Read სბს–2013 3 მეფეთა 7 Bible Online

3 მეფეთა 7 - სბს–2013 bible

3 მეფეთა 7

¹ხოლო თავის სახლს ცამეტ წელიწადს აშენებდა სოლომონი და დაასრულა თავისი სახლი.

²და ააშენა სახლი ლიბანის ხე-ტყით: სიგრძით – 100 წყრთა, სიგანით – 50 წყრთა, სიმაღლით – 30 წყრთა. ოთხ რიგ კედარის სვეტებზე იყო დადგმული, კედარისავე კოჭები იყო სვეტებზე გადებული.

³კედარისა იყო ჭერი, 45 სვეტზე ეწყო კოჭები, 15 სვეტი იყო თითო რიგში.

⁴სარკმლის წირთხლები სამ რიგად იყო; და სარკმლებიც სამ რიგად ისხდა, სარკმელი სარკმლის პირდაპირ.

⁵ყველა კარი და მისი წირთხლი ოთხკუთხა ძელებით იყო ნაკეთები, ასევე სარკმლებიც, ერთმანეთის პირდაპირ რომ იყო, სამ წყებად.

⁶სვეტებიანი კარიბჭე გააკეთა სიგრძით 50 წყრთა და სიგანით – 30, მის წინ სხვა კარიბჭე სვეტებითა და ზღურბლით.

⁷ააგო სატახტო კარიბჭე, სადაც მსჯავრი გამოჰქონდა; სამსჯავრო კარიბჭე გააკეთა და კედრით მოაპირკეთა იატაკიან-ჭერიანად.

⁸ასევე იყო აგებული მისი საცხოვრებელი სახლი მეორე ეზოში, კარიბჭის უკან. ფარაონის ასული რომ ჰყავდა ცოლად მოყვანილი სოლომონს, მის სახლსაც ასეთი კარიბჭე გაუკეთა.

⁹ეს ყველაფერი ზომაზე გათლილი, ხერხით დახერხილი ძვირფასი ქვით იყო აგებული, როგორც შიგნით, ისე გარეთ – საძირკვლიდან თავხემდე, და გარეთ დიდ ეზომდე.

¹⁰საძირკველში ეწყო ძვირფასი დიდი ქვები, ათწყრთიანი და რვაწყრთიანი.

¹¹ხოლო ზემოთ კედელი ზომაზე გათლილი ძვირფასი ქვებისა და კედარისა იყო.

¹²დიდი ეზო შემოზღუდული იყო ირგვლივ სამი წყება თლილი ქვითა და ერთი წყება კედარის მორებით. ასევე უფლის ტაძრის შიდა ეზო და სახლის კარიბჭე.

¹³და გაგზავნა კაცი მეფე სოლომონმა და მოაყვანინა ცორიდან ხირამი,

¹⁴რომლის დედა ერთი ქვრივი ქალი იყო ნაფთალის შტოდან, ხოლო მამა – ცორელი ბრინჯაოს ოსტატი. მომადლებული ჰქონდა ხირამს სიბრძნე, გამჭრიახობა და ცოდნა ბრინჯაოს ნახელავის გასაკეთებლად. მივიდა სოლომონ მეფესთან და ყველა სამუშაო შეუსრულა.

¹⁵და გააკეთა ბრინჯაოს ორი სვეტი – ერთის სიმაღლე 18 წყრთა იყო, 12 წყრთა ლარი სწვდებოდა გარშემო თვითეულ სვეტს.

¹⁶ორი ბუღაური ჩამოასხა ბრინჯაოსგან სვეტების თავზე დასადგმელად, ერთი ბუღაურის სიმაღლე ხუთი წყრთა იყო, მეორე ბუღაურის სიმაღლეც ხუთი წყრთა იყო.

¹⁷და გაუკეთა სვეტის თავზე დასადგმელ ბუღაურებს დაწნული ცხაურები და ჯაჭვისებური ჯინჯილები: შვიდი – ერთ ბუღაურს, შვიდი – მეორეს.

¹⁸და გააკეთა სვეტები და შემოავლო ირგვლივ თითო ცხაურს ორ წყებად ბროწეულები სვეტების თავზე დადგმული ბუღაურების მოსართავად.

¹⁹კარიბჭის სვეტების ბუღაურები შროშანის სახის იყო, ზომით ოთხ-ოთხი წყრთა.

²⁰ორ სვეტზე შედგმულ ბუღაურებს შემოვლებული ჰქონდა 200 ბროწეული, ზემოთკენ, მუცლის პირდაპირ, რომელიც ცხაურის მხარეს იყო.

²¹და აღმართა სვეტები ტაძრის კარიბჭეში. აღმართა მარჯვენა სვეტი და უწოდა სახელად იაქინი; აღმართა მარცხენა სვეტი და უწოდა სახელად ბოყაზი.

²²სვეტის თავებზე შროშნები იყო გამოსახული. და დასრულდა სვეტების სამუშაო.

²³და ჩამოასხა ბრინჯაოს ზღვა, მთლიანად მრგვალი, გარედან გარე ათი წყრთა იყო, სიმაღლე ხუთი წყრთა ჰქონდა, 30 წყრთის სიგრძის ლარი სწვდებოდა ირგვლივ.

²⁴ირგვლივ კიდეზე, ქვემოდან, კიტრის ჩუქურთმები ჰქონდა გარშემო შემოვლებული ათ-ათი თითო წყრთაზე, და ორ წყებად გარს ერტყა. კიტრები ერთად იყო ჩამოსხმული.

²⁵თორმეტ ხარზე იყო შედგმული. სამი ჩრდილოეთით იყურებოდა, სამი – დასავლეთით, სამი – სამხრეთით და სამი – აღმოსავლეთით. ზღვა ზედ ედგათ და ზურგები შიგნით ჰქონდათ მიქცეული.

²⁶კედლის სისქე მტკაველი ჰქონდა, მისი კიდეები თასის კიდესავით იყო გაკეთებული და გაშლილ შროშანს ჰგავდა. 2 ათას ბათს იტევდა.

²⁷და გააკეთა მან ბრინჯაოს ათი კვარცხლბეკი, თითოეული კვარცხლბეკის სიგრძე ოთხი წყრთა იყო, სიგანე – ოთხი წყრთა, სიმაღლე – სამი წყრთა.

²⁸კვარცხლბეკი ამგვარად იყო გაკეთებული: დაფები ჰქონდა მათ, ჩარჩოში ჩატანებული.

²⁹ჩარჩოებში ჩასმულ დაფებზე ლომები, ხარები და ქერუბიმები იყო გამოსახული, ასევე ჩარჩოებზე – ლომებსა და ხარებს ქვემოთ და ზემოთ – ყვავილების ასხმული კონები.

³⁰ბრინჯაოს ოთხ-ოთხი ბორბალი და ბრინჯაოს ღერძები ჰქონდა თითო კვარცხლბეკს. მის ოთხსავე კუთხეზე იყო შვერილები. საბანელის ქვეშაც ჩამოსხმული შვერილები იყო, ხოლო ყოველ გვერდზე – ყვავილწნულები.

³¹მისი ჭრილი შიდა გვირგვინიდან მაღლითამდე ერთ წყრთას შეადგენდა, ჭრილი მრგვალი იყო, როგორც ამგვარი ნაკეთობა არის ხოლმე – წყრთა-ნახევარი. ჭრილზე ჩუქურთმები იყო. მისი კედლები ოთხკუთხედი იყო, არა მრგვალი.

³²ოთხი ბორბალი ჰქონდა კედლებს ქვემოთ, და ბორბლების ღერძები კვარცხლბეკზე იყო დამაგრებული; თითო ბორბლის სიმაღლე – ერთ-ნახევარი წყრთა იყო.

³³ბორბლები ეტლის ბორბლებივით იყო გაკეთებული, ღერძები, სალტეები, მანები და მორგვები მთლიანად ბრინჯაოთი იყო ჩამოსხმული.

³⁴ოთხი შვერილი ჰქონდა ყოველი კვარცხლბეკის ოთხსავე კუთხეს, კვარცხლბეკთან ერთად იყო ჩამოსხმული.

³⁵კვარცხლბეკის თავზე იყო წრე ნახევარი წყრთა სიმაღლისა, კვარცხლბეკის სახელურები და კედლები მისივე მასალისგან იყო.

³⁶და ამოკვეთა სახელურების ფიცრებსა და მის კედლებზე ქერუბიმები, ლომები და ფინიკის ხეები ერთმანეთის დაშორებით, ირგვლივ – ყვავილწნულები.

³⁷ასეთი ათი კვარცხლბეკი გააკეთა, ყველა ერთიანად იყო ჩამოსხმული, ერთი ზომა ჰქონდა, ერთი სახე.

³⁸და გააკეთა ბრინჯაოს ათი საბანელი, თითოეული ორმოც ბათს იტევდა, ოთხი წყრთა იყო თითოეული საბანელი, ყოველი საბანელი კვარცხლბეკზე იდგა.

³⁹ხუთი კვარცხლბეკი სახლის მარჯვენა ფრთაზე დადგა, ხუთი – სახლის მარცხენა ფრთაზე, ზღვა სამხრეთ-აღმოსავლეთით, სახლის მარჯვენა მხარეს მოათავსა.

⁴⁰გააკეთა ხირამმა საბანლები, აქანდაზები და სასხურებლები, და მოათავა ყველა სამუშაო, რასაც უკეთებდა იგი მეფე სოლომონს უფლის სახლში.

⁴¹ორი სვეტი და სვეტების თავზე დასადგმელი ბუღაურები მისი ორი ბალიშითურთ, ორი ცხაური სვეტებზე დასადგმელი ბუღაურების მოსართავად.

⁴²400 ბროწეული ორი ცხაურისთვის, ბროწეულების ორი რიგი თითოეულ ცხაურს, სვეტებზე დასადგმელი ბუღაურის ბალიშების მოსართავად.

⁴³ათი კვარცხლბეკი, ათი საბანელი კვარცხლბეკებზე შესადგმელი.

⁴⁴ერთი ზღვა და 12 ხარი ზღვის ქვეშ.

⁴⁵ქვაბები, აქანდაზები და სასხურებლები – ყველა ეს ჭურჭელი, რომელიც ხირამმა გაუკეთა მეფე სოლომონს უფლის სახლში, გაპრიალებულ ბრინჯაოს წარმოადგენდა.

⁴⁶იორდანეს მხარეში ჩამოასხმევინა ისინი მეფემ, აყალო მიწაში, სუქოთსა და ცართანს შორის.

⁴⁷და დააწყო სოლომონმა ყველა ეს ჭურჭელი თავ-თავის ადგილას. ვერ გაირკვა ბრინჯაოს წონა მათი სიმრავლის გამო.

⁴⁸და გააკეთა სოლომონმა ყოველი ჭურჭელი, რაც უფლის ტაძრისთვის იყო განკუთვნილი: ოქროს სამსხვერპლო და ოქროსავე ტაბლა, რომელზედაც საწინაშეო პურები ეწყო.

⁴⁹ბაჯაღლო ოქროს სასანთლეები: ხუთი მარჯვენა მხარეს, ხუთიც მარცხენა მხარეს, დაბირის წინ, ყვავილებით, სანთურებითა და ოქროს მაშებითურთ.

⁵⁰ბაჯაღლო ოქროს ტაშტები, დანები, სასხურებლები, საჭდეები, საცეცხლურები; და ოქროსავე ანჯამები შიდა სახლიდან წმიდათა წმიდაში შესასვლელი კარებისთვის, ტაძარში შესასვლელი კარებისთვის.

⁵¹და მოთავდა ყოველი სამუშაო, რაც უფლის სახლში შეასრულა მეფე სოლომონმა; და მოიტანა სოლომონმა მამამისის, დავითის შემოწირულობა: ოქრო-ვერცხლი და ჭურჭელი და დააწყო უფლის ტაძრის საგანძურებში.