Read სბს–2013 4 მეფეთა 10 Bible Online

4 მეფეთა 10 - სბს–2013 bible

4 მეფეთა 10

¹ახაბს 70 შვილი ჰყავდა სამარიაში. და დაწერა იეჰუმ წერილები და დაუგზავნა სამარიაში იზრეყელის მთავრებს, უხუცესებსა და ახაბის შვილების გამზრდელებს. წერილში ნათქვამი იყო:

²„ახლა, როცა მოგივათ ეს წერილი, ხომ თქვენთან იქნებიან თქვენი ბატონის ძენი, თქვენს ხელთ არის ეტლები და ცხენები, ციხე-ქალაქი და საჭურველი.

³ჰოდა, ამოირჩიეთ თქვენი ბატონის ძეთაგან უკეთესი, ვინც თქვენ მოგწონთ, და დასვით მამამისის ტახტზე და იბრძოლეთ თქვენი ბატონის სახლისთვის.“

⁴და დიდად, დიდად შეშინდნენ და თქვეს: „აჰა, ორი მეფე ვერ დაუდგა წინ, ჩვენ როგორღა დავუდგეთ?“

⁵და შეუთვალეს იეჰუს სასახლის მოურავმა, ქალაქის განმგებელმა, უხუცესობამ და გამზრდელებმა: „შენი მსახურნი ვართ, როგორც გვიბრძანებ, ისე მოვიქცევით. არავის გავამეფებთ, როგორც გერჩიოს, ისე მოიქეცი.“

⁶და მისწერა მათ მეორე წერილი: „თუ ჩემიანები ხართ და ჩემს სიტყვას ემორჩილებით, წამოიღეთ თქვენი ბატონის ძეთა თავები და ხვალ ამ დროს იზრეყელში მოდით ჩემთან.“ უფლისწულები – 70 კაცი – ქალაქის დიდებულებთან იყვნენ, რომელნიც ზრდიდნენ მათ.

⁷როცა წერილი მოუვიდათ, გამოიყვანეს უფლისწულები და დახოცეს – 70 კაცი. კალათებში ჩააწყვეს მათი თავები და იზრეყელში გაუგზავნეს იეჰუს.

⁸და მივიდა მოციქული და მოახსენა: „მოიტანეს უფლისწულთა თავები.“ და თქვა: „ორ გროვად დაყარეთ კარიბჭის შესასვლელთან დილამდე.“

⁹დილა იყო, რომ გამოვიდა, დადგა და უთხრა მთელ ხალხს: „თქვენ უბრალონი ხართ. აჰა, მე ავუჯანყდი ჩემს ბატონს, მე მოვკალი, მაგრამ ესენი ვინ დახოცა?

¹⁰ამიერიდან იცოდეთ, რომ უფლის არც ერთი სიტყვა, რაც უბრძანებია მას ახაბის სახლზე, ფუჭად არ ჩაივლის. აღასრულა უფალმა, რაც ბრძანა თავისი მსახურის, ელიას პირით.“

¹¹და ამოხოცა იეჰუმ ვინც კი იყო დარჩენილი ახაბის სახლიდან იზრეყელში, ყველა მისი დიდებული, მისი მახლობლები, მისი მღვდლები, არავინ დარჩენილა მისიანი ცოცხალი.

¹²და ადგა და წავიდა და მივიდა სამარიაში. გზაში, ბეთ-ყეკედთან, მწყემსთა ბინებთან,

¹³შეხვდა იეჰუ იუდას მეფის, ახაზიას ძმებს და თქვა: „ვინა ხართ?“ და თქვეს: „ახაზიას ძმები ვართ. მეფისა და დედოფლის შვილების ამბის გასაგებად მივდივართ.“

¹⁴და თქვა: „ცოცხლად შეიპყარით!“ შეიპყრეს ცოცხლად და ჭასთან დახოცეს ბეთ-ყეკედში, 42 კაცი, ერთიც არ დატოვეს ცოცხალი.

¹⁵და წავიდა იქიდან და შეეყარა იონადაბს, რექაბის ძეს, რომელიც მის შესახვედრად მოდიოდა. მიესალმა და უთხრა: „ისევე წრფელია შენი გული, როგორც ჩემი გული შენდამი?“ და თქვა იონადაბმა: „წრფელია. წრფელია და მომეცი ხელი.“ და მისცა ხელი და მანაც აიყვანა თავის ეტლზე.

¹⁶და თქვა: „წამომყევი და ნახე ჩემი შური უფლისადმი.“ და დასვეს ეტლზე.

¹⁷და მივიდა სამარიას და ამოხოცა ყველა, ვინც კი დარჩენოდა ახაბს სამარიაში. და ბოლომდე გაანადგურა ყველანი, უფლის სიტყვისამებრ, როგორც ნაბრძანები ჰქონდა უფალს ელიასთვის.

¹⁸და შეკრიბა იეჰუმ მთელი ერი და გამოუცხადა: „ცუდად ემსახურებოდა ახაბი ბაყალს, იეჰუ უფრო მეტად მოემსახურება მას.

¹⁹ახლა შემიყარეთ ბაყალის ყველა ქადაგი, ყველა მისი მსახური და ყველა მისი ქურუმი, კაციშვილი არ აკლდეს, რადგან დიდი მსხვერპლშეწირვა მექნება ბაყალისთვის. ვინც დააკლდება, ვერ გადარჩება ცოცხალი.“ ასეთი ხრიკი მოიგონა იეჰუმ ბაყალის თაყვანისმცემლების ამოსაწყველად.

²⁰და თქვა იეჰუმ: გამოაცხადეთო ბაყალის დღესასწაული! და გამოაცხადეს.

²¹და დაგზავნა იეჰუმ მთელს ისრაელში; და მოვიდა ბაყალის ყველა მსახური, კაციშვილი არ დარჩენილა მოუსვლელი. და შევიდნენ ბაყალის სახლში და კიდით კიდემდე გაივსო ბაყალის სახლი.

²²და უთხრა სამოსლის მცველს იეჰუმ: „გამოუტანე სამოსელი ბაყალის ყველა მსახურს.“ მანაც გამოუტანა შესამოსელი.

²³და შევიდა იეჰუ იონადაბ რექაბის ძესთან ერთად ბაყალის სახლში და უთხრა ბაყალის მსახურებს: „მიათვალ-მოათვალიერეთ, რომ არ იყოს თქვენს შორის უფლის მსახურთაგანი ვინმე, რადგან მხოლოდ ბაყალის მსახურები უნდა იყვნენ აქ.“

²⁴შეუდგნენ მსხვერპლისა და სრულადდასაწველის შეწირვას. და გარეთ დააყენა იეჰუმ ოთხმოცი კაცი და უბრძანა: „იცოდეთ, თუ ვინმე გადარჩა იმათგან, ვისაც გაბარებთ, მის სულს თქვენ მოგკითხავთ.“

²⁵და როცა დასრულდა სრულადდასაწველის შეწირვა, უბრძანა იეჰუმ მალემსრბოლებსა და მეთაურებს: „წადით და დახოცეთ, არავინ გაგექცეთ.“ და მახვილით დახოცეს და იქვე დაყარეს მალემსრბოლებმა და მეთაურებმა. თავად კი იმ ქალაქისკენ წავიდნენ, სადაც ბაყალის სახლი იყო.

²⁶და გამოიტანეს ბაყალის სახლიდან ბაყალის ქანდაკებები და დაწვეს.

²⁷და დაამსხვრიეს ბაყალის ქანდაკი, და დაანგრიეს ბაყალის სახლი და სანაგვე ადგილად აქციეს დღესაქამომდე.

²⁸ასე გადააშენა იეჰუმ ბაყალი ისრაელიდან.

²⁹ოღონდ იერობოყამ ნებატის ძის ცოდვებისათვის, რითაც მან აცდუნა ისრაელი, არ დაუნებებია იეჰუს თავი, და არც ოქროს ხბორებისთვის, ბეთელსა და დანში რომ იდგა.

³⁰და უთხრა უფალმა იეჰუს: „იმის გამო, რომ სწორად მოიქეცი ჩემს თვალში და ყველაფერი აღასრულე ახაბის სახლზე, რაც გულში მქონდა, მეოთხე თაობამდე ისხდებიან შენი შთამომავლები ისრაელის ტახტზე.“

³¹მაგრამ მთელი გულით არ იცავდა იეჰუ უფლის, ისრაელის ღმერთის, რჯულს. არ დაუნებებია თავი იერობოყამის ცოდვებისთვის, რომლებითაც აცდუნა მან ისრაელი.

³²იმ ხანებში დაიწყო უფალმა მიწების ჩამოჭრა ირაელისთვის; სძლია ისრაელს ხაზაელმა მთელს მის საზღვრებზე და წაართვა

³³მზის აღმოსავლეთით იორდანედან გალაადის მთელი მხარე, გადის, რეუბენის, მანაშეს მიწები ყაროყერიდან დაწყებული, არნონის ხეობაში რომ არის, გალაადი და ბაშანი.

³⁴და იეჰუს დანარჩენი საქმენი, ყველაფერი, რაც გააკეთა, ყველა მისი გმირობა ისრაელის მეფეთა მატიანეშია ჩაწერილი.

³⁵და განისვენა იეჰუმ თავის მამებთან. და დამარხეს სამარიაში. და მის ნაცვლად მისი ძე – იეჰოახაზი გამეფდა.

³⁶სულ 28 წელი იმეფა იეჰუმ ისრაელზე სამარიაში.