Read სბს–2013 4 მეფეთა 23 Bible Online

4 მეფეთა 23 - სბს–2013 bible

4 მეფეთა 23

¹და მოუწოდა მეფემ, რათა შეკრებილიყო მასთან იუდას მთელი უხუცესობა და იერუსალიმი.

²და ავიდა მეფე უფლის სახლში და ყველა იუდაელი, და იერუსალიმის ყველა მცხოვრები მასთან ერთად, და მღვდლები და წინასწარმეტყველნი, მთელი ხალხი, დიდიან-პატარიანად, და ხმამაღლა წაუკითხა მათ მეფემ ყოველი სიტყვა აღთქმის წიგნისა, რომელიც უფლის სახლში იპოვეს.

³და შედგა მეფე თავის საყდარზე და დადო აღთქმა უფლის წინაშე, რომ ივლიდა უფლის კვალზე, ყურად იღებდა მის მცნებებს, მის მოწმობებსა და მის წესებს მთელი გულითა და სულით, რათა აღსრულებულიყო ამ წიგნში ჩაწერილი აღთქმის სიტყვები. და მოიწონა აღთქმა მთელმა ხალხმა.

⁴და გამოატანინა მეფემ მღვდელმთავარ ხილკიას, მეორე ხარისხის მღვდლებსა და ზღურბლის მცველებს უფლის ტაძრიდან ბაყალისთვის, აშერასათვის და მთელი ციური მხედრობისთვის გაკეთებული ნივთები და ცეცხლს მისცა იერუსალიმს გარეთ, კიდრონის ველზე, ხოლო ნაცრის წაღება ბეთელში ბრძანა.

⁵და გაყარა იუდას მეფეთა მიერ დაყენებული ქურუმები, რომლებიც მსხვერპლს სწირავდნენ გორაკებზე იუდას ქალაქებსა და იერუსალიმის სანახებში, და გუნდრუკს უკმევდნენ ბაყალს, მზესა და მთვარეს, ცთომილთა და მთელ ციურ მხედრობას.

⁶და გაიტანა აშერა უფლის სახლიდან იერუსალიმს გარეთ, კიდრონის ხევისკენ, და დაწვა კიდრონის ხევში, ნაცარტუტად აქცია, და მისი ფერფლი მდაბიოთა სასაფლაოზე დაყარა.

⁷და დაანგრია უფლის ტაძართან მდგარი მსიძავთა სახლები, სადაც დედაკაცები სამოსელს უქსოვდნენ აშერას.

⁸და გამოყარა იუდას ქალაქებიდან ქურუმები და წაბილწა გორაკები, სადაც აკმევდნენ ქურუმები გუნდრუკს, გებაყიდან ბეერ-შებაყამდე, და დაანგრია კარიბჭის გორაკები, ერთი ქალაქის მთავრის, იოშუაყის, კარიბჭის შესასვლელთან რომ იყო, და მეორე – ქალაქის კარიბჭის ხელმარცხნივ.

⁹თუმცა გორაკთა ქურუმები არ აღავლენდნენ უფლის სამსხვერპლოზე იერუსალიმში, მაგრამ ხმიადებს კი ჭამდნენ თავიანთ ძმებთან ერთად.

¹⁰და წაბილწა თოფეთი, ბენ-ჰინომის ველზე რომ იყო, რათა არავის გაეტარებინა ცეცხლში მოლექისთვის თავისი ძე ან ასული.

¹¹და გაუშვა ცხენები, რომლებსაც იუდას მეფეები მზეს უძღვნიდნენ უფლის სახლში, შესასვლელის წინ, საჭურის ნათან-მელექის პალატთან, ფარურიმში, მზის ეტლები კი ცეცხლში დაწვა.

¹²სამსხვერპლოებიც ახაზისეული სამყოფლის ბანზე, იუდას მეფეებმა რომ აღმართეს, და სამსხვერპლოები, რომლებიც აღმართა მანაშემ უფლის ტაძრის ორთავე ეზოში, დაანგრია მეფემ, მოაშორა იქაურობას და კიდრონის ხევში ჩაყარა მათი ფერფლი.

¹³და წაბილწა გორაკები, იერუსალიმის წინ რომ არის, განადგურების მთის მარჯვნივ, სოლომონ მეფემ რომ მოუწყო ყაშთორეთს, ციდონელთა სიბილწეს, ქემოშს, მოაბის სიბილწეს, და მილქომს, ყამონიანთა სისაძაგლეს.

¹⁴და დალეწა სვეტები და გაჩეხა აშერები, ადამიანის ძვლებით აავსო მათი ადგილი.

¹⁵ასევე დაანგრია ბეთელის სამსხვერპლო, იერობოყამ ნებატის ძის, ისრაელის მაცდუნებლის მოწყობილი გორაკი; და ცეცხლს მისცა ის სამსხვერპლო და გორაკი დაანგრია და დაწვა ის გორაკი, გააცამტვერა, და დაწვა აშერა.

¹⁶და გაიხედა იოშიამ და დაინახა სამარხები, მთაზე რომ იყო, და გააგზავნა და ამოაღებინა სამარხებიდან ძვლები, და სამსხვერპლოზე დააწვევინა, და ამით წაბილწა იგი უფლის სიტყვისამებრ, როგორც გამოცხადებული ჰქონდა ღვთისკაცს, რომელმაც წინასწარ აუწყა ეს ამბები.

¹⁷და თქვა მან: „ეს რა ძეგლია, აქ რომ ვხედავ?“ და უთხრეს ქალაქის მცხოვრებლებმა: „იუდადან მოსული ღვთისკაცის სამარხია, რომელმაც ეს ამბები გვიწინასწარმეტყველა, შენ რომ დაათიე ახლა ბეთელის სამსხვერპლოებს.“

¹⁸და თქვა: „მოასვენეთ, ნურავინ დაძრავს მის ძვლებს.“ ასე დაიცვეს მისი ძვლები და ძვლები წინასწარმეტყველისა, რომელიც სამარიიდან მოდიოდა ხოლმე.

¹⁹ასევე გორაკთა ყველა ბომონი, სამარიის ქალაქებში რომ ჰქონდათ აშენებული ისრაელის მეფეებს უფლის გასარისხებლად, დაანგრია იოშიამ და ისეთივე დღე დააწია მათ, როგორც ბეთელში.

²⁰სამსხვერპლოებზე დაკლა გორაკთა ქურუმები, ვინც კი იქ იყო, და ზედ დაწვა ადამიანთა ძვლები, და იერუსალიმში დაბრუნდა.

²¹და უბრძანა მეფემ მთელ ერს და უთხრა: „მოუმზადეთ პასექი უფალს, თქვენს ღმერთს, როგორც ამ აღთქმის წიგნში სწერია!“

²²რადგან არ მომზადებულა ამგვარი პასექი მსაჯულთა დროიდან, რომლებიც განაგებდნენ ისრაელს, და არც ისრაელის მეფეთა და იუდას მეფეთა ხანაში.

²³მეფე იოშიას მეთვრამეტე წელს უფლისათვის მომზადდა ეს პასექი იერუსალიმში.

²⁴ასევე მესულთანეები, მჩხიბავები, თერაფიმები, კერპები და ყოველი სისაძაგლე, რაც კი გამოჩნდა იუდას ქვეყანაში და იერუსალიმში, აღმოფხვრა იოშიამ, რათა აღსრულებულიყო იმ წიგნში დაწერილი აღთქმის სიტყვები, რომელიც უფლის სახლში იპოვა მღვდელმა ხილკიამ.

²⁵არ ყოფილა მანამდე მისი მსგავსი მეფე, რომელიც მთელი გულითა და სულით, მთელი თავისი ძალით, მოსეს მთელი რჯულით რომ ყოფილიყო მოქცეული უფლისადმი; არც მის მერე გამოჩენილა მისი მსგავსი.

²⁶მაგრამ არ შებრუნებულა უფალი დიდი რისხვისგან, რითაც მრისხანებდა იგი იუდაზე, ყველა იმ წყენის გამო, რითაც მანაშემ განარისხა იგი.

²⁷და თქვა უფალმა: „იუდასაც მოვიშორებ ჩემგან, როგორც ისრაელი მოვიშორე; არად ჩავაგდებ ამ ქალაქს, იერუსალიმს, რომელიც ავირჩიე, და სახლს, რომელზეც ვთქვი: იქ იქნება-მეთქი ჩემი სახელი.“

²⁸იოშიას დანარჩენი საქმენი, ყველაფერი, რაც გაუკეთებია, იუდას მეფეთა მატიანეშია ჩაწერილი.

²⁹მის დროს გამოვიდა ფარაონი ნექო, ეგვიპტელთა მეფე, აშურის მეფის წინააღმდეგ მდინარე ევფრატზე. და გაემართა მეფე იოშია მის დასახვედრად, და დანახვისთანავე მოკლა იგი ფარაონმა მეგიდოში.

³⁰და წაასვენეს იგი მისმა მსახურებმა მეგიდოდან იერუსალიმში, და მის სამარხში დამარხეს. და გამოიყვანა ქვეყნის ხალხმა იეჰოახაზ იოშიას ძე, და სცხო ზეთი და მამამისის ნაცვლად გაამეფა.

³¹23 წლისა იყო იეჰოახაზი, როცა გამეფდა და სამი თვე იმეფა იერუსალიმში. დედამისი იყო ხამუტალი, ლიბნელი იერემიას ასული.

³²ბოროტებას სჩადიოდა უფლის თვალში, თავისი მამების მსგავსად.

³³და დაიჭირა იგი ფარაონმა ნექომ რიბლაში, ხამათის ქვეყანაში, რომ იერუსალიმში არ ემეფა, და დააკისრა ქვეყანას 100 ტალანტი ვერცხლი და ერთი ტალანტი ოქრო.

³⁴და გაამეფა ფარაონმა ნექომ ელიაკიმი, იოშიას ძე, მამამისის იოშიას ნაცვლად და დაარქვა სახელად იეჰოიაკიმი. იეჰოახაზი კი აიყვანა და ეგვიპტეში წაიყვანა, სადაც ის მოკვდა.

³⁵ოქრო-ვერცხლს აძლევდა იეჰოიაკიმი ფარაონს; ოღონდ ქვეყანაზე გაანაწილა ფარაონის ბრძანებისამებრ მისაცემი ვერცხლი. ქვეყნის ხალხში თითოეულს მისი შეძლების მიხედვით დააკისრა ფარაონ ნექოსათვის მისაცემი ვერცხლი.

³⁶25 წლისა იყო იეჰოიაკიმი, როცა გამეფდა, და 11 წელი იმეფა იერუსალიმში. დედამისი იყო ზებუდა, რუმელი ფედაიას ასული.

³⁷და ბოროტებას სჩადიოდა უფლის თვალში, მსგავსად მისი მამებისა.