Read სბს–2013 3 მეფეთა 5 Bible Online

3 მეფეთა 5 - სბს–2013 bible

3 მეფეთა 5

¹და გაუგზავნა ხირამმა, ცორის მეფემ, თავისი მსახურნი სოლომონს, რადგან გაიგო, რომ იგი სცხეს მეფედ მამამისის ნაცვლად; ხოლო ხირამი მთელი სიცოცხლის მანძილზე დავითთან მეგობრობდა.

²და შეუთვალა სოლომონმა ხირამს:

³„შენ იცი, რომ მამაჩემმა დავითმა ვერ შეძლო აეშენებინა სახლი უფლის, თავისი ღმერთის სახელზე, რადგან მტერი ეხვია გარს, ვიდრე უფალმა მის ფერხთა ქვეშ არ დათრგუნა ისინი.

⁴ახლა კი ჩამოაგდო ირგვლივ მშვიდობა უფალმა, ჩემმა ღმერთმა, აღარ მყავს მოწინააღმდეგე და არც ხიფათი მელის რაიმე.

⁵და, აჰა, ვფიქრობ, ავაშენო სახლი უფლის, ჩემი ღვთის სახელზე, როგორც ნათქვამი აქვს მამაჩემისთვის უფალს: შენი ვაჟიშვილი, ვისაც შენს ნაცვლად ტახტზე დავსვამ, ის ამიშენებსო ჩემს სახელზე სახლს.

⁶ახლა ბრძანე, რომ კედარის ხე-ტყე მომიჭრან ლიბანში, ჩემი მსახურნი შენს მსახურებთან ერთად იქნებიან, და მე მოგცემ შენს მსახურთა გასამრჯელოს, რამდენსაც მეტყვი, რადგან იცი შენ, რომ ციდონელებივით ჩვენში ხე-ტყეს ვერავინ ჭრის.“

⁷როცა გაიგო ხირამმა სოლომონის სიტყვები, დიდად გაიხარა და თქვა: „აწ კურთხეულ იყოს უფალი, რომელმაც მისცა დავითს ბრძენი შვილი ამოდენი ხალხის სამართავად.“

⁸და შეატყობინა ხირამმა სოლომონს: „მოვისმინე, რაც შემომითვალე; შეგისრულებ კედარისა და კვიპაროსის ხე-ტყის სურვილს.

⁹ჩემი მსახურნი ჩამოზიდავენ ლიბანიდან ზღვამდე, და ტივებად დავაცურებ ზღვით იმ ადგილამდე, სადაც დამითქვამ. იქ დავშლით ტივებს და იქიდან გაზიდავთ. ოღონდ შენ შემისრულე სურვილი: სარჩოთი მომიმარაგე სახლი.“

¹⁰და უგზავნიდა ხირამი სოლომონს მისი სურვილის თანახმად კედარისა და კვიპაროსის ხე-ტყეს.

¹¹ხოლო სოლომონი უგზავნიდა ხირამს 20 ათას ქორ ხორბალს მისი სახლის სარჩოდ და ოც ქორ ზეითუნის დაწმენდილ ზეთს. ამას უგზავნიდა სოლომონი ხირამს წლიდან წლამდე.

¹²და მისცა უფალმა სიბრძნე სოლომონს, აღთქმისამებრ. მშვიდობა სუფევდა ხირამსა და სოლომონს შორის, და კავშირი შეკრეს მათ ერთმანეთთან.

¹³და დაადო ბეგარა სოლომონმა მთელს ისრაელს; 30 ათასი კაცი გაჰყავდა ბეგარაზე.

¹⁴და აგზავნიდა მათ ლიბანში – თვეში 10 ათას კაცს, მორიგეობით. ერთ თვეს ლიბანში იყვნენ, ორ თვეს – თავის სახლებში. ადონირამი განაგებდა ბეგარას.

¹⁵სოლომონს ჰყავდა 70 ათასი მტვირთავი და 80 ათასი ქვის მჭრელი მთაში,

¹⁶გარდა 3300 თავკაცისა, რომლებიც სამუშაოებზე ჰყავდა მიჩენილი სოლომონს მუშების ზედამხედველებად.

¹⁷და ბრძანა მეფემ, რომ მოეზიდათ და დიდი, გათლილი ქვებით ჩაეყარათ სახლის საძირკველი.

¹⁸და თლიდნენ სოლომონის ხელოსნები, ხირამის ხელოსნები და გებალელები, და ამზადებდნენ ხე-ტყესა და ქვას სახლის ასაგებად.