – 450 კაცი და აშერას წინასწარმეტყველნი – 400 კაცი, იეზებელის სუფრაზე რომ ჭამენ.“

²⁰და დაგზავნა ახაბმა ხალხი მთელს ისრაელში და შეკრიბა წინასწარმეტყველნი ქარმელის მთაზე.

²¹და მივიდა ხალხთან ელია და უთხრა: „როდემდის უნდა იცვლიდეთ აზრს? თუ უფალი არის ღმერთი, მას გაჰყევით, ხოლო თუ ბაყალია, მას გაჰყევით.“ სიტყვა არ დაუძრავს ხალხს.

²²და უთხრა ელიამ ხალხს: „მე ერთი დავრჩი უფლის წინასწარმეტყველი, ბაყალის წინასწარმეტყველნი კი 450 კაცია.

²³მოგვეცით ორი მოზვერი. ერთი მაგათ ამოირჩიონ; შუა გაკვეთონ და შეშაზე შემოაწყონ, ოღონდ ცეცხლს ნუ შეუნთებენ. მეც გავამზადებ მეორე მოზვერს, შეშაზე შემოვაწყობ და ცეცხლს არ შევუნთებ.

²⁴მოუხმეთ თქვენი ღმერთის სახელს, და მეც მოვუხმობ უფლის სახელს. და ღმერთი, რომელიც ცეცხლით გაგვცემს პასუხს, ღმერთი ის იქნება.“ და მიუგო მთელმა ხალხმა და თქვა: „კეთილი.“

²⁵და უთხრა ელიამ ბაყალის წინასწარმეტყველთ: „ამოირჩიეთ რომელიმე მოზვერი, პირველად თქვენ გაამზადეთ, რადგან ბევრნი ხართ. ახსენეთ თქვენი ღმერთის სახელი, ოღონდ ცეცხლი არ შეუნთოთ.“

²⁶და გამოიყვანეს მათ მოზვერი, რომელიც ერგოთ და გაამზადეს. დილიდან შუადღემდე მოუწოდებდნენ ბაყალის სახელს და ეძახდნენ: „ხმა გაგვეცი, ბაყალ!“ მაგრამ არც ხმა იყო საიდანმე და არც – პასუხი. და ხტოდნენ ისინი სამსხვერპლოს წინ, რომელიც მათ ააგეს.

²⁷შუადღისას დაცინვა დაუწყო მათ ელიამ: „მაგრად უყვირეთ! რადგან ღმერთია იგი; ალბათ ფიქრებშია ან რაიმე უჭირს, ან გზაშია. იქნებ სძინავს კიდეც და ეგრე გაიღვიძებს!“

²⁸დიდი ხმით გაჰყვიროდნენ და თავიანთი ჩვეულებისამებრ, ისე ისერავდნენ კანს მახვილებითა და ლახვრებით, რომ სისხლი ჩამოსდიოდათ ტანზე.

²⁹შუადღე გადავიდა, ისინი კი ისევ ქადაგებდნენ საღამოს მსხვერპლშეწირვამდე; მაგრამ არც ხმა ისმოდა, არც პასუხი, არც ჩქამი.

³⁰და უთხრა ელიამ მთელ ხალხს: „ახლოს მოდით.“ და მივიდა მასთან მთელი ხალხი. და დაიწყო მან უფლის დანგრეული სამსხვერპლოს აღდგენა.

³¹აიღო ელიამ 12 ლოდი, იაკობის ძეთა შტოების რიცხვის მიხედვით, რომლის მიმართაც იყო უფლის სიტყვა: ისრაელი იყოსო სახელი შენი.

³²და ააშენა ლოდებისგან სამსხვერპლო უფლის სახელზე. სამსხვერპლოს გარს შემოავლო ორი საწყაო მარცვლის ტევადობის თხრილი

³³და დააწყო შეშა, შუა გაკვეთა მოზვერი და შეშაზე დააწყო.

³⁴და თქვა: „აავსეთ წყლით ოთხი ჩაფი და გადაასხით სრულადდასაწველ მსხვერპლსა და შეშას.“ და თქვა: „გაიმეორეთ.“ და გაიმეორეს. და თქვა: „მესამედ გადაასხით.“ მათაც გადაასხეს მესამედ.

³⁵და ჩამოედინა წყალი ირგვლივ სამსხვერპლოს და წყლით აივსო თხრილი.

³⁶მსხვერპლშეწირვის დრომ რომ მოაწია, ახლოს მოდგა ელია წინასწარმეტყველი და თქვა: „უფალო, ღმერთო აბრაამისა, ისააკისა და ისრაელისა! გაცხადდეს დღევანდელ დღეს, რომ შენა ხარ ერთი ღმერთი ისრაელში, მე კი შენი მსახური ვარ და შენი სიტყვისამებრ გავაკეთე ეს ყველაფერი.

³⁷ხმა გამეცი, უფალო, ხმა გამეცი, რათა გაიგოს ამ ხალხმა, რომ შენ ღმერთი ხარ, უფალო, და შეგიძლია უკუმოაქციო მათი გულები.“

³⁸და გადმოვარდა უფლის ცეცხლი და შთანთქა სრულადდასაწველი მსხვერპლი, შეშა, ქვები და ტალახი, ამოაშრო წყალი, თხრილში რომ იდგა.

³⁹და როცა ეს დაინახა მთელმა ხალხმა, პირქვე დაემხო და შესძახა: „ჭეშმარიტად ეს არის უფალი ღმერთი!“

⁴⁰და უთხრა მათ ელიამ: „შეიპყარით ბაყალის წინასწარეტყველნი! არავინ გაგექცეთ.“ და შეიპყრეს, და ჩაიყვანა ისინი ელიამ კიშონის ხევში და იქ დახოცა.

⁴¹და უთხრა ელიამ ახაბს: „წადი, ჭამე და სვი, რადგან წვიმის ხმაური ისმის უკვე.“

⁴²და წავიდა ახაბი, რომ ეჭამა და ესვა, ხოლო ელია ქარმელის თავზე ავიდა, მიწაზე დაიხარა და სახე მუხლებში ჩარგო.

⁴³და უთხრა თავის მსახურს: „წადი, ზღვისკენ გაიხედე.“ წავიდა ის და გაიხედა. და თქვა: „არაფერი ჩანს.“ და უთხრა ელიამ: „შვიდგზის გააკეთე ასე.“

⁴⁴მეშვიდე ჯერზე თქვა: „აჰა, მუშტისოდენა პატარა ღრუბელი ამოდის ზღვიდან.“ და თქვა ელიამ: „წადი, უთხარი ახაბს: შეაბი ეტლი და გაბრუნდი, წვიმამ არ მოგისწროს-თქო.“

⁴⁵ამასობაში ცა მოიქუფრა ღრუბლისა და ქარისაგან და წამოვიდა ხშირი წვიმა. და ჩაჯდა ეტლში ახაბი და იზრეყელისკენ გაემართა.

⁴⁶და იყო ხელი უფლისა ელიასთან. და შეისარტყლა წელი და ახაბის წინ მირბოდა იზრეყელამდე.