Read სბს–2013 4 მეფეთა 22 Bible Online

4 მეფეთა 22 - სბს–2013 bible

4 მეფეთა 22

¹რვა წლისა იყო იოშია, როცა გამეფდა, და 31 წელი იმეფა იერუსალიმში. დედამისს ერქვა იედიდა, ბოცკათელი ყადაიას ასული იყო.

²უფლის მოსაწონად იქცეოდა და ყველაფერში დავითის, მამამისის გზას მიჰყვებოდა: არც მარჯვნივ გადახრილა და არც – მარცხნივ.

³იოშიამ თავისი მეფობის მეთვრამეტე წელს გაგზავნა უფლის სახლში შაფან მწიგნობარი, მეშულამის ძის, აცალიას ძე, და უთხრა:

⁴„ადი მღვდელმთავარ ხილკიასთან და დაათვლევინე უფლის სახლში შემოსული მთელი ფული, რაც ზღურბლის მცველებმა აკრიფეს ხალხისგან,

⁵ხელში ჩააბარონ სამუშაოთა მწარმოებლებს, რომლებიც უფლის სახლში არიან განწესებულნი, მათ კი დაურიგონ უფლის ტაძრის მუშებს, გარღვეულ კედლებს რომ ამაგრებენ,

⁶ასევე ხუროებს, მშენებლებსა და ქვითხუროებს, და მათ, ვინც ხე-ტყესა და გათლილ ქვას ყიდულობს სახლის შესაკეთებლად.

⁷ოღონდ ნუ მოეთხოვებათ ხელში ჩათვლილი ვერცხლის ანგარიში, რადგან ისინი პატიოსნად იქცევიან.“

⁸და უთხრა მღვდელმთავარმა ხილკიამ შაფან მწიგნობარს: „რჯულის წიგნი ვიპოვე უფლის სახლში.“ მისცა ხილკიამ წიგნი შაფანს და წაიკითხა მან.

⁹და მოვიდა შაფან მწიგნობარი მეფესთან და მოახსენა ამბავი და უთხრა: „გადმოყარეს შენმა მსახურებმა უფლის სახლში მოძიებული ვერცხლი და ჩააბარეს სამუშაოთა მწარმოებლებს, რომლებიც უფლის სახლში არიან განწესებულნი.“

¹⁰და ამცნო შაფან მწიგნობარმა მეფეს: „წიგნი მომცაო მღვდელმა ხილკიამ.“ და წაიკითხა მეფის წინაშე შაფანმა.

¹¹და როცა მოისმინა მეფემ რჯულის წიგნის სიტყვები, სამოსელი დაიპო.

¹²უბრძანა მეფემ ხილკია მღვდელს, და ახიკამ შაფანის ძეს, და ყაქბორ მიქაიას ძეს, და შაფან მწიგნობარს და ყასაიას, მეფის მსახურს:

¹³„წადით, დაეკითხეთ უფალს ჩემზე, ხალხსა და მთელს იუდაზე ამ ნაპოვნი წიგნის სიტყვების შესახებ, რადგან დიდია უფლის რისხვა, რომელიც აღიგზნო ჩვენს მიმართ, რადგან არ ისმინეს ჩვენმა მამებმა ამ წიგნის სიტყვები და არ შეასრულეს, რაც ჩვენთვის იყო დაწერილი.“

¹⁴და მივიდნენ ხილკია მღვდელი, ახიკამი, ყაქბორი, შაფანი და ყასაია ხულდასთან, წინასწარმეტყველ ქალთან, რომლის ქმარი, შალუმი, ძე თიკვასი, ძისა ხარხასისა, სამოსელთა მცველი იყო. ქალი იერუსალიმის მეორე უბანში ცხოვრობდა, და დაელაპარაკნენ მას.

¹⁵და უთხრა ქალმა მათ: „ასე ამბობს უფალი, ისრაელის ღმერთი: უთხარით იმ კაცს, რომელმაც ჩემთან გამოგაგზავნათ,

¹⁶ასე ამბობს-თქო უფალი: აჰა, უბედურებას მოვუვლენ ამ ადგილს და მის მცხოვრებლებს, ახდება ამ წიგნის ყოველი სიტყვა, იუდას მეფეს რომ წაუკითხავს.

¹⁷რაკი დამივიწყეს და საკმეველს უკმევდნენ უცხო ღმერთებს, რომ გავერისხებინე თავიანთი ხელის ნამოქმედარით, ჩემი რისხვა მოედება ამ ადგილს და არ ჩაქრება.

¹⁸იუდას მეფეს კი, რომელმაც უფალთან საკითხავად გამოგაგზავნათ, უთხარით: ასე ამბობს-თქო ისრაელის ღმერთი: რაკი შეისმინე ეს სიტყვები:

¹⁹რადგან გული აგიჩვილდა და ქედი მოიდრიკე უფლის წინაშე, როცა გაიგე, რაც დავძახე ამ ადგილს და მის მცხოვრებთ, გაუდაბურება და შეჩვენება რომ ელით, და სამოსელი დაიპე და ტიროდი ჩემს წინაშე, მეც შევისმინე შენი, – ბრძანებს უფალი.

²⁰ამიტომაც, აჰა, წაგიყვან შენს მამებთან, მშვიდობით ჩახვალ შენს სამარეში, და არ იხილავენ შენი თვალები ყველა იმ უბედურებას, რაც უნდა დავატეხო ამ ადგილს.“ და მიუტანეს მეფეს ეს ამბავი.