Read სბს–2013 1 ნეშტთა 14 Bible Online

1 ნეშტთა 14 - სბს–2013 bible

1 ნეშტთა 14

¹გაუგზავნა ხურამმა, ცორის მეფემ, დავითს მოციქულები და კედარის ხე-ტყე, კალატოზები და ხუროები მისთვის სახლის ასაშენებლად.

²და მიხვდა დავითი, რომ მტკიცედ ჰყავდა დადგენილი იგი უფალს ისრაელის მეფედ, და რომ აღამაღლა მისი სამეფო თავისი ერის, ისრაელის, გამო.

³და კიდევ მოიყვანა დავითმა იერუსალიმში ცოლები და კიდევ შეეძინა მას ძენი და ასულნი.

⁴აჰა, იმათი სახელები, რომელნიც იერუსალიმში შეეძინა: შამუაყი, შობაბი, ნათანი, სოლომონი,

⁵იბხარი, ელიშუაყი, ელფალეტი,

⁶ნოგა, ნეფეგი, იაფიაყი,

⁷ელიშამაყი, ბეყელიადაყი, ელიფელეტი.

⁸და შეიტყვეს ფილისტიმელებმა, რომ მთელი ისრაელის მეფედ აკურთხეს დავითი, და დაიძრნენ ფილისტიმელნი დავითის შესაპყრობად. შეიტყო ეს დავითმა და გამოვიდა მათ წინააღმდეგ.

⁹და მოვიდნენ ფილისტიმელები და რეფაიმის ველზე განლაგდნენ.

¹⁰დავითი ღმერთს დაეკითხა: „გავილაშქრო ფილისტიმელებზე? ჩამიგდებ მათ ხელში?“ და უთხრა მას უფალმა: „გაილაშქრე, რადგან ხელში ჩაგიგდებ ფილისტიმელებს.“

¹¹და ავიდნენ ბაყალ-ფერაციმში, და იქ სძლია დავითმა ფილისტიმელნი და თქვა დავითმა: „წალეკა ღმერთმა ჩემი მტრები ჩემი ხელით, როგორც ღვართქაფმა.“ ამიტომ ეწოდა იმ ადგილს ბაყალ-ფერაციმი.

¹²და იქ მიატოვეს ფილისტიმელებმა თავიანთი კერპები. დავითმა ბრძანა და ცეცხლში დაწვეს ისინი.

¹³და კვლავ გამოილაშქრეს ფილისტიმელებმა და ველზე განლაგდნენ.

¹⁴და კვლავ დაეკითხა დავითი ღმერთს. და უთხრა ღმერთმა: „პირდაპირ ნუ მიადგები მათ, გარს მოუარე და თუთის ხეების მხრიდან მიდი.

¹⁵და, როგორც კი თუთების კენწეროებიდან შრიალის ხმა შემოგესმება, იმ წამსვე შეიმართე საომრად, რადგან მაშინ წაგიძღვება ღმერთი ფილისტიმელთა ბანაკის შესამუსრად.“

¹⁶ისე მოიქცა დავითი, როგორც ღმერთმა უბრძანა, და გიბეონიდან გეზერამდე მუსრი გაავლო ფილისტიმელთა ურდოს.

¹⁷დავითმა მთელ ქვეყანაზე გაითქვა სახელი და უფალმა მისი შიში მისცა ყველა ხალხებს.