Read სბს–2013 1 ნეშტთა 12 Bible Online

1 ნეშტთა 12 - სბს–2013 bible

1 ნეშტთა 12

¹აჰა, ისინი, ციკლაგში რომ მივიდნენ დავითთან, როცა ის ჯერ კიდევ ემალებოდა საულს, კიშის ძეს. ისინი იმ მოყმეთა შორის იყვნენ, რომლებიც დავითს შეეწეოდნენ ბრძოლაში.

²მშვილდ-ისრით შეიარაღებულნი, ორივე ხელით ქვისა და ისრის მტყორცნელნი, საულის მოძმე ტომელნი – ბენიამინელნი:

³პირველი ახიყეზერი და იოაში – შემაყა გიბეყათელის ძენი, იეზიელი და ფელეტი – ყაზმავეთის ძენი, ბერაქა და იეჰუ – ყანათოთელნი,

⁴იშმაყია გიბეონელი – ერთ-ერთი მოყმე ოცდაათში და ოცდაათის მეთაური, იერემია, იახაზიელი, იოხანანი, იოზაბად გედერელი,

⁵ელყუზაი, იერიმოთი, ბეყალია, შემარია, შეფატია ხარუფელი,

⁶ელკანა, იშია, ყაზარელი, იოყეზერი, იაშობეყამი – კორახელნი;

⁷იოყელა და ზებადია, იეროხამ გედორელის ძენი.

⁸გადელებს ჩამოშორდნენ და დავითთან მივიდნენ უდაბნოს საფარში მამაცი მოყმენი, საომრად გაწვრთნილი ვაჟკაცები, ფარ-შუბით შეიარაღებულნი, სახით ლომის მსგავსნი და მთის არჩვივით სწრაფნი.

⁹მეთაური – ყეზერი, მეორე – ყობადია, მესამე – ელიაბი,

¹⁰მეოთხე – მიშმანა, მეხუთე – იერემია,

¹¹მეექვსე – ყათაი, მეშვიდე – ელიელი,

¹²მერვე – იოხანანი, მეცხრე – ელზაბადი,

¹³მეათე – იერემია, მეთერთმეტე – მაქბანაი.

¹⁴ესენი იყვნენ გადიანები, მხედართმთავრები; ყველაზე ნაკლები ასსა უფროსობდა, ყველაზე დიდი – ათასს.

¹⁵მათ პირველ თვეში გადალახეს იორდანე, როდესაც ადიდებული მდინარე ნაპირებიდან გადმოდის ხოლმე. მათ აღმოსავლეთით და დასავლეთით განდევნეს ამ ველების მკვიდრნი.

¹⁶ბენიამინისა და იუდას ძეთაგანაც მივიდნენ დავითთან საფარში.

¹⁷და გამოეგება მათ დავითი, და გამოელაპარაკა და უთხრა: „თუ სამშვიდობოდ და დამხმარედ მოხვედით ჩემთან, გიერთგულებთ. თუ იმისთვის მოხვდით, რომ ჩემი მტრის ხელს მზაკვრულად მიმცეთ, აჰა, ჩემი ხელი სუფთაა, დაე, ჩვენი მამების ღმერთმა იხილოს ეს და განსაჯოს.“

¹⁸მაშინ სულმა მოიცვა ყამასაი, ოცდაათის მეთაური, და თქვა: „მშვიდობა შენდა, დავით, იესეს ძეო! მშვიდობა შენ და მშვიდობა შენს დამხმარეთ, რადგან ღმერთია შენი შემწე!“ და მიიღო ისინი დავითმა და რაზმის მეთაურობა ჩააბარა.

¹⁹მანაშიანებიც მიემხრენ დავითს, როდესაც იგი ფილისტიმელებით მიდიოდა საულთან საომრად, მაგრამ არ მიხმარებიან ისინი, რადგან ფილისტიმელთა მთავრები შეითქვნენ და უკან გამოაბრუნეს დავითი, ასე თქვეს: ჩვენდა საზიანოდ საულს, თავის ბატონს, მიემხრობაო.

²⁰როცა ციკლაგს მივიდა, მანაშეანებიც შეუერთდნენ: ყადნახი, იოზაბადი, იდიყაელი, მიქაელი, იოზაბადი, ელიჰუ, ცილთაი – მანაშელთა ათასისთავები.

²¹ისინი ეხმარებოდნენ დავითს ურდოების წინააღმდეგ ბრძოლაში, რადგან ყველანი მამაცი მოყმენი და მხედართმთავრები იყვნენ.

²²ყოველდღიურად მიედინებოდნენ დავითთან, ვიდრე მისი ლაშქარი ღვთის მხედრობასავით გაიზრდებოდა.

²³აჰა, რიცხვი იმ საომრად შეჭურვილი მეთაურებისა, რომელნიც დავითთან ხებრონში მივიდნენ, რათა უფლის სიტყვისამებრ საულის სამეფო გადაეცათ მისთვის.

²⁴იუდას ძენი, ფარ-შუბის მტვირთველნი, 6800 იყო საომრად.

²⁵სიმეონის ძეთაგან 7100 მამაცი მოყმე იყო.

²⁶ლევის ძეთაგან – 4600.

²⁷ხოლო იეჰოიადაყს, აარონელთა წინამძღოლს, თან 3 700 ახლდა.

²⁸ცადოკს, მამაც ყმაწვილს, და მის მამისსახლს 22 მეთაური ჰყავდა.

²⁹საულის ძმები, ბენიამინის ძეთაგან, 3 ათასნი იყვნენ. მათგან დიდი წილი საულის სახლში დარჩა.

³⁰ეფრემის ძენი 20800 იყო – მამაცი მოყმენი და თავიანთ მამისსახლთა სახელოვანი ვაჟკაცები.

³¹მანაშეს ნახევარტომიდან 18000 იყო, რომელნიც სახელებით გამოიხმეს, რათა დავითის გასამეფებლად მოსულიყვნენ.

³²ისაქარის ძეთაგან 200 მეთაური იყო. რომელთაც იცოდნენ დრო-ჟამთა გულისხმისყოფა და უწყოდნენ, თუ რა უნდა გაეკეთებინათ ისრაელიანთ. ყველა მათი ძმა მათი დარიგებით მოქმედებდა.

³³ზებულუნის ტომიდან გამოდიოდა და საომრად იყო დარაზმული ყოველგვარი საბრძოლო აღჭურვილობით 50 ათასი კაცი, რათა ერთსულოვნად დახმარებოდნენ დავითს.

³⁴ნაფთალის ტომიდან ათასი მთავარი იყო, 37 ათასი ფარ-შუბოსნის თანხლებით.

³⁵დანის ტომიდან იყო 28600 საომრად დარაზმული.

³⁶აშერიდან საომრად 40 ათასი საომრად დარაზმული გიმოდიოდა.

³⁷იორდანეს გაღმა მხრიდან გამოდიოდნენ: რეუბენიანთაგანნი, გადელნი, მანაშეს ნახევარტომელნი, ყველანაირი საბრძოლო საჭურველით, სულ 120 ათასი.

³⁸ყველა ეს მებრძოლი ვაჟკაცი მწყობრად დარაზმული, წრფელი გულით მოვიდა ხებრონში დავითის გასამეფებლად მთელს ისრაელზე. ასევე მთელი დანარჩენი ისრაელი ერთსულოვანი იყო დავითის გასამეფებლად.

³⁹სამ დღეს დარჩნენ ისინი იქ, ჭამდნენ და სვამდნენ, რადგან მათ ძმებს ყველაფერი მოემზადებინათ მათთვის.

⁴⁰ასევე მათ მეზობლებს ისაქარის, ზებულუნისა და ნაფთალის ტომებიდანაც კი მოჰქონდათ ვირებით, აქლემებით, ჯორებითა და ხარებით სურსათ-სანოვაგე: პური, ცომეული, ლეღვის ჩირი, ჩამიჩი, ღვინო, ზეთი; მოუდიოდათ უამრავი ცხვარ-ძროხა; რადგან სიხარული იყო ისრაელში.