Read სბს–2013 3 მეფეთა 21 Bible Online

3 მეფეთა 21 - სბს–2013 bible

3 მეფეთა 21

¹და იყო ამ ამბების მერე: ვენახი ჰქონდა იზრეყელელ ნაბოთს იზრეყელში, ახაბის, სამარიის მეფის სასახლესთან.

²და ელაპარაკა ახაბი ნაბოთს და უთხრა: „დამითმე შენი ვენახი, საბოსტნედ მექნება, რადგან ჩემს სახლთან არის. სანაცვლოდ მასზე უკეთეს ვენახს მოგცემ, ანდა, თუ გინდა, მის საფასურ ვერცხლს გადაგიხდი.“

³და უთხრა ნაბოთმა ახაბს: „უფალმა დამიფაროს, რომ ჩემი მამების სამკვიდრო მოგცე!“

⁴და მოვიდა შინ ახაბი დაღვრემილი და შეწუხებული იმ სიტყვის გამო, იზრეყელელმა ნაბოთმა რომ უთხრა, ვერ მოგცემ ჩემი მამების სამკვიდროსო. და ჩაწვა საწოლში და პირი კედლისკენ ქნა, პურიც არ უჭამია.

⁵შევიდა მასთან იეზებელი, მისი ცოლი, და დაელაპარაკა: „რამ დაგინაღვლიანა სული, რომ პურს არა ჭამ?“

⁶და უთხრა: „ველაპარაკე იზრეყელელ ნაბოთს და ვუთხარი: დამითმე შენი ვენახი ვერცხლად, ან, თუ გინდა, სანაცვლოდ სხვა ვენახს მოგცემ-მეთქი. უარით გამომისტუმრა.“

⁷და უთხრა იეზებელმა, მისმა ცოლმა: „ახლა დაამტკიცე, რომ ისრაელის მეფე ხარ! ადექი, პური ჭამე და გული გაიმხიარულე, და მე მოგცემ ნაბოთ იზრეყელელის ვენახს.“

⁸და დაწერა წერილები ახაბის სახელით, მისი ბეჭდით დაბეჭდა და დაუგზავნა წერილები უხუცესებს და წარჩინებულთ, ნაბოთთან რომ ცხოვრობდნენ მის ქალაქში.

⁹ასე ჩაწერა წერილებში: „გამოაცხადეთ მარხვა და ხალხის თავში დასვით ნაბოთი.

¹⁰წინ დაუსვით ორი ბოროტი კაცი, რომ ცილი დასწამონ მას და უთხრან: შენ იყავი, ღმერთსა და მეფეს რომ აგინებდიო! და გაიყვანეთ და ჩაქოლეთ, რათა მოკვდეს.“

¹¹ისე გააკეთეს იმ ქალაქის კაცებმა – უხუცესებმა და წარჩინებულებმა, რომელნიც მის ქალაქში ცხოვრობდნენ, როგორც შეუთვალა მათ იეზებელმა, როგორც მან ჩაწერა მათთვის დაგზავნილ წერილებში.

¹²და გამოაცხადეს მარხვა და ხალხის თავში დასვეს ნაბოთი.

¹³და გამოვიდა ორი ბოროტი კაცი და წინ დაუსხდნენ. ცილი დასწამეს ამ ბოროტმა კაცებმა ნაბოთს ხალხის წინაშე: შეაგინაო ნაბოთმა ღმერთსა და მეფეს. გაიყვანეს ქალაქს გარეთ, ჩაქოლეს და მოკვდა იგი.

¹⁴და შეუთვალეს იეზებელს: ჩაქოლეს ნაბოთი და მოკვდაო.

¹⁵როცა გაიგო, რომ ჩაქოლეს ნაბოთი და მოკვდა, უთხრა იეზებელმა ახაბს: „ადექი, დაეპატრონე ნაბოთ იზრეყელელის ვენახს, რომ არ უნდოდა შენთვის მოეყიდა, რადგან აღარ არის ცოცხალი ნაბოთი, მკვდარია ის.“

¹⁶როცა გაიგო ახაბმა, რომ მოკვდა ნაბოთი, ადგა, რათა ჩასულიყო იზრეყელელი ნაბოთის ვენახში და დაპატრონებოდა.

¹⁷და იყო უფლის სიტყვა ელია თიშბელის მიმართ:

¹⁸„ადექი და დახვდი ახაბს, ისრაელის მეფეს, სამარიაში რომ არის. აჰა, ნაბოთის ვენახშია ჩასული მის დასაპატრონებლად.

¹⁹და ელაპარაკე მას: ასე ამბობს-თქო უფალი: ‘კაცი მოკალი და ახლა მის ქონებას ეპატრონები?’ და ელაპარაკე მას: ასე ამბობს-თქო უფალი: ‘სადაც ძაღლები ლოკავდნენ ნაბოთის სისხლს, იმ ადგილას შენს სისხლსაც ალოკავენ.’“

²⁰და უთხრა ახაბმა ელიას: „მაინც მომაგენი, ჩემო მტერო!“ და თქვა: „მოგაგენი, რადგან თავი გაწირე, რომ ბოროტი გაგეკეთებინა უფლის თვალში.

²¹ამას ამბობს უფალი: აჰა, უბედურებას დაგათევ თავზე, გავხვეტ შენს შემდგომს, ყველას, ვინც კი ჰყავს ახაბს ისრაელში, ყმა იქნება თუ აზატი.

²²ისე მოვექცევი შენს სახლს, როგორც მოვექეცი იერობოყამ ნებატის ძის სახლს, ბაყაშა ახიას ძის სახლს, იმ ჯავრის გამო, რომ შეაცდინე ისრაელი.

²³და იეზებელზეც თქვა უფალმა: ძაღლები შეჭამენო იეზებელს იზრეყელის გალავანთან.

²⁴და ვინც ქალაქში მოუკვდება ახაბს, იმას ძაღლები შეჭამენ, ვინც ველად მოუკვდება, ცის ფრინველები დაჯიჯგნიან.“

²⁵(ჯერ არავინ ყოფილა, რომელსაც ახაბივით გაეყიდოს თავი უფლის თვალში ბოროტების საკეთებლად, რაზეც აქეზებდა იეზებელი, ცოლი მისი.

²⁶დიდი სიბილწე ჩაიდინა, რომ მიჰყვა კერპებს და მიბაძა ამორეველთ, რომელნიც ისრაელის თვალთაგან აჰყარა უფალმა).

²⁷როცა გაიგონა ახაბმა ეს სიტყვები, შემოიხია ტანზე სამოსელი და ჯვალოთი დაიფარა ხორცი, მარხულობდა და ჯვალოში ეძინა, დადიოდა დამწუხრებული.

²⁸და იყო უფლის სიტყვა ელია თიშბელის მიმართ:

²⁹„ხედავ, როგორ მოდრკა ახაბი ჩემს წინაშე? და რაკი ასე მოიქცა, არ დავათევ უბედურებას მის სიცოცხლეში; მისი შვილის სიცოცხლეში დავათევ უბედურებას მის სახლს.“