Read სბს–2013 4 მეფეთა 5 Bible Online

4 მეფეთა 5 - სბს–2013 bible

4 მეფეთა 5

¹ნაყამანი, არამის მეფის მხედართმთავარი, დიდად პატივდებულ კაცად ჰყავდა მიღებული თავის ბატონს, რადგან მისი წყალობით გაამარჯვებინა უფალმა არამელებს. მამაცი კაცი იყო ნაყამანი, მაგრამ კეთროვანი.

²და როცა სათარეშოდ იყვნენ გასული არამელები, ტყვედ წაიყვანეს ისრაელის ქვეყნიდან პატარა გოგონა, რომელიც ნაყამანის ცოლს ემსახურებოდა.

³და უთხრა მან თავის ქალბატონს: „ნეტავ მისულიყო ჩემი ბატონი წინასწარმეტყველთან სამარიაში, ის განკურნავდა მას კეთრისაგან.“

⁴და მივიდა ნაყამანი და უამბო თავის ბატონს: ასე და ასე ამბობსო ისრაელის ქვეყნიდან ტყვედ წამოყვანილი გოგონა.

⁵და უთხრა არამის მეფემ ნაყამანს: „წადი და მე წერილს გაგატან ისრაელის მეფესთან.“ წავიდა და თან წაიღო 10 ტალანტი ვერცხლი, 6 ათასი შეკელი ოქრო და 10 ხელი ტანსაცმელი.

⁶და მიართვა ისრაელის მეფეს წერილი, რომელშიც ეწერა: „ამ წერილთან ერთად გიგზავნი ნაყამანს, ჩემს მსახურს, რომ განკურნო იგი კეთრისაგან.“

⁷და როცა წაიკითხა ისრაელის მეფემ წერილი, სამოსელი დაიპო და თქვა: „ღმერთი ხომ არა ვარ, რომ ვკლავდე და ვაცოცხლებდე, რომ მითვლის: კეთრისგან განმიკურნეო ეს კაცი. იცოდეთ, საბაბს ეძებს იგი ჩემს წინააღმდეგ.“

⁸და როცა გაიგო ელისემ, ღვთისკაცმა, სამოსელი დაიპოო ისრაელის მეფემ, შეუთვალა: „რისთვის დაიპე სამოსელი? მოვიდეს ჩემთან ნაყამანი და დარწმუნდება, რომ არის წინასწარმეტყველი ისრაელში.“

⁹და მივიდა ნაყამანი თავისი ცხენებითა და თავისი ეტლით და ელისეს სახლის შესასვლელთან გაჩერდა.

¹⁰გამოუგზავნა ელისემ მსახური და შემოუთვალა: წადი, შვიდგზის იბანე იორდანეში და გაგიახლდება ხორცი, და გაწმედილი იქნებიო.

¹¹და გაბრაზდა ნაყამანი, წავიდა და თქვა: „აჰა, ვიფიქრე, გარეთ გამოვა, დადგება და უფლის, თავისი ღმერთის, სახელს ახსენებს, ადგილზევე დამადებს ხელს და კეთრისგან განმკურნავს-მეთქი.

¹²განა დამასკოს მდინარეები: აბანა და ფარფარი ისრაელის მთელს მდინარეებს არ სჯობია? განა იქ ვერ ვიბანებდი და ვერ გავსუფთავდებოდი?“ და გატრიალდა და წავიდა განრისხებული.

¹³და მიეახლნენ მისი მსახურნი, დაელაპარაკნენ და უთხრეს: „ჩვენო მამავ, საძნელო რამე რომ მოეთხოვა შენგან მაგ წინასწარმეტყველს, ხომ შეასრულებდი? მით უფრო, უნდა შეასრულო, როცა გეუბნება: ‘იბანე და განიწმიდებიო.’“

¹⁴და ჩავიდა, და შვიდგზის ჩაყვინთა იორდანეში, როგორც ღვთისკაცმა უთხრა, და ჩვილი ბავშვივით განუახლდა სხეული და განიწმიდა.

¹⁵და დაბრუნდა ღვთისკაცთან ის და მთელი მისი ამალა. და მივიდა და გაჩერდა მის წინ და უთხრა: „აჰა, დავრწმუნდი, რომ მთელს ქვეყანაზე მხოლოდ ისრაელშია ღმერთი. ახლა მიიღე საჩუქარი შენი მსახურისგან.“

¹⁶და თქვა: „ვფიცავ უფალს, რომლის წინაშეც ვდგავარ, რომ არ მივიღებ.“ და აიძულებდა აღებას, მაგრამ ვერ დაიყოლია.

¹⁷და თქვა ნაყამანმა: „თუ ასეა, მომცენ შენს მსახურს იმდენი მიწა, რამდენსაც წყვილი ჯორი წაიღებს, რომ ამიერიდან უფლის გარდა სხვა ღმერთებს არ შესწიროს სრულადდასაწველი შენმა მსახურმა.

¹⁸ეს ერთი რამ მაპატიოს უფალმა შენს მსახურს: როცა მივა ჩემი ბატონი რიმონის სახლში თაყვანის საცემად, დაეყრდნობა ჩემს ხელს და მეც მომიწევს თაყვანისცემა რიმონის სახლში, ჰოდა, რიმონის სახლში თაყვანისცემისას აპატიოს ეს შენს მსახურს.“

¹⁹და უთხრა: „მშვიდობით იარე.“ წავიდა ის და მცირე მანძილზე გასცდა მას.

²⁰და თქვა გეხაზიმ, ელისეს მსახურმა: „აჰა, არ გამოართვა ჩემმა ბატონმა ნაყამანს, ამ არამელს, მისი მოტანილი ძღვენი. უფლის მადლმა, გავეკიდები და მე გამოვართმევ რამეს.“

²¹და დაედევნა გეხაზი ნაყამანს. როცა დაინახა ნაყამანმა, რომ ვიღაც მისდევდა, ეტლიდან გადმოვიდა, შეეგება და ჰკითხა: „ხომ მშვიდობა არის?“

²²და უპასუხა: „მშვიდობა არის! ჩემმა ბატონმა შემოგითვალა: ‘ეფრემის მთიდან მესტუმრა ორი ყმაწვილი წინასწარმეტყველთაგან, იქნებ ერთი ტალანტი ვერცხლი და ორი ხელი ტანსაცმელი გეჩუქებინაო მათთვის.’“

²³და თქვა: ნაყამანმა: „ორი ტალანტი აიღე ბარემ.“ დაიყოლია და შეუხვია ორი ტალანტი ვერცხლი ორ ქისად და ორ ხელ ტანსაცმელთან ერთად მისცა წასაღებად თავის ორ მსახურს.

²⁴და როცა ის მივიდა ბორცვთან, გამოართვა მათ ეს ყველაფერი და სახლში გადამალა. და უკან გაისტუმრა მსახურები და წავიდნენ ისინიც.

²⁵ის კი მივიდა და გამოცხადდა ბატონთან. და უთხრა ელისემ: „საიდან მოდიხარ, გეხაზი?“ და თქვა: „არსად არ წასულა შენი მსახური.“

²⁶და უთხრა: „განა ჩემი გული შენ არ მოგყვებოდა, როცა ეტლიდან ჩამოხდა ის კაცი და შეგეგება? განა იმის დროა, რომ იხვეჭდე ვერცხლს, იხვეჭდე სამოსელს, ზეთისხილის ხეებსა და ვენახებს, ცხვარ-ძროხას, ყმებსა და მხევლებს?

²⁷დაე, შენ და შენს შთამომავლობას გადაგედოთ ნაყამანის კეთრი საუკუნოდ.“ და გამოვიდა მისგან გეხაზი კეთრით გათეთრებული, როგორც თოვლი.