Read სბს–2013 4 მეფეთა 8 Bible Online

4 მეფეთა 8 - სბს–2013 bible

4 მეფეთა 8

¹ელისემ უთხრა დედაკაცს, რომელსაც შვილი გაუცოცხლა: „ადექი და წადი შენი ოჯახით და დადექი სადმე მწირად, სადაც შეძლებ, რადგან მოუხმო უფალმა შიმშილობას და მოვა კიდეც ქვეყანაზე შვიდი წლით.“

²და ადგა ის დედაკაცი და ღვთისკაცის სიტყვისამებრ მოიქცა: წავიდა თავისი ოჯახით და შვიდ წელიწადს მწირობდა ფილისტიმელთა ქვეყანაში.

³და როცა შვიდმა წელმა გაიარა, დაბრუნდა ეს ქალი ფილისტიმელთა ქვეყნიდან, და მოვიდა მეფესთან თავისი სახლ-კარისა და საყანის გამოსათხოვად.

⁴ამ დროს ელაპარაკებოდა მეფე გეხაზის, ღვთისკაცის მსახურს, და უთხრა: „მიამბე ყველა დიდი საქმე, რაც ელისეს გაუკეთებია.“

⁵და როცა უყვებოდა მეფეს, როგორ გააცოცხლა ელისემ მკვდარი, აჰა, ის დედაკაცი, რომელსაც შვილი გაუცოცხლა, ეხვეწებოდა მეფეს თავისი სახლ-კარისა და საყანის გამო. და თქვა გეხაზიმ: „მეფე-ბატონო, ეს სწორედ ის დედაკაცია, და სწორედ ეს არის მისი ძე, ელისემ რომ გააცოცხლა.“

⁶და გამოჰკითხა მეფემ დედაკაცს და მანაც უამბო ყოველივე. და მისცა მას მეფემ ერთი კარისკაცი და უთხრა: „დაუბრუნეთ მთელი მისი საკუთრება და მინდვრის მთელი მოსავალი იმ დღიდან, რაც ქვეყანა მიატოვა მან, დღევანდელ დღემდე.“

⁷და მივიდა ელისე დამასკოში, როცა ავად იყო ბენ-ჰადადი, არამის მეფე. და მოახსენეს და უთხრეს: ღვთისკაციაო მოსული.

⁸და უთხრა მეფემ ხაზაელს: „აიღე ხელში ძღვენი და შეეგებე ღვთისკაცს. და უფალთან აკითხვინე, განვიკურნები თუ არა ამ სენისგან?“

⁹და წავიდა ხაზაელი მისაგებებლად. და ხელში აიღო ძღვენი და ყველაფერი, რაც კი საუკეთესო იყო დამასკოში, 40 აქლემის ტვირთი. და მივიდა, და წარუდგა მას და თქვა: „შენმა ძემ – ბენ-ჰადადმა, არამის მეფემ გამომგზავნა შენთან საკითხავად, განვიკურნები თუ არაო ამ სენისგან?“

¹⁰და უთხრა ელისემ: „წადი და უთხარი: განიკურნები-თქო. მაგრამ მახილვინა უფალმა, რომ მაინც მოკვდება.“

¹¹და მიაშტერა ელისემ მას მზერა და დიდხანს იყო ასე, ვიდრე არ შეაშფოთა იგი; და ატირდა ღვთისკაცი.

¹²და თქვა ხაზაელმა: „რატომ ტირის ჩემი ბატონი?“ და თქვა: „იმიტომ, რომ ვიცი, თუ რა ბოროტებას უზამ ისრაელიანთ: ცეცხლს მისცემ მათ ციხესიმაგრეებს, მახვილით ამოხოცავ მათ ჭაბუკებს, გასრეს მათ თოთო ბავშვებს და შუაზე გაჰკვეთ მათ ორსულ დედაკაცებს.“

¹³და თქვა ხაზაელმა: „ვინ ძაღლი გდია შენი მსახური, რომ ასეთი დიდი საქმე გააკეთოს?“ და თქვა ელისემ: „შენი თავი მიჩვენა უფალმა არამის მეფედ.“

¹⁴და წავიდა ელისესგან და მივიდა თავის ბატონთან. და ჰკითხა: რა გითხრაო ელისემ? თქვა: შენზე მითხრა, გამოჯანმრთელდებაო.

¹⁵და აიღო მეორე დღეს მაქმანი, წყალში დაასველა და სახეზე დაადო მას. და მოკვდა ბენ-ჰადადი და გამეფდა მის ნაცვლად ხაზაელი.

¹⁶ისრაელის მეფე იორამ ახაბის ძის მეხუთე წელს, იუდას მეფის, იოშაფატის შემდეგ გამეფდა იორამ იოშაფატის ძე, იუდას მეფე.

¹⁷32 წლისა იყო, როცა გამეფდა, და რვა წელი იმეფა იერუსალიმში.

¹⁸ისრაელის მეფეთა გზით დადიოდა იგი, როგორც იქცეოდა ახაბის სახლი, რადგან ახაბის ასული ჰყავდა ცოლად, და უკუღმართად იქცეოდა უფლის თვალში.

¹⁹მაგრამ არ უნდოდა უფალს იუდას დაღუპვა დავითის, თავისი მსახურის გამო, როგორც ნათქვამი ჰქონდა, რომ მისცემდა ლამპარს მას მის შთამომავლობაში სამარადისოდ.

²⁰მის დროს განუდგა ედომი იუდას და დაისვეს მეფე.

²¹და გაემართა იორამი ცაყირისკენ მთელი თავისი ეტლიონით; და ადგა ღამით და სძლია ედომელებს, და ეტლის მეთაურებს, გარს რომ ეხვივნენ. და გაიქცა ხალხი თავ-თავის კარვებში.

²²და განუდგა ედომი იუდას და ასეა დღემდე. იმ ხანადვე განდგა ლიბნაც.

²³იორამის დანარჩენი საქმენი, ყველაფერი, რაც გაუკეთებია, იუდას მეფეთა მატიანეშია ჩაწერილი.

²⁴და განისვენა იორამმა თავის მამებთან და დაიმარხა თავის მამათა გვერდით დავითის ქალაქში. მის ნაცვლად მისი ძე, ახაზია, გამეფდა.

²⁵ისრაელის მეფის, იორამ ახაბის ძის მეთორმეტე წელს გამეფდა ახაზია იორამის ძე, იუდას მეფე.

²⁶22 წლისა იყო ახაზია, რომ გამეფდა; და ერთი წელი იმეფა იერუსალიმში. დედამისი იყო ღათალია, ისრაელის მეფის, ყომრის, ასული.

²⁷ახაბის სახლის გზით დადიოდა იგი და უკუღმართად იქცეოდა უფლის თვალში, როგორც ახაბის სახლი, რადგან ახაბის სახლის სიძე იყო.

²⁸და წავიდა იგი იორამ ახაბის ძესთან ერთად ხაზაელთან, არამის მეფესთან საომრად გალაადის რამოთში და დაჭრეს არამელებმა იორამი.

²⁹და მობრუნდა იორამ მეფე, რომ იზრეყელში მოეშუშებინა ჭრილობა, არამელებმა რომ მიაყენეს რამაში, როცა ხაზაელს, არამის მეფეს ეომებოდა. და ჩამოვიდა ახაზია იორამის ძე, იუდას მეფე, იზრეყელში იორამ ახაბის ძის სანახავად, რადგან ავად იყო იგი.