Read სბს–2013 3 მეფეთა 3 Bible Online

3 მეფეთა 3 - სბს–2013 bible

3 მეფეთა 3

¹დაუმოყვრდა სოლომონი ფარაონს, ეგვიპტის მეფეს და ცოლად მოიყვანა მისი ასული, და შეიყვანა დავითის ქალაქში, ვიდრე დაასრულებდა თავის სახლს, უფლის ტაძარს და ზღუდეს იერუსალიმის ირგვლივ.

²ოღონდ ჯერ კიდევ გორაკებზე სწირავდა ხალხი მსხვერპლს, რადგან იმ ხანობამდე ჯერ კიდევ არ იყო აშენებული სახლი უფლის სახელზე.

³და შეიყვარა სოლომონმა უფალი, და მამამისის – დავითის წესზე დადიოდა; ოღონდ ისიც გორაკებზე სწირავდა მსხვერპლს და აკმევდა საკმეველს.

⁴და წავიდა მეფე გიბეონს, რათა მსხვერპლი შეეწირა იქ, რადგან იქ იყო მთავარი გორაკი. ათასი სული სრულადდასაწველი შესწირა მეფემ ამ სამსხვერპლოზე.

⁵და გამოეცხადა გიბეონში უფალი სოლომონს ღამით სიზმრად და უთხრა ღმერთმა: „მთხოვე, რაც გინდა, რომ მოგცე.“

⁶და უთხრა სოლომონმა: „დიდად სწყალობდი შენს მსახურს, მამაჩემს დავითს, რადგან ჭეშმარიტებით, სიმართლითა და შენდამი წრფელი გულით დადიოდა იგი შენს წინაშე. და შეუნარჩუნე კიდეც ეს დიდი წყალობა და მიეცი ვაჟი, რომელიც ზის დღეს მის ტახტზე.

⁷ახლა, უფალო, ღმერთო ჩემო, შენ გაამეფე მამაჩემის, დავითის ნაცვლად შენი მსახური, თუმცა უასაკო ყმაწვილი ვარ და არ ვიცი გამოსვლა და შესვლა.

⁸შენს რჩეულ ხალხს შორის არის შენი მსახური, მრავალრიცხოვან ხალხში, რომელიც არ დაითვლება და არც აღირიცხება სიმრავლის გამო.

⁹და მიანიჭე შენს მსახურს გონიერი გული, რათა განაგოს შენი ერი და გაარჩიოს სიკეთე ბოროტებისგან. რადგან ვის შეუძლია განაგოს შენი ერი, ესოდენ მრავალრიცხოვანი?“

¹⁰და ძლიერ მოეწონა უფალს სოლომონის სათხოვარი.

¹¹და უთხრა მას ღმერთმა: „იმის გამო, რომ მთხოვე ეს და არ მოითხოვე დღეგრძელი სიცოცხლე, არ მოითხოვე სიმდიდრე, არ მოითხოვე შენი მტრების სული, არამედ გონიერება მთხოვე სამართლის გასაკითხად,

¹²აჰა, გავაკეთებ შენი სიტყვისამებრ: მომინიჭებია შენთვის ბრძენი და გონიერი გული, ისე რომ, შენი მსგავსი არც შენამდე ყოფილიყოს, და არც შენს შემდეგ გამოჩნდება ვინმე.

¹³და რაც არ გითხოვია, იმასაც მოგცემ: სიმდიდრესა და დიდებას; ისე რომ, შენს სიცოცხლეში არავინ იქნება მეფეთა შორის შენი მსგავსი.

¹⁴და თუ ივლი ჩემი გზით და დაიცავ ჩემს წესებსა და ბრძანებებს, როგორც მამაშენი დავითი აკეთებდა, დღეგრძელობასაც მოგცემ.“

¹⁵და გაეღვიძა სოლომონს, და აჰა, ესეც სიზმარი. და მივიდა იერუსალიმში და წარდგა უფლის აღთქმის კიდობნის წინაშე და შესწირა სრულადდასაწველი და სამშვიდობო მსხვერპლი. მერე ნადიმი გაუმართა თავის მსახურთ.

¹⁶მაშინ მოვიდა მეფესთან ორი მეძავი ქალი და მის წინაშე დადგა.

¹⁷და თქვა ერთმა: „მომისმინე, ბატონო: მე და ეს ქალი ერთ სახლში ვცხოვრობთ; ამ სახლში ვიმშობიარე მის თვალწინ.

¹⁸ჩემი მშობიარობის მესამე დღეს შვა ამ ქალმაც. ერთად ვიყავით, უცხო არავინ ყოფილა იქ. მხოლოდ ჩვენ ორნი ვიყავით სახლში.

¹⁹და მომკვდარა ღამით ამ ქალის ბავშვი, რადგან ძილში ზედ დასწოლია.

²⁰ამდგარა შუაღამისას, ჩემი ბავშვი აუცლია გვერდიდან, როცა მე, შენს მხევალს, მეძინა, და თავის უბეში ჩაუწვენია, ხოლო თავისი მკვდარი ბავშვი ჩემს უბეში ჩამოუწვენია.

²¹ავდექი ადრიანად, რათა ძუძუ მეწოვებინა ბავშვისთვის, და აჰა, მკვდარი დამხვდა. კარგად დავაკვირდი დილით და მივხვდი, რომ ბავშვი ის არ იყო, რომელიც მე ვშობე.“

²²და თქვა მეორე ქალმა: „არა! ცოცხალია ჩემი შვილი, შენი შვილია მკვდარი!“ ის კი ამბობდა: „არა! შენი შვილია მკვდარი, ჩემი შვილია ცოცხალი!“ ასე დაობდნენ ისინი მეფის თვალწინ.

²³და თქვა მეფემ: „თითოეული თქვენგანი ამტკიცებს, რომ ცოცხალი მისი შვილია, მკვდარი კი მეორისა.“

²⁴და ბრძანა მეფემ: „მახვილი მომიტანეთ!“ და მიართვეს მახვილი მეფეს.

²⁵და თქვა მეფემ: „ორად გაჭერით ცოცხალი ბავშვი, ნახევარი ერთ ქალს მიეცით, ნახევარი – მეორეს.“

²⁶და მიმართა მეფეს იმ ცოცხალი ბავშვის დედამ, რადგან გულ-ღვიძლი დაეწვა თავისი შვილის გამო: „არა, ჩემო ბატონო, ოღონდ ნუ მოკლავთ ბავშვს და დაე, მაგას ჰყავდეს!“ მეორე კი ამბობდა: „რახან ეგრეა, გაჭერით! ნურც მე მერგება და ნურც შენ!“

²⁷მაშინ თქვა მეფემ პირველ ქალზე: „ამას მიეცით ცოცხალი ბავშვი, ნუ მოკლავთ, ეს არის ცოცხალი ბავშვის დედა!“

²⁸და გაიგო მთელმა ისრაელმა მეფის მიერ გამოტანილი განაჩენის ამბავი. და ეშინოდათ მეფისა, რადგან დაინახეს, რომ ღვთის სიბრძნე შეეწეოდა მას სამართლის გაჩენაში.