Read სბს–2013 4 მეფეთა 11 Bible Online

4 მეფეთა 11 - სბს–2013 bible

4 მეფეთა 11

¹როცა დაინახა ღათალიამ, ახაზიას დედამ, რომ მოკვდა მისი შვილი, ადგა და ამოწყვიტა მთელი სამეფო მოდგმა.

²მაგრამ იოშებაყმა, მეფე იორამის ასულმა, ახაზიას დამ, აიყვანა იოაში, ახაზიას ძე, და მოიპარა დასახოცად განწირულ უფლისწულთაგან; და მის ძიძასთან ერთად საწოლ ოთახში დამალეს ღათალიასგან, და ვერ მოკლეს.

³ექვს წელს მალავდნენ იმასთან ერთად უფლის სახლში, მაშინ როცა ღათალია მეფობდა ქვეყანაზე.

⁴მეშვიდე წელს დაიბარა იეჰოიადაყმა მცველთა და მალემსრბოლთა ასისთავები და შეიყვანა ისინი უფლის სახლში, და აღთქმა მოსთხოვა მათ, და დააფიცა უფლის სახლში და აჩვენა მეფის ძე.

⁵და უბრძანა მათ და უთხრა: „აი, როგორ უნდა მოიქცეთ: თქვენგან მესამედმა, შაბათს მომსვლელთაგან, მეფის სასახლეში უნდა იყარაულოს.

⁶(მესამედმა – სურის კარიბჭესთან, მესამედმაც – კარიბჭესთან, მალემსრბოლთა უკან რომ არის). მორიგეობით იყარაულეთ სასახლეში.

⁷თქვენგან ორმა ნაწილმა, შაბათს გამომსვლელთაგან, უფლის სახლში უნდა იყარაულოს მეფის წინაშე.

⁸გარს შემოერტყით მეფეს იარაღით ხელში და, ვინც რიგებში შემოვა, მოკვდეს. ედექით მეფეს მისი გამოსვლისას და შესვლისას.“

⁹ყველაფერი ისე გააკეთეს ასისთავებმა, როგორც უბრძანა მათ იეჰოიადაყ მღვდელმა, და წაიყვანეს თავ-თავისი ხალხი – შაბათს მომსვლელნი, შაბათს გამსვლელებთან ერთად – და იეჰოიადაყ მღვდელთან მივიდნენ.

¹⁰და დაურიგა მღვდელმა ასისთავებს მეფე დავითის შუბები და ფარები, უფლის სახლში რომ იყო.

¹¹და დადგნენ მალემსრბოლები იარაღით ხელში სახლის მარჯვენა ფრთიდან სახლის მარცხენა ფრთამდე, სამსხვერპლოსთან და სახლთან, მეფის ირგვლივ.

¹²და გამოიყვანა მღვდელმა მეფის ძე, დაადგა სამეფო გვირგვინი და დასცა დასტური, და გაამეფეს და სცხეს, და ტაშს უკრავდნენ და ამბობდნენ: „დღეგრძელი იყოს მეფე!“

¹³და შემოესმა ღათალიას ხალხის ჩოჩქოლი და გავიდა ხალხთან უფლის სახლში.

¹⁴და დაინახა წესისამებრ სვეტთან მდგარი მეფე, და სარდლები და საყვირები მეფის გვერდით. მხიარულობს ქვეყნის ერი და საყვირებს ახმიანებენ. და დაიპო სამოსელი ღათალიამ და იყვირა: „ღალატია! ღალატი!“

¹⁵და უბრძანა იეჰოიადაყ მღვდელმა ასისთავებს – მხედართმთავრებს, და უთხრა: „გარეთ გაიყვანეთ ღათალია და ვინც უკან გაჰყვება, მახვილით მოკალით,“ რადგან მღვდელმა იფიქრა, უფლის სახლში არ მოკლანო.

¹⁶გზა მისცეს და წავიდა სასახლისკენ ცხენთა შესასვლელით და იქ მოკლეს.

¹⁷და დადო იეჰოიადაყმა აღთქმა უფალს, მეფესა და ერს შორის, რათა საუფლო ერი ყოფილიყო; და – მეფესა და ერს შორის.

¹⁸და შევიდა მთელი ქვეყნის ერი ბაყალის სახლში და დაანგრია იგი სამსხვერპლოიანად, და დალეწა მისი გამოსახულებანი და მოკლეს მათანი, ბაყალის ქურუმი, სამსხვერპლოების წინ. და დააწესა მღვდელმა ზედამხედველობა უფლის სახლზე.

¹⁹და წამოიყვანა ასისთავები, სასახლის მცველები, მალემსრბოლები და ქვეყნის ერი და მათაც გამოიყვანეს მეფე უფლის სახლიდან. მცველთა შესასვლელით სამეფო სახლში მივიდნენ; და მეფეთა ტახტზე დაჯდა იგი.

²⁰და გამხიარულდა მთელი ქვეყნის ერი და დაწყნარდა ქალაქი. ხოლო ღათალია მახვილით მოკლეს სამეფო სახლში.

²¹შვიდი წლისა იყო იეჰოაში, როცა გამეფდა.