Read სბს–2013 4 მეფეთა 7 Bible Online

4 მეფეთა 7 - სბს–2013 bible

4 მეფეთა 7

¹და თქვა ელისემ: „ისმინეთ უფლის სიტყვა. ასე ამბობს უფალი: ხვალ ამ დროს ერთი საწყაო გამტკიცებული ფქვილი ერთი შეკელი ეღირებაო, ორი საწყაო ქერიც – ერთი შეკელი სამარიის კარიბჭესთანო.“

²და მიუგო კარისკაცმა, რომლის მკლავსაც ეყრდნობოდა მეფე, და უთხრა ღვთისკაცს: „აჰა, სარკმლებიც რომ გახსნას უფალმა ცაზე, განა მოხდება ასეთი რამ?“ და თქვა ღვთისკაცმა: „აჰა, შენი თვალით იხილავ, მაგრამ ჭამით ვერ შეჭამ.“

³ოთხი კეთროვანი იჯდა კარიბჭის შესასვლელთან და ეუბნებოდნენ ერთმანეთს: „რისთვის ვსხედვართ აქ და სიკვდილს ველოდებით?

⁴თუ ქალაქში წასვლას გადავწყვეტთ, შიმშილობაა ქალაქში და იქ დავიხოცებით; თუ აქ დავრჩებით, მაინც დავიხოცებით. მოდით, ავდგეთ და არამელთა ბანაკში ჩავიდეთ; თუ ცოცხალი დაგვტოვეს, ხომ კარგი, თუ დაგვხოცეს, დავიხოცოთ.“

⁵და ადგნენ გარიჟრაჟზე, რომ არამელთა ბანაკში წასულიყვნენ. და მიადგნენ არამელთა ბანაკის ნაპირს. და აჰა, კაციშვილი არ იყო იქ.

⁶უფალს ჩაუსმენია არამელთა ბანაკისათვის ეტლებისა და ცხენების ხმაური და დიდძალი ჯარის ყიჟინა, და უთქვამთ ერთმანეთისთვის: „ალბათ ჩვენს წინააღმდეგ დაიქირავა ისრაელის მეფემ ხეთელთა და ეგვიპტელთა მეფეები, რათა თავს დაგვესხან.“

⁷და ამდგარან და გაქცეულან დილის ბინდბუნდში, მიუტოვებიათ კარვები, ცხენები და სახედრები, მთელი ბანაკი ხელუხლებლად, და გაქცეულან თავის გადასარჩენად.

⁸და მიადგნენ ეს კეთროვნები ბანაკის კიდეს და შევიდნენ ერთ კარავში. და ჭამეს და სვეს, აიღეს იქიდან ოქრო-ვერცხლი და ტანისამოსი, წამოიღეს და დამალეს. და მობრუნდნენ და სხვა კარავში შევიდნენ, და იქიდანაც აიღეს და წამოიღეს და დამალეს.

⁹და უთხრეს ერთმანეთს: „ასე არ უნდა ვიქცეოდეთ. ეს დღე სასიხარულო უწყების დღეა, თუ გავჩუმდით და გათენებამდე ვიცადეთ, ბრალს დაგვდებენ. წამოდი, წავიდეთ და მეფის სახლს შევატყობინოთ.“

¹⁰და მივიდნენ და გამოიძახეს კარიბჭის გუშაგები და უამბეს და უთხრეს: „არამელთა ბანაკში მივედით, კაციშვილის ჭაჭანება არ იყო იქ, ადამიანის ხმა არ ისმოდა, მხოლოდ ცხენები და ვირები დაგვხვდა დაბმული, და კარვები ხელუხლებლად.“

¹¹და დაუძახეს მათ გუშაგებს და მათაც მიიტანეს, ამბავი მეფის სახლში.

¹²და ადგა ღამით მეფე და უთხრა თავის მსახურთ: „გეტყვით, რას გვიპირებენ არამელები. იციან, რომ ვშიმშილობთ. და ბანაკიდან გავიდნენ, რომ ველზე ჩაგვისაფრდნენ. ისინი აპირებენ, რომ როგორც კი ქალაქიდან გავალთ, ცოცხლად შეგვიპყრონ და ქალაქში შემოიჭრნენ.“

¹³მიუგო ერთმა მსახურთაგანმა და თქვა: „გამოიყვანონ ქალაქში დარჩენილი ცხენებიდან ხუთი – აჰა, ისინი იქნებიან მთელი ისრაელის სიმრავლესავით, ქალაქში რომ დარჩა; აჰა, იქნებიან მთელი ისრაელის სიმრავლესავით, რომელიც დაილია. გავგზავნოთ და ვნახოთ.“

¹⁴და გაიყვანეს ორი წყვილი ცხენი ეტლში შებმული. და გაგზავნა მეფემ არამელთა ლაშქრის კვალზე და თქვა: „წადით და ნახეთ.“

¹⁵და იორდანემდე მიჰყვნენ მათ, და აჰა, მთელი გზა მოფენილია სამოსლითა და ნივთებით, არამელებს რომ დაბნეოდათ ფაციფუცში. გამობრუნდნენ მოციქულები და მოახსენეს მეფეს.

¹⁶და გამოეფინა ხალხი და გაძარცვეს არამელთა ბანაკი. ერთი საწყაო გამტკიცული ფქვილი ერთი შეკელი გახდა, ორი საწყაო ქერიც – ერთი შეკელი, მსგავსად უფლის სიტყვისა.

¹⁷კარიბჭესთან დააყენა მეფემ კარისკაცი, რომლის მკლავსაც ეყრდნობოდა. და გადათელა კარისკაცი ბრბომ კარიბჭეში და მოკვდა, როგორც ნათქვამი ჰქონდა ღვთისკაცს, როცა მასთან მივიდა მეფე.

¹⁸ასე უთხრა მაშინ ღვთისკაცმა მეფეს: „ხვალ ამ დროს სამარიის კარიბჭესთან ერთი საწყაო გამტკიცული ფქვილი ერთი შეკელი ეღირება, ორი საწყაო ქერიც – ერთი შეკელი.“

¹⁹და მიუგო მაშინ კარისკაცმა და თქვა: „აჰა, სარკმლებიც რომ გახსნას უფალმა ცაზე, განა მოხდება ასეთი ამბავი?“ ღვთისკაცმა კი მიუგო: „შენი თვალით იხილავ, ჭამით კი ვერ შეჭამ.“

²⁰და ასეც აუხდა. და გადათელა იგი ბრბომ კარიბჭეში და მოკვდა.