Read სბს–2013 4 მეფეთა 16 Bible Online

4 მეფეთა 16 - სბს–2013 bible

4 მეფეთა 16

¹ფეკახის, რემალიას ძის მეჩვიდმეტე წელს გამეფდა ახაზი, იუდას მეფის, იოთამის ძე.

²20 წლისა იყო ახაზი, როცა გამეფდა, და 16 წელი იმეფა იერუსალიმში. სწორად არ იქცეოდა უფლის, თავისი ღვთის თვალში, არა ჰგავდა მამამისს, დავითს.

³და დადიოდა ისრაელის მეფის, იერობოყამ ნაბატის ძის გზით; თავისი შვილიც კი გაატარა ცეცხლში იმ წარმართთა ბილწი ჩვეულებისამებრ, რომელნიც უფალმა ისრაელიანთაგან აჰყარა.

⁴მსხვერპლს სწირავდა და საკმეველს აკმევდა გორაკებზე, ბორცვებზე და ყოველი დაბურული ხის ქვეშ.

⁵მაშინ აღდგნენ რეცინი, არამის მეფე, და ისრაელის მეფე ფეკახი, რემალიას ძე, იერუსალიმის წინაააღმდეგ საომრად, მოიმწყვდიეს ახაზი ალყაში, ქალაქის აღება უნდოდათ, მაგრამ ვერ სძლიეს.

⁶იმხანად დაუბრუნა რეცინმა, არამის მეფემ, ელათი არამს და აჰყარა იუდაელნი ელოთიდან. და შევიდნენ ედომელები ელოთში და დღემდე იქ ცხოვრობენ.

⁷და გაუგზავნა ახაზმა თიგლათ-ფილესარს, აშურის მეფეს, მოციქულები და შეუთვალა: „შენი მსახური და შენი შვილი ვარ მე. მოდი და მიხსენი არამის მეფისა და ისრაელის მეფისგან, რომელნიც აღდგნენ ჩემს წინააღმდეგ.“

⁸და აიღო ახაზმა ოქრო-ვერცხლი, რაც კი უფლის ტაძრისა და მეფის სახლის საგანძურებში იპოვებოდა და ძღვნად გაუგზავნა აშურის მეფეს.

⁹და ისმინა მისი აშურის მეფემ, მოადგა დამასკოს, აიღო იგი და ხალხი კირში გადაასახლა, ხოლო რეცინი მოკლა.

¹⁰და წავიდა მეფე ახაზი აშურის მეფის, თიგლათ-ფილესარის მისაგებებლად დამასკოში, და ნახა სამსხვერპლო, დამასკოში რომ იყო, და გაუგზავნა მეფე ახაზმა ურია მღვდელს სამსხვერპლოს ნახატი და მთელი მისი ნაგებობის გეგმა.

¹¹და ააშენა ურია მღვდელმა სამსხვერპლო იმგვარი, როგორი გეგმაც მეფე ახაზმა გაუგზავნა დამასკოდან; და ისევე გააკეთა სხვა ყველაფერი ურია მღვდელმა მეფე ახაზის დამასკოდან დაბრუნებამდე.

¹²და დაბრუნდა მეფე დამასკოდან, და იხილა მეფემ სამსხვერპლო, და მიეახლა მეფე სამსხვერპლოს, და მიიტანა მსხვერპლი.

¹³და დაწვა მასზე თავისი სრულადდასაწველი და პურეულის შესაწირავი, და დაღვარა თავისი საღვრელი, და თავისი სამშვიდობო მსხვერპლის სისხლი ასხურა სამსხვერპლოს.

¹⁴ბრინჯაოს სამსხვერპლო კი, უფლის წინაშე რომ იდგა, გადაანაცვლა ტაძრის წინა მხრიდან, სამსხვერპლოსა და უფლის ტაძარს შუა ადგილიდან, და მოათავსა ამ სამსხვერპლოს გვერდით, ჩრდილოეთის მხარეს.

¹⁵და უბრძანა მეფე ახაზმა მღვდელ ურიას: „დიდ სამსხვერპლოზე დაწვი დილის სრულადდასაწველი და საღამოს პურეულის ძღვენი, მეფის სრულადდასაწველი და მისი პურეულის ძღვენი, ქვეყნის მთელი ერის სრულადდასაწველი, მათი პურეულის ძღვენი და მათი საღვრელი. ყოველი სრულადდასაწველის სისხლი და ყოველი საკლავის სისხლი ასხურე მას. ბრინჯაოს სამსხვერპლოს კი მე მივხედავ.“

¹⁶ყველაფერი ისე გააკეთა ურია მღვდელმა, როგორც უბრძანა მეფე ახაზმა.

¹⁷და მოაძრო ახაზ მეფემ ფიცრები კვარცხლბეკებს და მოხსნა მათგან საბანელი, და ჩამოიღო ზღვა ბრინჯაოს ხარებიდან, რომლებზეც იდგა ის, და ქვის იატაკზე დადგა.

¹⁸გააუქმა საშაბათო ტალანი, ტაძართან რომ იყო აშენებული, და გარეთა სამეფო შესასვლელი უფლის ტაძრისკენ მოაქცია აშურის მეფის საამებლად.

¹⁹ახაზის დანარჩენი საქმენი, რაც გაუკეთებია, იუდას მეფეთა მატიანეშია ჩაწერილი.

²⁰და განისვენა ახაზმა თავის მამებთან, და დაიმარხა მამათა გვერდით დავითის ქალაქში. და მის ნაცვლად მისი ძე, ხიზკია გამეფდა.