Read სბს–2013 4 მეფეთა 20 Bible Online

4 მეფეთა 20 - სბს–2013 bible

4 მეფეთა 20

¹იმ ხანებში სასიკვდილოდ დასნეულდა ხიზკია, და მივიდა მასთან ესაია, ამოცის ძე, წინასწარმეტყველი, და უთხრა: „ასე ამბობს უფალი: ანდერძი დაუტოვე შენს სახლს, რადგან მოკვდები და ვერ განიკურნებიო.“

²ხიზკიამ კედლისკენ მიაბრუნა პირი და ევედრებოდა უფალს და ამბობდა:

³„უფალო! გაიხსენე, წრფელი გულით რომ დავდიოდი შენს წინაშე, კეთილად რომ ვიქცეოდი შენს თვალში!“ – და მწარედ ატირდა ხიზკია.

⁴შუა ეზოს არ გასცილებოდა ესაია, რომ გამოეცხადა უფლის სიტყვა:

⁵„გაბრუნდი და უთხარი ხიზკიას, ჩემი ერის წინამძღოლს, ასე ამბობს-თქო დავითის, მამაშენის ღმერთი: ‘შევიწყნარე შენი ვედრება, დავინახე შენი ცრემლი. აჰა, განგკურნავ; ზეგ უფლის სახლში წახვალ;

⁶და კიდევ თხუთმეტ წელიწადს შევმატებ შენს დღეებს, და აშურის მეფის ხელიდან დაგიხსნით შენ და ამ ქალაქს, და დავიფარავ ამ ქალაქს ჩემი გულისთვის და დავითის, ჩემი მსახურის გულისთვის.’“

⁷და თქვა ესაიამ: „მოიტანეთ ლეღვის ტყლაპი.“ და მოიტანეს და წყლულზე დაადეს, და განიკურნა.

⁸და უთხრა ხიზკიამ ესაიას: „რა იქნება იმის ნიშნად, რომ განმკურნავს უფალი, და რომ ზეგ უფლის სახლში წავალ?“

⁹და თქვა ესაიამ: „ეს იყოს შენთვის ნიშნად უფლისგან, რომ აასრულებს უფალი თავის ნათქვამ სიტყვას: ათი საფეხურით წინ წავიდეს ჩრდილი თუ ათი საფეხურით დაბრუნდეს უკან?“

¹⁰და თქვა ხიზკიამ: „ადვილია ჩრდილისთვის ათი საფეხურით წინსვლა. არა, უკან დაბრუნდეს ათი საფეხურით.“

¹¹და შესთხოვა უფალს ესაია წინასწარმეტყველმა, და უკან დააბრუნა უფალმა ჩრდილი საფეხურებზე, სადაც ჩამოდიოდა იგი ახაზის საფეხურებზე, ათი საფეხურით.

¹²ამ დროს გამოუგზავნა მეროდაქ-ბალადანმა, ბალადანის ძემ, ბაბილონის მეფემ ხიზკიას წერილები და ძღვენი, რადგან გაგებული ჰქონდა, რომ ავად იყო ხიზკია.

¹³და მოუსმინა ხიზკიამ მათ და დაათვალიერებინა მთელი თავისი სალარო, ოქრო-ვერცხლი, ნელსურნელებანი, რჩეული ზეთები, არსენალი, ყველაფერი, რაც კი მის საუნჯეებში იპოვებოდა. ერთი ნივთიც არ დარჩენილა მთელ მის სახლსა და სამფლობელოში, რომ არ ეჩვენებინა მათთვის ხიზკიას.

¹⁴და მივიდა ესაია წინასწარმეტყველი მეფე ხიზკიასთან და უთხრა: „რა თქვეს ამ კაცებმა და საიდან მოვიდნენ შენთან?“ და თქვა ხიზკიამ: „შორი ქვეყნიდან მოვიდნენ, ბაბილონიდან.“

¹⁵და თქვა: „რა ნახეს შენს სახლში?“ და თქვა ხიზკიამ: „ყველაფერი ნახეს, რაც სახლში მაქვს. არაფერი დარჩენილა ჩემს საუნჯეებში, რომ არ მეჩვენებინა მათთვის.“

¹⁶და უთხრა ესაიამ ხიზკიას: „ისმინე უფლის სიტყვა:

¹⁷აჰა, დადგება დრო და ყველაფერს, რაც სახლში გაქვს, და რაც შენს მამებს დღემდე მოუანაგრებიათ, ბაბილონში წაიღებენ. აღარაფერი დარჩებაო, – ამბობს უფალი. –

¹⁸და ზოგიერთს შენს ძეთაგან, რომლებიც შენგან გამოვლენ, წაიყვანენ და საჭურისებად დააყენებენ ბაბილონის მეფის კარზე.“

¹⁹და უთხრა ხიზკიამ ესაიას: „უფლის სიტყვა, რაც შენ წარმოსთქვი, კარგია.“ და თქვა: „მშვიდობა და კეთილდღეობა იქნება ჩემი სიცოცხლის მანძილზე.“

²⁰ხიზკიას დანარჩენი საქმენი, ყველა მისი გმირობა, აგრეთვე ტბორი და წყალსადენი რომ გააკეთა და ქალაქში წყალი გაიყვანა, იუდას მეფეთა მატიანეშია ჩაწერილი.

²¹და განისვენა ხიზკიამ თავის მამებთან. და მის ნაცვლად გამეფდა მისი ძე – მანაშე.