Read სბს–2013 4 მეფეთა 3 Bible Online

4 მეფეთა 3 - სბს–2013 bible

4 მეფეთა 3

¹და იორამ ახაბის ძე გამეფდა ისრაელზე სამარიაში იუდას მეფის – იოშაფატის მეთვრამეტე წელს და 12 წელი იმეფა.

²ბოროტებას სჩადიოდა უფლის თვალში, თუმცა არა მამამისივით და დედამისივით: მან მოგლიჯა ბაყალის ქანდაკი, მამამისმა რომ აღმართა.

³მაგრამ მიწებებული იყო და არ განრიდებია ცოდვებს იერობოყამისა, ნებატის ძისა, რომელმაც აცდუნა ისრაელი.

⁴და მოაბის მეფე მეშაყი დიდძალი ცხვრის პატრონი იყო და უგზავნიდა ისრაელის მეფეს 100 ათას კრავსა და 100 ათას გაუპარსავ ვერძს.

⁵და ახაბის სიკვდილის შემდეგ განუდგა მოაბის მეფე ისრაელის მეფეს.

⁶მაშინ გამოვიდა იორამ მეფე სამარიიდან და აღრიცხა მთელი ისრაელი.

⁷და გავიდა და შეუთვალა იოშაფატს, იუდას მეფეს: განმიდგა მოაბის მეფე და ხომ არ გამოხვალო ჩემთან ერთად მოაბის წინააღმდეგ? და შემოუთვალა იუდას მეფემ: „გამოვალ. როგორც შენ, ისე მე, როგორც შენი ხალხი, ისე ჩემი ხალხი, როგორც შენი ცხენები, ისე ჩემი ცხენები.“

⁸და თქვა იორამ მეფემ: „რომელი გზით წავიდეთ?“ და თქვა იოშაფატ მეფემ: „ედომის უდაბნოს გზით.“

⁹და გავიდნენ ისრაელის მეფე, იუდას მეფე და ედომის მეფე. და იტრიალეს შვიდი დღე და ვერ ნახეს საკმარისი წყალი ლაშქრისთვის და პირუტყვისთვის, უკან რომ მოჰყვებოდათ.

¹⁰და თქვა ისრაელის მეფემ: „აჰა, შეგვყარა უფალმა ეს სამი მეფე, რათა მოაბის ხელში ჩაგვაგდოს.“

¹¹და თქვა იოშაფატმა: „ხომ არ არის აქ სადმე უფლის წინასწარმეტყველი, რომ უფლისთვის ვაკითხვინოთ?“ და მიუგო ისრაელის მეფის ერთმა მსახურმა და უთხრა: „არის აქ ელისე, შაფატის ძე, რომელიც ხელზე წყალს უსხამდა ელიას.“

¹²და თქვა იოშაფატმა: „უფლის სიტყვაა მასთან.“ და ჩავიდნენ მასთან ისრაელის მეფე, და იოშაფატი, და ედომის მეფე.

¹³და უთხრა ელისემ ისრაელის მეფეს: „რა გინდა ჩემგან? წადი მამაშენის წინასწარმეტყველებთან და დედაშენის წინასწარმეტყველებთან.“ და თქვა ისრაელის მეფემ: „არა, იმისთვის შეგვყარა უფალმა ეს სამი მეფე, რომ მოაბის ხელში ჩაგვაგდოს.“

¹⁴და თქვა ელისემ: „ცაბაოთ უფალს ვფიცავ, რომლის წინაშეც მე ვდგავარ, რომ ზედაც არ შეგხედავდი, პატივს რომ არ ვცემდე იოშაფატს, იუდას მეფეს.

¹⁵ახლა, მომიყვანეთ მეჩანგე.“ და როცა უკრავდა მეჩანგე, უფლის ხელი შეეხო ელისეს.

¹⁶და თქვა ელისემ: „ასე ამბობს უფალი: ‘თხრილები თხრილებზე დათხარეთ ამ ველზე.’

¹⁷რადგან ასე ამბობს უფალი: ‘ვერ დაინახავთ ქარს და ვერ დაინახავთ წვიმას, მაგრამ წყლით აივსება ეს ველი, თქვენცა სვით და თქვენმა პირუტყვმაც.’

¹⁸მხოლოდ ამას არ იკმარებს უფალი; მოაბსაც ჩაგაგდებინებთ ხელში.

¹⁹და შემუსრავთ ყველა გამაგრებულ ქალაქს და ყველა რჩეულ ქალაქს, და ყველა საუკეთესო ხეს აჩეხავთ, ყველა წყაროსთვალს ამოავსებთ, და საუკეთესო მიწებს ქვით აავსებთ.“

²⁰დილით, პურეულის ძღვენის მიტანისას, წამოვიდა წყალი ედომის გზაზე და წყლით დაიფარა მიწა.

²¹და როცა გაიგო მოაბმა, რომ დაიძრნენ მეფეები მათთან საომრად, ყველამ თავი მოიყარა, სარტყლის შემომრტყმელმაც და უხნესებმაც, და დადგნენ საზღვართან.

²²დილაადრიანად ადგნენ ისინი, და როცა მზე წყალზე გაბრწყინდა, მოაბელებს შორიდან ეს წყალი წითლად მოეჩვენათ სისხლივით.

²³და თქვეს: „ეს სისხლია, დატაკებიან მეფეები ერთმანეთს და დაუხოციათ. აბა, შენია ნადავლი, მოაბო!“

²⁴და მიადგნენ ისრაელის ბანაკს. და შეუტია ისრაელმა და დასცხო მოაბს და უკუაქცია, მისდევდნენ და ჟლეტდნენ მოაბელებს.

²⁵ქალაქები დაანგრიეს; საუკეთესო მიშებში თითო კაცმა თითო ქვა ისროლა და ქვით აავსო. და ყველა წყაროსთვალი ამოავსეს, ყველა საუკეთესო ხე აჩეხეს. ქვა ქვაზე არ დაუტოვებიათ კირ-ხარესეთში. შემოადგნენ მეშურდულენი და დააქციეს.

²⁶დაინახა მოაბის მეფემ, რომ დამარცხდა ბრძოლაში, და გაიყოლა 700 კაცი, მახვილის ამომწვდელი, რომ ედომის მეფისკენ გაეღწია, მაგრამ ვერ შეძლეს.

²⁷და მოჰკიდა ხელი თავის პირმშოს, მის ნაცვლად რომ უნდა გამეფებულიყო, და სრულადდასაწველ მსხვერპლად შესწირა გალავანზე. ძლიერ შეზარა ამან ისრაელი, და მოსცილდნენ იქაურობას და თავისი ქვეყნისკენ გაბრუნდნენ.